– ناۋقاستاردىڭ 53 پايىزى قاۋىپتى ۆيرۋستى توي-تومالاقتا, ەسكە الۋ ءىس-شارالارىندا, ساۋدا ۇيلەرى مەن بازارلار, قوعامدىق تاماقتانۋ ورىندارى مەن تۇنگى كلۋبتاردا جۇقتىرعان. ال 25,9 پايىزى – ناۋقاستارمەن جاقىن قارىم-قاتىناستا بولعاندار, 11,7 پايىزى قوعامدىق كولىكتەردە شالدىققان. تۇرعىندار سانيتارلىق ساقتىق شارالارىنا نەمقۇرايدى قاراي باستادى. بەتپەردە تاقپاۋ, الەۋمەتتىك اراقاشىقتىقتى ساقتاماۋ ەپيدەميالىق احۋالعا كەرى اسەرىن تيگىزىپ وتىر. تاعى ءبىر سەبەبى – جاڭا شتامنىڭ تارالۋى. الماتىعا جىبەرىلگەن 43 سىنامانىڭ
18-ىنەن «دەلتا» شتامى انىقتالدى. بۇل شتامنىڭ جۇعۋ دەڭگەيى ەكى ەسە جوعارى, اۋرۋ بەلگىسى اۋىر فورمادا وتەدى, – دەيدى م.تاناۋوۆ.
ال وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى قايسار ابدۋاليەۆتىڭ ايتۋىنشا, كوروناۆيرۋستى جۇقتىرعاندار سانىنىڭ وسۋىنە بايلانىستى اتىراۋ قالاسىندا رەزەرۆتەن 330 ينفەكتسيالىق توسەكتىك ورىن ىسكە قوسىلعان. قاۋىپتى ۆيرۋسقا شالدىعۋشىلار سانى وسە بەرسە, №2 وبلىستىق اۋرۋحاناداعى 30 ورىندىق ىشەك ينفەكتسياسى ءبولىمىن ينفەكتسيالىق ستاتسيونارعا اينالدىرۋ جوسپارلانىپ وتىر. ەپيدەميالىق جاعداي كۇردەلەنەتىن بولسا, وبلىستىق اۋرۋحانانىڭ جاڭا كورپۋسىندا دايىندالعان 200 ورىن دا ينفەكتسيالىق ستاتسيونارعا اينالادى. سونداي-اق تەمىر جول اۋرۋحاناسىنان كوروناۆيرۋس جۇقتىرعان ناۋقاستاردى ەمدەۋ ءۇشىن ارنايى ورىن دايىندالادى.
– سوڭعى ون كۇندە وڭىردە ءولىم كورسەتكىشى 50 پايىزعا ءوستى. جىل باسىنان بەرى اتىراۋ وبلىسىندا كوروناۆيرۋس ينفەكتسياسىن جۇقتىرعان 160 ادام قايتىس بولدى. ولاردىڭ دەنى – سوزىلمالى اۋرۋى بار ەگدە جاستاعى ادامدار. قايتىس بولعانداردىڭ ورتاشا جاسى – 67-دە, – دەيدى ق.ابدۋاليەۆ.
ونىڭ مالىمەتىنە سۇيەنسەك, وڭىرگە اقپان ايىنان بەرى 141 200 دوزا ۆاكتسينا جەتكىزىلدى. ال 1 اقپان – 10 شىلدە ارالىعىندا 113 798 اتىراۋلىق سپۋتنيك V, QazVac, Hayat Vax ۆاكتسينالارىنىڭ
I كومپونەنتىن سالدىرعان. ۆاكتسينالاردىڭ II كومپونەنتىن العاندار سانى 60 410 ادامعا جەتىپ وتىر. الايدا ۆاكتسينالاۋعا قاتىستى تومەنگى كورسەتكىش سوزىلمالى اۋرۋلارى بار ناۋقاستار (11%), ستۋدەنتتەر (11,4%) مەن پەداگوگتەر (50%) اراسىندا بايقالادى.
وسىنداي سەبەپتەن بە, سوڭعى ءۇش كۇندە 570 ادام كوروناۆيرۋس ينفەكتسياسىن جۇقتىرىپ الدى. وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ اقپاراتىنا قاراعاندا, 8 شىلدەدە – 154, 9 شىلدەدە – 160, ال 10 شىلدەدە 256 ادام كوروناۆيرۋس ينفەكتسياسىنا شالدىققان.
– ماسەلەن, 10 شىلدەدە اتىراۋ قالاسىندا قاۋىپتى ۆيرۋس جۇقتىرۋدىڭ 201 جاعدايى تىركەلدى. قىزىلقوعا اۋدانىندا – 13, تەڭىز كەن ورنىندا – 12, يندەردە – 12, جىلىويدا – 8, ماحامبەتتە – 6, قۇرمانعازى اۋدانىندا 4 ادامنان كوروناۆيرۋس ينفەكتسياسىنىڭ بەلگىسى تابىلىپ وتىر. وڭىردەگى 2 428 توسەكتىك ورىنعا ەسەپتەلگەن ينفەكتسيالىق ستاتسيونارلاردا 771 پاتسيەنت ەم قابىلداۋ ءۇشىن وقشاۋلاندى. ستاتسيونارلارداعى جۇكتەمە – 31,7 پايىز. ال 103 ورىندىق جانساقتاۋ بولىمىندە 46 پاتسيەنت جاتىر. ناۋقاستاردىڭ تورتەۋى وكپەنى جاساندى جەلدەتۋ اپپاراتىنا قوسىلعان. جانساقتاۋ بولىمىندەگى جۇكتەمە 42 پايىزدى قۇرايدى, – دەپ ءمالىم ەتتى باسقارمانىڭ ءباسپاسوز قىزمەتىنەن.
بەلگىلى بولعانداي, مودۋلدىك اۋرۋحانادا – 186, اۋداندارداعى ستاتسيونارلاردا – 180, №2 وبلىستىق اۋرۋحانادا – 148, كارديولوگيالىق ورتالىقتا 100 پاتسيەنت ەمدەلۋدە. سونداي-اق فتيزيوپۋلمانولوگيالىق ورتالىقتا – 96, تەڭىز كەنىشىندەگى ينفەكتسيالىق ستاتسيوناردا 61 ناۋقاس وقشاۋلانعان. بۇعان قوسا, حاتتاماعا سايكەس ەمدەلۋدى ءوز ۇيىندە جالعاستىرىپ جاتقان 708 ادام بار.
