ادەبيەت • 11 شىلدە، 2021

وقىرمان ولجاسى ورتايمايدى

93 رەت كورسەتىلدى

ورال قالاسىنىڭ ورتالىق دەمالىس ساياباعىندا «كىتاپ – سارقىلماس قازىنا» اتتى جارمەڭكە ءوتتى. ءىس-شاراعا جەرگىلىكتى قالامگەرلەر دە قاتىسىپ، اشىق اسپان استىندا وقىرماندارىمەن جۇزدەستى.

ورال قالالىق كىتاپحانالار جۇيە­سى بۇل ءىس-شارانى ەل تاۋەل­سىزدىگىنىڭ 30 جىلدىعى قارساڭىندا جانە 2021 – «بالالار ادەبيەتى» جىلى اياسىندا ۇيىمداستىرعان ەكەن. ورال قالاسى اكىمىنىڭ ورىنباسارى ەرلان عاليەۆ، قالالىق مادەنيەت جانە تىلدەردى دامىتۋ ءبولىمىنىڭ باسشىسى سەرىك قايىر­ليەۆ، قالالىق كىتاپحانالار جۇيەسىنىڭ مەڭگەرۋشىسى گاندي ىزتۇرعانقىزى ءىس-شاراعا باستان-اياق قاتىسىپ، قولداۋ كورسەتتى. ءىس-شارا بارىسىندا قالاداعى «جاڭگىر حان»، «دانا» كىتاپ دۇكەندەرى، «زەرەك» وقۋ ورتالىعى، «اığanym»، «قۋانىش» جەكە كاسىپكەرلەرى ساياباق كەلۋشىلەرىنە كىتاپ ونىمدەرىن ۇسىندى. مەكتەپ وقۋشىلارى اراسىندا «مەنىڭ سۇيىكتى كەيىپكەرىم» اتتى جاس سۋرەتشىلەر بايقاۋى ۇيىمداستىرىلدى. ال وقىرمان قاۋىممەن كەزدەسۋگە اقجايىق قالامگەرلەرىنىڭ اقساقالى، اقىن ايتقالي نارىكوۆ، ايتىس اردا­گەرى شولپان قىدىرنيازوۆا، قازاق­ستان جازۋشىلار وداعىنىڭ مۇ­شەلەرى داريعا مۇشتانوۆا، تالاپ تايماس ۇلى، باۋىرجان عۇباي­دۋللين سەكىلدى جەرگىلىكتى قالامگەرلەر كەلدى.

«بۇل ءىس-شارانىڭ ماقساتى – وقىر­مانداردىڭ كىتاپقا دەگەن قىزىعۋشىلىعىن ارتتىرۋ، سونىمەن قاتار باسپالاردىڭ، اۆتور­لاردىڭ، مادەنيەت جانە ءبىلىم بەرۋ مەكەمەلەرىنىڭ، كىتاپ ساتۋشى ۇيىمداردىڭ شىعارماشىلىق جانە ىسكەرلىك ىنتىماقتاستىعىن نى­عايتۋ»، دەيدى گاندي ىزتۇرعان­قىزى.

كىتاپ جارمەڭكەسىنىڭ قالا­لىق مادەنيەت جانە دەمالىس سايا­با­عىندا، اشىق اسپان استىندا وتكىزىلگەنى جيىلعان حالىققا دا، قالامگەرلەرگە دە ەرەكشە اسەر ەتتى. جەرگىلىكتى اقىنداردىڭ ولەڭ­دەرىنەن قۇرالعان پوەتيكالىق كورى­نىستى ورال قالالىق جاستار مادە­نيەت ءۇيىنىڭ ارتىستەرى ء«تىرى اۋەن­مەن» ارلەپ تۇردى. ۇلكەندەر جاعى پوەزيا الاڭقايىنا ۇيىرىلسە، بالالار جاسىل شالعىنعا جاتا كەتتى. ساياباق باسشىلىعى بۇل جاعدايدى دا ويلاستىرعان ەكەن، جەرگە وتىرام دەۋشىلەرگە ارنايى كىلەمشەلەر تاراتتى. ادەمى جيىننىڭ شىرايىن لەزدە توگىپ وتكەن اق جاڭبىر دا بۇزا المادى.

– وسىنداي كىتاپ جارمەڭكەسىن ۇيىمداستىرعان قالالىق كىتاپ­حاناعا مىڭ العىس ايتامىن. فور­ماتى ەرەكشە ءىس-شارا بولدى. بۇل كۇنگى العاشقى وقىرمانىم اراي­لىم دەگەن قىزىما قولتاڭباممەن قوسا اق باتامدى بەردىم. جازۋشى مەن كىتاپتى وقىرمانىمەن تابىس­تىرعان كەرەمەت كەزدەسۋ بولدى، – دەيدى قالامگەر داريعا مۇشتانوۆا. داريعا عازەزقىزى بۇگىنگى كەزدەسۋ­دەن ەرەكشە شابىت العانىن، ءبىراز­دان بەرى قاڭتارىلىپ قالعان قالا­مىن قايتا قولعا الىپ، باستاپ قوي­عان شىعارماسىن اياقتاۋعا اسىعىپ وتىر­عانىن جاسىرمادى.

بالالار جازۋشىسى باۋىرجان عۇبايدۋللين دە جاس ۇرپاقتى كىتاپ قازىناسىمەن، ادەبيەت الە­مىمەن تابىستىرۋ ءۇشىن وسىنداي كرەاتيۆتى ءىس-شارالاردى كوبىرەك ۇيىمداستىرۋ قاجەتتىگىن ايتتى.

– ءبىز بىرەر جىلدان بەرى ورال قالاسىندا كىتاپ دۇكەنىن اشىپ، ەلى­مىز­دىڭ ءتۇرلى باسپالارىنان ەڭ ۇزدىك، سۇرا­نىسقا يە دەگەن ونىمدەرىن اكە­لىپ جاتىرمىز. ارينە، ءبىزدىڭ «DANA» رۋحاني ورتالىعىن قازىر­دىڭ وزىندە ورالدىقتار جاقسى ءبىلىپ قالدى. دەگەنمەن وسىنداي ءىس-شارا­لار وتە كەرەك ەكەن. حالىق كوپ جي­نا­­لاتىن ورىندارعا ءجيى شىعىپ، ادەبيەتتى، كىتاپ الەمىن ناسي­حاتتاۋدىڭ قاجەتتىگىنە كوزىم انىق جەتىپ وتىر، – دەيدى جانتاس سافۋللين. 

جاس اقىن داۋرەن شامۇرات جۇر­گىزگەن ەمەن-جارقىن كەزدە­سۋدە ءار قالامگەر ءوزىنىڭ شىعارماشىلىق جوسپارلارىن ءبولىسىپ، ولەڭ وقىدى. ءىس-شارا سوڭىندا ادەبيەت كەشىنەن اسەرلەنگەن حالىق اراسىنان سۋىرىلىپ شىعىپ، ءوز ولەڭدەرىن وقىپ بەر­گەن وقىرماندار دا بولدى. «وسىنداي شىنايى كەزدەسۋلەردى جيىرەك وتكىزۋ كەرەك ەكەن» دەگەن وي­دى ۇيىمداستىرۋشىلار دا، قالام­گەرلەر دە كوڭىلىنە ءتۇيىپ كەتتى.

ايتپاقشى، وسى كىتاپ جارمەڭ­كەسى كەزىندە «مەنىڭ سۇيىكتى كەيىپ­كەرىم» اتتى سۋرەتشىلەر باي­قاۋى وتكەنىن ايتقان ەدىك. شارا سوڭىندا بايقاۋ قورىتىندىلانىپ، كوڭىل تۇكپىرىندەگى كەيىپكەرىن الۋان تۇس­پەن قاعاز بەتىنە كوشىرگەن بال­عىن سۋرەتشىلەر ايسۇلۋ حاسان­عاليەۆا، ايقىن ءادىل ۇلى، سايا­گۇل قۇلمۇحانوۆا، جانەركە تىلەك­قابىل، ءمادينا بەركىن، سوفيا ششۋكينا، ءالينا يشكەنوۆا، ماريا كليموۆا، ءالينا وتەۋوۆا ارنايى سىيلىقتارعا يە بولدى.

...ءبىر كەزدەرى اتاقتى اقىن قاسىم امانجولوۆ:

«شاعاننىڭ بويى كوك شالعىن،

شالقامنان جاتقام

شاڭقاي ءتۇس،

گۇل بولىپ مەنىڭ قۇشاعىم،

كەۋدەمدە قونعان بۇلبۇل قۇس!» – دەپ جىرلاعان ەكەن. اراعا ءبىر عاسىر سالىپ ءدال وسى جەردە وتكەن كەرەمەت ءىس-شاراعا قاتىسقان ءار جاننىڭ دا كەۋدەسىندە ءبىر-ءبىر بۇلبۇل سايراپ كەتكەندەي كورىندى.

 

باتىس قازاقستان وبلىسى

 

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ۇقساس جاڭالىقتار