اسكەري قىزمەتكە باراتىن جانە جاس سارباز كۋرسىن اياقتاعان جاس ساربازدار وتان قورعاۋشىلارىمەن ءبىرتۇتاس قۇرامدا تۇرۋعا سالتاناتتى تۇردە اسكەري انت قابىلدادى. قازاقستاننىڭ بارلىق ايماقتارىنان 800-گە جۋىق جاس جاۋىنگەر وتانعا ادال بولۋعا انت بەرۋگە كەلدى.
اسكەري انت - بۇل مەملەكەت باسشىسى بەكىتكەن, ءار ازاماتتىڭ ءبىزدىڭ ەلىمىزدى قورعاۋ ءۇشىن جەكە جاۋاپكەرشىلىگىن قامتاماسىز ەتەتىن زاڭدى قۇجات.جاس جاۋىنگەرلەر ءۇشىن بۇگىن اتاۋلى كۇن. اسكەري انت قابىلداۋ - بۇل وتاننىڭ ار-نامىسىن, بوستاندىعى مەن تاۋەلسىزدىگىن قورعاۋ مىندەتتەرى ايقىن جازىلعان پاتريوتتىق جانە ادامگەرشىلىك ءىس-ارەكەت.
ءار جىلى ازاماتتىق پارىزىن ورىنداۋعا ۇلتتىق ۇلان قاتارىنا جاس ورەندەر كەلەدى. ولاردىڭ نەگىزگى ماقساتى - ادامنىڭ جانە ازاماتتىڭ قۇقىقتارى مەن بوستاندىقتارىن قىلمىستىق جانە وزگە دە قۇقىققا قارسى قولسۇعۋشىلىقتاردان قورعاۋ بولىپ تابىلادى. بۇل ولارعا ۇلكەن جاۋاپكەرشىلىكتى جۇكتەيدى.
ەلوردانىڭ باس سانيتارلىق دارىگەرىنىڭ قاۋلىسىنا جانە قالانىڭ "قىزىل ايماقتا" بولۋىنا بايلانىستى سالتاناتتى ءراسىم ونلاين رەجيمدە, ساربازداردىڭ جاقىندارى مەن تۋىستارىنىڭ جانە ىقپالداستىق ورگاندار وكىلدەرىنىڭ قاتىسۋىنسىز وتكىزىلدى. بۇعان قوسا, ەلوردالىق جەدەل بريگادا ومىرىندەگى اتاۋلى وقيعاعا ارنايى قوناقتار كەلدى. ۇلتتىق ۇلان باس قول باسشىلىعىنان اسكەري كەڭەس حاتشىسى پولكوۆنيك ساۆەردين يميروۆ جانە قۇقىقتىق اسكەر ارداگەرى گەنەرال-مايور ساعاتبەك نۇراحمەتوۆ وزدەرىنىڭ ىزگى تىلەكتەرىن ءبىلدىردى. سالتاناتتى ءبولىمنىڭ سوڭىندا قۇرمەتتى قاراۋىل روتاسىنىڭ اسكەري قىزمەتشىلەرى قوناقتار مەن ءىس-شاراعا قاتىسۋشىلارى ءۇشىن دەفيلە مەن قويان-قولتىق ۇرىس تەحنيكالارىن ۇلتتىق ۇلان ۇلگىلى-كورسەتىلىمدى وركەسترىنىڭ مۋزىكالىق سۇيەمەلدەۋىمەن كورسەتتى.
