جامبىلدىق سۋ شارۋاشىلىعى سالاسىنىڭ قىزمەتكەرلەرى ماراپاتتالدى

«وبلىس اكىمى بەردىبەك ماشبەك ۇلىنىڭ تاپسىرماسىنا سايكەس، وڭىرىمىزدە جىل ساناپ سۋارمالى ەگىس القابىنىڭ كولەمى ۇلعايىپ كەلەدى. تيىسىنشە وبلىس اكىمدىگىنىڭ قولداۋىنىڭ ارقاسىندا ەگىن شارۋاشىلىعىنا بەت بۇرعان شارۋالاردىڭ دا قاتارى ارتۋدا. سونىمەن قاتار، ديقانداردى ساپالى تۇقىممەن، تىڭايتقىشپەن قامتۋ جانە اۋىل شارۋاشىلىعى تەحنيكالارىن جاڭارتۋ باعىتىندا دا قارقىندى جۇمىستار جۇرگىزىلۋدە. دەگەنمەن، ەگەر سۋ تاپشى بولاتىن بولسا ەگىستىك القابىن ۇلعايتىپ، ساپالى تۇقىم ساتىپ الىپ، تەحنيكا جاڭارتقانىمىزدان پايدا بولمايدى. جاقسى ءونىم الۋ ءۇشىن ەڭ الدىمەن ەگىستىك القاپتارىنا سۋدىڭ كەدەرگىسىز جەتكەنى ماڭىزدى»، دەدى ول. سونداي-اق، نۇرجان نۇرجىگىتوۆ «قازسۋشار» وبلىستىق فيليالى سۋ پايدالانۋ ءبولىمىنىڭ گيدروتەگنيگى اقىلبەك مۇرات ۇلىنا، «تاسوتكەل سۋ قويماسى» وڭىرلىك بولىمشەسىنىڭ گيدروتەحنيگى دانيار تۇردىقۇل ۇلىنا وبلىس اكىمىنىڭ العىس حاتىن تابىستادى. بۇدان كەيىن جيىنعا قاتىسۋشىلاردى ەلىمىزدىڭ ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ونلاين رەجيم ارقىلى قۇتتىقتادى. سونىمەن قاتار، وبلىستىق اۋىل شارۋاشىلىعى باسقارماسى باسشىسىنىڭ ورىنباسارى ەرلان قۇلكەەۆ تە سۋ شارۋاشىلىعى قىزمەتكەرلەرىن كاسىبي مەرەكەلەرىمەن ارنايى قۇتتىقتاپ، جىلى لەبىزىن ءبىلدىردى. سونداي-اق، ول بىرقاتار مەكەمە قىزمەتكەرىن العىس حاتپەن ماراپاتتادى.

  «قازسۋشار» رەسپۋبليكالىق مەملەكەتتىك كاسىپورنى جامبىل وبلىستىق فيليالىنىڭ ديرەكتورى قازىبەك بەدەباەۆ تا ارىپتەستەرىن مەرەكەلەرىمەن قۇتتىقتاپ، سالا ارداگەرلەرىنە قۇرمەت كورسەتتى. ۇزاق جىلدار بويى سۋ شارۋاشىلىعى سالاسىندا ەڭبەك ەتىپ، ءوڭىردىڭ الەۋمەتتىك-ەكونوميكالىق دامۋىنا ۇلەس قوسقان ارداگەرلەرگە قازاقستان رەسپۋبليكاسى ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆتىڭ، سۋ رەسۋرستارى كوميتەتىنىڭ توراعاسى نۇرلان الدامجاروۆتىڭ، «قازسۋشار» رەسپۋبليكالىق مەملەكەتتىك كاسىپورنىنىڭ باس ديرەكتورى التاي ەلجاسوۆتىڭ اتىنان ارنايى سەبەتتەر تاراتىلدى. سونداي-اق، قازىبەك بەدەباەۆ ەڭبەگىمەن ەلەنگەن مەكەمە ماماندارىنا «سۋ شارۋاشىلىعىنىڭ ارداگەرى»، «سۋ شارۋاشىلىعىنىڭ ۇزدىگى» توسبەلگىسىن تاقتى. ودان بولەك، تاعى ونداعان قىزمەتكەرگە مينيستر باستاعان بىرقاتار لاۋازىمدى تۇلعالاردىڭ اتىنان قۇرمەت گراموتاسى مەن العىس حاتتارىن تابىس ەتتى. ەندى ءبىر توپ فيليال مامانى اۋىل شارۋاشىلىعى قىزمەتكەرلەرىنىڭ سالالىق كاسىپتىك وداعىنىڭ «II دارەجەلى ەڭبەك داڭقى»، «III دارەجەلى ەڭبەك داڭقى» توسبەلگىسىمەن جانە قۇرمەت گراموتاسىمەن، «قازاقستان سۋ شارۋاشىلىعى» رمك قىزمەتكەرلەرىنىڭ جەرگىلىكتى كاسىپتىك وداعىنىڭ قۇرمەت گراموتاسىمەن ماراپاتتالدى.

  جيىن بارىسىندا ءسوز العان ارداگەرلەر مەرەكە قارساڭىندا ۇمىت قالدىرماي ەسكەرىپ، ارنايى شاقىرىپ، قۇرمەت كورسەتكەن باسشىلىققا رياسىز العىستارىن جەتكىزدى. سونداي-اق، ارداگەرلەر مەكەمەنىڭ ءبىر بولمەسىنەن تاريحتى، وتكەندى كەيىنگى ۇرپاق ءبىلىپ ءجۇرۋى ءۇشىن سۋشىلارعا ارنالعان مۋزەي اشۋدى ۇسىندى. ءوز كەزەگىندە قازىبەك بەدەباەۆ ۇتىمدى ۇسىنىس بويىنشا ناقتى جۇمىستار جۇرگىزىلىپ، جۋىردا مۋزەي اشىلاتىنىن جەتكىزدى.