ايماقتار • 09 شىلدە، 2021

COVID-19: باتىس قازاقستاندا 700-دەن استام ادام اۋرۋحانادا جاتىر

18 رەت كورسەتىلدى

باتىس قازاقستان وبلىسىندا كوروناۆيرۋستەن ەمدەيتىن ارنايى ستاتسيونارلاردا ەمدەلىپ جاتقان ناۋقاس سانى 731-گە جەتتى. ءىندەت باستالعالى وبلىستا 420 ادام COVID-19-دان كوز جۇمعان، دەپ جازادى Egemen.kz.

وسى كەزگە دەيىن باتىس قازاقستان وبلىسىندا كوروناۆيرۋس ينفەكتسياسىن جۇقتىرعان 26 379 ادام تىركەلگەن ەكەن. ىندەت جۇقتىرعانداردىڭ 78،6-%-ى، ياعني 20 735 ادام جازىلىپ شىققان. سونىڭ ىشىندە 9 668 ادام ستاتسيونارلىق، 11 067 ادام امبۋلاتوريالىق ەم العان.

- شىلدەنىڭ 9-ىندا وبلىستىڭ ينفەكتسيالىق ستاتسيونارلارىنداعى 97 رەانيماتسيالىق توسەك-ورىندا 54 ناۋقاس ەمدەلءىپ جاتىر. جانساقتاۋ بولىمدەرىنىڭ تولىمدىلىعى 60 پايىزعا تايادى، - دەيدى وبلىستىڭ باس سانيتار دارىگەرى مۇحامعالي ارىسپاەۆ.

رەانيماتسيالىق توسەكتە جاتقان ناۋقاستار نەگىزىنەن جاسى 60-تان اسقان ەگدە جاندار. جۇرەك-قان تارىمى، ديابەت سەكىلدى قوسالقى دەرتتەر كوروناۆيرۋستىڭ قاۋىپتىلىگىن كۇشەيتە تۇسەدى. سوندىقتان ماماندار قاريالارعا، سوزىلمالى دەرتى بار جاندارعا ساقتىق شارالارىن كۇشەيتۋدى، كوپشىلىك ورىندارعا بارماۋدى ەسكەرتۋدە.

سوڭعى مالىمەتتەرگە قاراعاندا، كوروناۆيرۋسقا قارسى ۆاكتسينانىڭ ءىى كومپونەنتىمەن وڭىردە بارلىعى 71 502 ادام ەگىلگەن. بۇل جالپى وبلىس حالقىنىڭ 10 پايىزىنان ءسال عانا ارتىق.

- بۇل وتە از! تۇرعىنداردىڭ باسىم كوپشىلىگى ەكپە المايتىن بولسا، كوروناۆيرۋستىڭ تارالۋ قارقىنىن تەجەۋ مۇمكىن ەمەس، - دەيدى مۇحامعالي ارىسپاەۆ.

وبلىستا ەكپە جۇمىسى بيىلعى 1 اقپاندا باستالدى. سودان بەرى وڭىرگە ۆاكتسينانىڭ 320 050 دوزاسى كەلىپ ءتۇسكەن. مۇنىڭ 188 000 دوزاسى – I كومپونەنت، 132 050 دوزا II كومپونەنت. ونىڭ ىشىندە رەسەيدە وندىرىلگەن «سپۋتنيك V» ۆاكتسيناسى247 050 دوزا. وتاندىق «QAZVAس» ۆاكتسيناسى 7 000 دوزا، بىرىككەن اراب امىرلىكتەرىندە وندىرىلگەن «Hayat - Vax» ۆاكتسيناسى 50 000 دوزا، قىتايدا وندىرىلگەن «CoronaVac» ۆاكتسيناسى 16 000 دوزا ەكەن.

جالپى وبلىس بويىنشا ۆاكتسينانىڭ ءى كومپونەنتىمەن 122 187 ادام ەگىلگەن. 91 092 ادام – «سپۋتنيك V» ەكپەسىن، 1 959 ادام - «QazVac»-تى، 22 901 ادام - «Hayat - Vax» ۆاكتسيناسىن، 6 235 باتىسقازاقستاندىق «CoronaVac»-تى تاڭداعان.

- حالىقتى COVID-19 كوروناۆيرۋستىق ينفەكتسياسىنان قورعاۋدىڭ جالعىز ءارى ءتيىمدى جولى ۆاكتسيناتسيالاۋ. ەكپەنىڭ ارقاسىندا ادامزات شەشەك سىندا اسا قاۋىپتى اۋرۋدى جەڭىپ، ديفتەريا، قىزىلشا، سىرەسپە جانە تاعى باسقا اۋىر ينفەكتسيالىق اۋرۋلارعا قاتىستى سالىستىرمالى ەپيدەميولوگيالىق تۇراقتىلىققا قول جەتكىزدى. دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىمى بويىنشا ۇجىمدىق يممۋنيتەت قالىپتاستىرۋ ءۇشىن حالىقتىڭ 60%-دان كەم ەمەس بولىگى ۆاكتسيناتسيالانۋى ءتيىس. ايماقتا ەپيدەميولوگيالىق جاعدايدىڭ ناشارلاۋىنا جول بەرمەۋ ءۇشىن سانيتارلىق نورمالاردى قاتاڭ ساقتايىق، ادام كوپ جينالاتىن قوعامدىق ورىندارعا بارمايىق، – دەيدى ءوڭىردىڭ باس سانيتار دارىگەرى.

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ۇقساس جاڭالىقتار