اتىراۋ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ رەسمي وكىلى نۇرلان يمانعاليەۆتىڭ ايتۋىنشا, 8 شىلدەدە الەۋمەتتىك جەلىدە مۇقىر اۋىلىنىڭ تۇرعىندارى سۇقسىر ۇيرەككە ۇقساس قۇس تابىلعانىن جاريالاعان.
«قۇس ادامداردان ۇرىكپەگەن. بءىزدىڭ ينسپەكتورلار اۋىل تۇرعىندارىمەن بايلانىسقا شىقتى. تۇرعىندار تاۋىپ العان قۇستى اتىراۋعا كەلە جاتقان كولىك جۇرگىزۋشىسى ارقىلى بەرىپ جىبەردى. ينسپەكتورلار قۇستى تەكسەرۋدەن وتكىزىپ, جاراقاتتانباعانىن انىقتادى. سۇقسىر ۇيرەككە ۇقساس قۇس «اقجايىق» مەملەكەتتىك تابيعي رەزەرۆاتىنىڭ اۋماعى ارقىلى كاسپي تەڭىزءىنە قۇياتىن كانالعا جىبەرىلدى» دەيدى نۇرلان يمانعاليەۆ.
ال جەرگىلىكتى ورنيتولوگ, «قانسونار» رەسپۋبليكالىق قاۋىمداستىعى وڭىرلىك وكىلدىگىنىڭ ديرەكتورى الەكساندر يۆاسەنكونىڭ ايتۋىنشا, اتىراۋ وبلىسىندا سۇقسىر ۇيرەكتىڭ بىرنەشە ءتۇرى كەزدەسەدى. مۇنداي قۇس قىزىل كىتاپقا ەنبەگەن.
