تەاترلىق كوپشىلىك ساحنا كورىنىستەرىنىڭ ەرەكشەلىگى – ساحنا كەڭىستىگىندەگى ءار بۇرىشتىڭ وزىندىك ءومىرى, تىنىس-تىرشىلىگى بولدى. ال وسىناۋ تىرشىلىككە رەسەيلىك وپەرا رەجيسسەرى ميحايل پاندجاۆيدزە جان ءبىتىرىپ, ميزانستسەنالاردى ايرىقشا تالعاممەن ورنالاستىردى.
بۇل كەشتە سيمفونيالىق وركەستر ءاربىر نومىردە ءتۇرلى دىبىستالدى. وعان كاسىبي ديريجەرلەر – قازاقستاننىڭ ەڭبەك سىڭىرگەن قايراتكەرى ابزال مۇحيتدين, دجۋزەپپە اكۋاۆيۆا (يتاليا), رۋسلان بايمۋرزين جەتەكشىلىك ەتتى. ال باس حورمەيستەر – قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆ.
ايگۇل نيازوۆا مەن سايان ءيسيننىڭ ورىنداۋىنداعى م.تولەباەۆتىڭ ء«بىرجان – سارا» وپەراسىنان ايتىس پەن مەرەكە بي كەشتىڭ شىمىلدىعىن اشتى, ۇلتتىق نومىرلەر باتىس ەۋروپالىق كلاسسيكامەن الماستى – س.مۇحامەدجانوۆتىڭ «ايسۇلۋ» وپەراسىنان سەركەنىڭ كاۆاتيناسى, دج.ءپۋچچينيدىڭ «توسكا» وپەراسىنان كورىنىس, «تۋراندوت» وپەراسىنان كالافتىڭ ارياسى جانە تاعى باسقا كوپتەگەن كومپوزيتسيالار ورىندالدى. سونداي-اق مارياندجەلا سيتسيليا, ريككاردو دەللا شۋككا, ماتتيا روسسي (يتاليا), بادرال چۋلۋنبااتار (موڭعوليا), باۋىرجان اندەرجانوۆ, مەدەت چوتاباەۆ, جۇپار عابدۋللينا, تالعات مۇساباەۆ, سالتانات احمەتوۆا, ازامات جىلتىركوزوۆ, الفيا كاريموۆا, بولات ەسىمحانوۆ, شىڭعىس راسىلحان, راسۋل جارماعامبەتوۆ جانە ت.ب. وپەرا ساحناسىنىڭ تانىمال ەسىمدەرى ونەر كورسەتتى.
«مۇنداي ماڭىزدى كونتسەرتتىڭ قاتىسۋشىسى بولعانىما قۋانىشتىمىن. نۇر-سۇلتاندا العاش رەت ونەر كورسەتۋ مۇمكىندىگى تۋدى, وسى شاھاردىڭ, وسىنداي كەرەمەت تەاتردىڭ تاماشا ەنەرگەتيكاسىن سەزىندىم. بۇگىن ءوزىم ءۇشىن قاشان دا ماڭىزدى بولعان ءارى ماڭىزدى بولىپ قالا بەرەتىن ەكى اريانى – ش.گۋنونىڭ «رومەو مەن دجۋلەتتا» وپەراسىنان دجۋلەتتانىڭ ارياسىن جانە دج.ۆەرديدىڭ «تراۆياتا» وپەراسىنان ۆيولەتتانىڭ ارياسىن ورىندادىم. مەنىمەن بىرگە ساحنا تورىندە «استانا وپەرا» حالىقارالىق وپەرا اكادەمياسىنىڭ ءبىر بولىگى سانالاتىن انشىلەر, وقىتۋشىلار ونەر كورسەتتى, ولاردىڭ ورىنداۋشىلىعىنا, دىبىستالۋىنا ءتانتى بولدىم. جاس دارىنداردى وسىنداي جوعارى دەڭگەيدە ۇيلەستىرىلگەن اكادەميادا وقۋعا تارتۋ وتە ماڭىزدى دەپ ەسەپتەيمىن», دەپ اتاپ ءوتتى مارياندجەلا سيتسيليا.
ال ريككاردو دەللا شۋككا: «جاس انشىلەردىڭ دامۋى مەن ءوز تاجىريبەسىنىڭ اۋقىمىن كەڭەيتۋگە مۇمكىندىك بەرۋدىڭ پايداسى زور دەپ بىلەمىن. لا سكالا تەاترىنىڭ اكادەمياسى ماعان وسى مۇمكىندىكتى بەردى, الەمدەگى بارلىق جاس انشىلەرگە, ونىڭ ىشىندە جاڭا Astana Opera حالىقارالىق اكادەمياسىنىڭ ۆوكاليستەرىنە وسىنداي تاجىريبەدەن وتۋگە كەڭەس بەرەمىن», دەدى.
سالتاناتتى كەشكە مادەنيەت جانە سپورت ءمينيسترى اقتوتى رايىمقۇلوۆا, تەاتر قايراتكەرلەرى, مۋزىكالىق سىنشىلار مەن باسقا دا مادەنيەت, قوعام قايراتكەرلەرى قاتىستى.
ەسكە سالا كەتەيىك, Astana Opera حالىقارالىق وپەرا اكادەمياسى ۆوكاليستەرمەن ءوز جۇمىسىن كۇزدە باستايدى.
