مەملەكەتتىك حاتشى اتاپ وتكەندەي, «بولاشاق» باعدارلاماسى – بۇل تاۋەلسىز قازاقستاننىڭ ادامي كاپيتالدى دامىتۋعا جانە ۇلتتىڭ باسەكەگە قابىلەتتىلىگىن ارتتىرۋعا باعىتتالعان سەرپىندى جوباسى. شەتەلدە وقۋ جانە تاعىلىمدامالاردان ءوتۋدىڭ ارقاسىندا 11 مىڭنان استام قازاقستاندىق وزدەرىنىڭ كاسىبي ءبىلىمى مەن بىلىكتىلىگىن ارتتىرۋعا مۇمكىندىك الدى. پاندەميانىڭ سالدارىنان تۋىنداعان قيىندىقتارعا قاراماستان, ءبىز الەمدەگى ەڭ مىقتى ۋنيۆەرسيتەتتەردە, عىلىمي ورتالىقتاردا قىزمەتكەرلەر مەن مامانداردى وقىتۋدى جالعاستىرا بەرەمىز.
كوميسسيا شەشىمىمەن «بولاشاق» حالىقارالىق ستيپەندياسى ماگيستراتۋرا مەن دوكتورانتۋرادا وقيتىن, سونداي-اق, الەمنىڭ جەتەكشى عىلىمي جانە وندىرىستىك ورتالىقتارىنا تاعىلىمدامادان وتۋگە جىبەرىلەتىن 113 ۇمىتكەرگە بەرىلدى.
كوميسسيا وتىرىسىندا «بولاشاق» باعدارلاماسى شەڭبەرىندە تاعىلىمدامادان ءوتۋ ءۇشىن جاڭا سانات بەكىتىلدى. سوعان سايكەس ەندى مادەنيەت جانە سپورت سالاسىنىڭ قىزمەتكەرلەرى دە اتالعان باعدارلاما بويىنشا ءبىلىم الا الادى.
قازىرگى ۋاقىتتا 612 ستيپەنديات «بولاشاق» باعدارلاماسى شەڭبەرىندە ءبىلىم الۋدا. ونىڭ 551-ءى الەمنىڭ 19 ەلىندە وقىپ جاتسا, 61-ءى قازاقستان اۋماعىندا ءجۇرىپ, قاشىقتان ءبىلىم الۋدا. سونىمەن قاتار, 421 ستيپەنديات اكادەميالىق وقۋعا, تاعىلىمدامادان وتۋگە جولداما كۇتىپ وتىر.
وتىرىس قورىتىندىسى بويىنشا مەملەكەتتىك حاتشى «بولاشاق» حالىقارالىق ستيپەندياسىن ودان ءارى ىسكە اسىرۋ, ونىڭ ىشىندە, ۇمىتكەرلەردى ىرىكتەۋ قاعيدالارىن جەتىلدىرۋ, وتاندىق عالىمداردىڭ جەتەكشى عىلىمي-زەرتتەۋ ينستيتۋتتار مەن عىلىمي ۇيىمداردا تاعىلىمدامادان ءوتۋىن ۇيىمداستىرۋ جونىندە بىرقاتار تاپسىرما بەردى.
