«دومالاق انا» – تاۋەلسىز قازاقستان جىلدارىندا جازىلعان ەكىنشى وپەرا. جاڭا قويىلىم ەلدە العاش رەت ساحنالانىپ وتىر, ەكى اكتىلى, 160 ءارتىس ءرول سومداعان. وپەرانىڭ كومپوزيتورى – قر مادەنيەت سالاسىنىڭ ۇزدىگى, حالىقارالىق بايقاۋلاردىڭ لاۋرەاتى تاسقىن جارمۇقامەت. ليبرەتتوسىن جازعان قازاقستاننىڭ ەڭبەك سىڭىرگەن قايراتكەرى, رەجيسسەر اسحات ماەميروۆ. يدەيا اۆتورى – قازاقستاننىڭ ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى مايرا مۇحامەدقىزى. قويۋشى-رەجيسسەر – رەسەيلىك «ۇلكەن تەاتر» رەجيسسەرلىك توبىنىڭ مەڭگەرۋشىسى, رەسەي جانە الەم وپەرا تەاترلارىنىڭ وپەرا قويۋشىسى ميحايل پاندجاۆيدزە.
قويىلىمدا قازاق تاريحىنداعى اتى اڭىزعا اينالعان ابىز انانىڭ وزىنە ءتان قاسيەتتى بەينەسى تەرەڭدىكپەن جەتكىزىلگەن. جاس قىز نۋريلانىڭ انا اتانىپ, وسيەت پەن رۋحاني قۇندىلىقتارعا جانە انالىق مەيرىمگە تولى عۇمىرى ارقىلى انا ماحابباتى سۋرەتتەلگەن. ەندى «دومالاق انا» وپەراسى الداعى ۋاقىتتا الەمدىك ساحنالاردا قويىلماق.
سونىمەن بىرگە, تەاتردىڭ 13 ماۋسىمى ۇلى ابايدىڭ 175 جىلدىعىنا وراي «اباي ارمانى» اتتى كونتسەرتتىك كەشپەن اشىلدى. جىل بويىنا 1 پرەمەرا 12 قويىلىم ساحنالاندى. ال جابىلۋ ماۋسىمىن «تەاتر جاۋھارلارى» اتتى گالا-كونتسەرتپەن اياقتادى.
