ەندى كوپبالالى نەمەسە تولىق ەمەس وتباسىلاردان شىققان بالالار, سونداي-اق ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلارداعى تالاپكەرلەردىڭ گرانت الۋ مۇمكىندىگى جوعارىلاي ءتۇستى.
ء«بىلىم جانە عىلىم مينيسترلىگى پرەزيدەنتتىڭ تاپسىرماسى بويىنشا حالىقتىڭ الەۋمەتتىك وسال توپتارىنان شىققان بالالاردىڭ مەملەكەت ەسەبىنەن ءبىلىم الۋىنا مۇمكىندىكتىڭ كوبىرەك بولۋى ءۇشىن جۇمىس جۇرگىزدى. كامەلەتكە تولماعان ءتورت جانە ودان كوپ بالا تاربيەلەپ وتىرعان وتباسىلارداعى بالالار ءۇشىن گرانتتاردىڭ جالپى سانىنىڭ 5%-ى, كەمىندە ءۇش جىل تولىق ەمەس وتباسى مارتەبەسى بار وتباسىلاردان شىققان بالالارعا – 1%, ءى, ءىى توپتاعى مۇگەدەك بالالاردى تاربيەلەپ وتىرعان وتباسىلاردان شىققان تۇلەكتەرگە ءبىلىم بەرۋ گرانتتارىنىڭ 1%-ى كوزدەلگەن. بۇل رەتتە ولاردىڭ ۇبت ناتيجەلەرى شەكتى بالعا سايكەس كەلۋى ءتيىس», دەپ حابارلادى ءبىلىم جانە عىلىم ۆيتسە-ءمينيسترى قۋانىش ەرعاليەۆ.
سونىمەن قاتار كۆوتا شەڭبەرىندەگى گرانتتار جەتىم بالالار مەن ەتنيكالىق دياسپورا وكىلدەرى ءۇشىن دە بولىنگەن.
وسىلايشا, ازاماتتاردىڭ الەۋمەتتىك وسال ساناتتارىنداعى تالاپكەرلەر ءبىلىم بەرۋ گرانتتارىن بەرۋ كەزىندە باسىمدىققا يە بولادى. ماسەلەن, ەگەر پەداگوگيكا ماماندىقتارىنا 8 مىڭعا جۋىق ءبىلىم گرانتى بولىنسە, ونىڭ ىشىندە 1 063 گرانت حالىقتىڭ الەۋمەتتىك وسال توپتارىنداعى ازاماتتار ءۇشىن كوزدەلگەن.
ۇلتتىق قوعامدىق سەنىم كەڭەسىنىڭ ءۇشىنشى وتىرىسىندا قر پرەزيدەنتى قاسىم-جومارت توقاەۆ مەملەكەتتىك ءبىلىم گرانتتارىن ءبولۋ جۇيەسىندە اۋقىمدى الەۋمەتتىك قۇرامدى قاراستىرۋ كەرەكتىگىن جانە تالاپكەردىڭ اكادەميالىق جەتىستىكتەرىنە عانا ەمەس, سونداي-اق ونىڭ الەۋمەتتىك-ەكونوميكالىق مارتەبەسىنە دە نازار اۋدارۋدى تاپسىرعانىن ايتا كەتكەن ءجون.
