وسى كۇنگە دەيىن جامان ىندەت شىققان ادامدار سانى تاۋلىگىنە 10 ادامنىڭ شەگىندە بولسا, سوڭعى كۇنى 27-گە جەتتى. ونىڭ 19-دا اۋرۋ بەلگىلەرى بولىپ, 8-دە بەلگىلەرى بولماعان. ايماقتىق كوممۋنيكاتسيالار قىزمەتىندە بولعان بريفينگتە بۇل تۋرالى وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى اسەت جۇماتاەۆ پەن وبلىستىق دەنساۋلىق ساقتاۋ باسقارماسى باستىعىنىڭ مىندەتىن اتقارۋشى نۇرلان ايمانوۆ ءمالىم ەتتى.
ىندەت جۇقتىرعان 27 ادامنىڭ 11-ءى پەتروپاۆل قالاسىنان, قىزىلجار مەن ايىرتاۋ اۋداندارىنان 4-تەن, قالعاندارى تايىنشا, ع.مۇسىرەپوۆ, ءۋاليحانوۆ جانە ەسىل اۋداندارىنان شىققان. وسىنداي جاعدايدان كەيىن وڭىردەگى ەپيدەميالىق
احۋال تۇراقسىز دەپ باعالانىپ وتىر.
ىندەت تارالىمىنىڭ ءوسۋى رەسپۋبليكا اۋماعىنداعى «دەلتا» شتامىنىڭ اينالىمىنا, سونداي-اق حالىقتىڭ كارانتيندىك شارالاردى ساقتاۋ جونىندەگى ءتارتىبىنىڭ تومەندەۋىنە بايلانىستى بولىپ وتىر. كۆي ناۋقاستارىنان الىنعان وڭ زەرتحانالىق ۇلگىلەردىڭ پتر سكرينينگىنىڭ ناتيجەلەرى بويىنشا 4 ۇلگىدەگى «دەلتا» شتامىنا ءتان مۋتاتسيا ىقتيمالدىعى انىقتالدى.
بۇگىنگى جامان ىندەتتىڭ ەرەكشەلىكتەرى قاتارىندا كلينيكالىق سيمپتوماتيكانىڭ ەرتە مانيفەستاتسياسىن, ينكۋباتسيالىق كەزەڭنىڭ 5 كۇنگە دەيىن قىسقارتىلۋىن ايتۋعا بولادى. سونىمەن قاتار قازىر اۋرۋدىڭ پنەۆمونيادان تىس تۇرلەرىنىڭ جيىلەۋى جانە كەيبىر جاعدايدا ىشەك سيمپتومدارى باسىم بولىپ كەلەدى. وكپەنىڭ زاقىمدانۋ ايماعىنىڭ ۇلعايۋىمەن اۋرۋدىڭ تەز دامۋى جانە جاس ادامداردىڭ ۇلەس سالماعىنىڭ ارتۋى دا كوزگە تۇسەدى. سونداي-اق بالالار مەن جۇكتى ايەلدەردىڭ سىرقاتتانۋى, جۇرەك-قانتامىر جۇيەسىنىڭ اسقىنۋلارى ءجيى كەزدەسەدى.
قالىپتاسقان احۋالعا وراي 5 شىلدەدەن باستاپ مىناداي شەكتەۋلەر ەنگىزىلەدى: بىرىنشىدەن, جابىق ءۇي-جايلارداعى بيليارد, بوۋلينگ, بالالاردىڭ ويىن الاڭدارى مەن اتتراكتسيونداردىڭ, باتۋتتاردىڭ, بانكەت زالدارىنىڭ, كومپيۋتەرلىك كلۋبتاردىڭ, اكۆاپاركتىڭ قىزمەتى توقتاتىلا تۇرادى; ەكىنشىدەن, ەسكە الۋدى وتكىزۋگە تىيىم سالىنادى; ۇشىنشىدەن, ءدىني نىسانداردا, جابىق ءۇي-جايلاردا ۇجىمدىق ءىس-شارالار وتكىزۋگە تىيىم سالىنادى. مەشىتتەر, پراۆوسلاۆ شىركەۋلەرى جانە باسقا ءدىني وبەكتىلەر اۋماعىندا اشىق اۋادا بەتپەردە رەجىمىن جانە ءبىر ادامعا كەمىندە 4 مەتر ەسەبىنەن الەۋمەتتىك قاشىقتىقتى ساقتاپ وتىرۋ; تورتىنشىدەن, 30 ادامنان اسپايتىن جەكە, توپتىق دايىندىقتار ءۇشىن مادەنيەت وبەكتىلەرىنىڭ قىزمەتى شەكتەلەدى; بەسىنشىدەن, مەكتەپكە دەيىنگى بالالار ۇيىمدارىندا تەك كەزەكشى توپتاردىڭ (25 ادامنان اسپايتىن) جۇمىسىنا, بالالاردىڭ تۇزەتۋ كابينەتتەرىنىڭ, بالالاردىڭ جانە ەرەسەكتەردىڭ ءبىلىم بەرۋ ورتالىقتارىنىڭ جۇمىسىنا الدىن الا جازىلۋ بويىنشا توپتى تولتىرۋ كەزىندە 15 ادامنان اسپايتىن رۇقسات ەتىلەدى جانە ت.ب.
قازىر وبلىستا 129 212 ادام ۆاكتسينانىڭ ءبىرىنشى كومپونەنتىنە ەگىلدى, بۇل بارلىق حالىقتى 41,5%-عا قامتيدى, ال ەكىنشى كومپونەنتپەن 72 613 ادام ەگىلگەن. ۆاكتسينا سالدىرعانداردىڭ اراسىندا مەديتسينا قىزمەتكەرلەرى 99,9%, پەداگوگتەر 69%, پوليتسەيلەر 97,3%, مەملەكەتتىك قىزمەتكەرلەر 70%, ونەركاسىپ كاسىپورىندارىنىڭ قىزمەتكەرلەرى, ونىڭ ىشىندە ۆاحتالىق ادىسپەن جۇمىس ىستەيتىندەر 99,9%, ستۋدەنتتەر 73% بولىپ وتىر.
سولتۇستىك قازاقستان وبلىسى
