پارتيا بەدەلى – ىسكەرلىك پەن ىزدەنىستە

“نۇر وتان” حدپ ماڭعىستاۋ وبلىستىق ۇيىمىنىڭ كەزەكتى ءحى كونفەرەنتسياسىندا وبلىس اكىمى, پارتيانىڭ وبلىستىق فيليالىنىڭ توراعاسى قىرىمبەك كوشەرباەۆ “وبلىستىق ۇيىمنىڭ 2008-2009 جىلدارداعى جۇمىس قورىتىندىلارى جانە الداعى مىندەتتەر تۋرالى” بايانداما جاسادى. وبلىس پارتيا ۇيىمى ەل دامۋىنا ەرەكشە سەرپىن بەرىپ, ماڭىزدى مىندەتتەر جۇكتەيتىن ەلباسىمىز نۇرسۇلتان نازارباەۆتىڭ “جاڭا ونجىلدىق – جاڭا ەكونو­ميكالىق ورلەۋ – قازاقستاننىڭ جاڭا مۇمكىندىكتەرى” اتتى جولداۋىن ىسكە اسىرۋعا حالىقتىڭ بارلىق توپتارىن جۇمىلدىرۋعا ايرىقشا ماڭىز بەرۋدە.  ستراتەگيادا كور­سەتىلگەن مىندەتتەرگە وراي وڭىرلىك ءىس-قيمىل جوسپارىمىزدا بەلگىلەنگەن ءاربىر نىساننىڭ يندۋستريالىق-يننوۆاتسيالىق, ينۆەستيتسيالىق جوبالاردىڭ ىسكە اسۋىنا ءاربىر ادامنىڭ بەلسەندىلىگى مەن كۇش-ءجى­گەرىن جۇمىلدىرۋ باستى ماق­ساتىمىز, – دەيدى ق.كوشەرباەۆ ءوز سوزىندە. شىندىعىندا دا بۇل كۇندەرى ءوز قاتارىنا 25 مىڭعا جۋىق پارتيا مۇشەلەرىن بىرىكتىرىپ وتىرعان 273 باستاۋىش پارتيا ۇيىمى الەۋەتتى كۇشىمىزدى ابىرويلى ورتاق ىسكە, وڭىرىمىزدە ۇيىعان ىنتىماق بولىپ, تاتۋلىق پەن دوستىقتىڭ تامىرى تەرەڭدەي, ەل ەڭسەسى كوتەرىلە ءتۇسۋى جولىندا جۇمىس جاساپ كەلەدى. ايماعىمىزداعى يگىلىكتى ءىس-شارالار­دىڭ بارلىعىنا دەرلىك نۇروتاندىق­تار  بەلسەنە ارالاسادى. بىرقاتار وزەكتى ماسەلەلەر ولاردىڭ تىكەلەي باستاماسىمەن, قاجەتتى جەرىندە تاباندى تۇردە تالاپ ەتىلۋى ناتيجە­سىندە جۇزەگە اسىرىلىپ جاتاتىن­دىعى كوڭىلگە قۋانىش ۇيالاتادى. وتكەن جىلى ماسليحاتتارداعى “نۇر وتان” فراكتسيالارىمەن, ءماسليحات دەپۋتاتتارىمەن بىرلەسە وتىرىپ, بولىنگەن قارجىلاردىڭ ءتيىمدى جۇمسالۋىنا, بەرىلگەن تاپسىرما­لاردىڭ ورىندالۋىنا پارتيالىق باقىلاۋ جولعا قويىلىپتى. وسى رەتتە اۋماقتىق فيليالدار­دا 57 پارتيالىق باقىلاۋ پوستىلارى قۇرىلىپ, ولاردىڭ باقىلاۋىندا بولعان نىسانداردىڭ 97 پايىزىن­داعى جۇمىستار تولىقتاي ساپالى اياقتالعان. سونداي-اق سىبايلاس جەمقورلىققا قارسى كۇرەستى ءتيىمدى, جۇيەلى جۇرگىزۋ جولىندا قوعامدىق ۇيىمدارمەن, بۇقارالىق اقپارات قۇرالدارىمەن بىرلەسە جۇمىس ءجۇرىپ, مەكەمە, كاسىپورىن كەڭسەلەرىندە “سەنىم تەلەفوندارى” ورناتىلىپتى. كونفەرەنتسيا دەلەگاتتارى ۇيىم­نىڭ ساياسي كەڭەسىن قۇرىپ, وبلىستىق فيليالدىڭ توراعالىعىنا وبلىس اكىمى ق.كوشەرباەۆتى سايلادى. ءتور­اعانىڭ ءبىرىنشى ورىنباسارلىعىنا ج.قاراەۆ تاعايىندالدى. جولامان بوشالاق, اقتاۋ.