الماتىدا ورتا ءبىلىمنىڭ قولجەتىمدىلىگىن قامتاماسىز ەتۋ ءۇشىن مەملەكەتتىك جانە جەكەمەنشىك مەكتەپتەردىڭ قۇرىلىسى جۇرگىزىلىپ جاتىر. سونداي-اق جۇمىس ىستەپ تۇرعان ءبىلىم بەرۋ نىساندارىنا جاڭا كورپۋستار سالىنىپ, بىرنەشە مەكەمەدە سەيسميكالىق شارالار كۇشەيتىلدى. بۇل جىل سوڭىنا دەيىن 21 مىڭنان استام جاڭا وقۋشى ورنىن اشۋعا مۇمكىندىك بەرەدى.
استانا كۇنىنە وراي بوستاندىق اۋدانى وربيتا-1 ىقشاماۋدانىندا 600 ورىندى №60 گيمنازيا عيماراتىنىڭ جاڭا كورپۋسى اشىلدى. گيمنازيانىڭ جوبالىق قۋاتى 1700 وقۋشىنى سىيدىرا الادى.
گيمنازيادا كەڭەيتۋدىڭ ارقاسىندا قوسىمشا كابينەتتەر پايدا بولدى جانە ەكى اۋىسىمدى وقىتۋ ماسەلەسى شەشىلەدى.
الاتاۋ اۋدانىندا جۇمىس ىستەپ تۇرعان №166 ليتسەي عيماراتىنا 125 ورىندى جاڭا قوسىمشا قۇرىلىس اشىلدى. جاڭا عيماراتقا دەيىن وقۋ ورنىندا 360 ورىن بولدى, قازىر 485 ورىندى قۇرايدى.
سونىمەن قاتار الماتى قالاسىندا استانا كۇنىنە وراي ەكى جەكەمەنشىك مەكتەپ اشىلدى. ولار, بوستاندىق اۋدانى باعاناشىل ىقشاماۋدانىندا 60 ورىندى «COSMO PRIMARY SHOOL» باستاۋىش مەكتەبى جانە قالانىڭ اۋەزوۆ اۋدانىندا 130 ورىندى «اۆس School» جەكە مەكتەبىنىڭ اشىلۋى ءوتتى.
الماتىدا قالا اكىمى باقىتجان ساعىنتاەۆتىڭ تاپسىرماسى بويىنشا بالاباقشاداعى ورىن تاپشىلىعىن تومەندەتۋ بويىنشا جۇيەلى جۇمىستار جۇرگىزىلۋدە.
استانا كۇنى قارساڭىندا الماتى قالاسى, ناۋرىزباي اۋدانى اقجار ىقشاماۋدانىندا مەملەكەتتىك تىلدە وقىتاتىن №194 بالاباقشا دا اشىلدى.
بالاباقشانىڭ جوبالىق قۋاتى 120 بالانى قۇرايدى. سونداي-اق 40 جاڭا جۇمىس ورنى قۇرىلدى.
الماتى قالاسى ناۋرىزباي اۋدانى تاۋسامالى ىقشاماۋدانىندا 40 جاڭا جۇمىس ورنىن قۇرۋمەن 120 بالاعا ەسەپتەلگەن №193 جاڭا مەملەكەتتىك بالاباقشا اشىلدى.
الماتى قالاسىندا مەكتەپكە دەيىنگى ءبىلىم بەرۋ عيماراتتارىن سالۋعا بوس جەر ۋچاسكەلەرىنىڭ جەتىسپەۋىنەن, اكىمدىك جالپى ءبىلىم بەرەتىن مەكتەپتەردىڭ اۋماقتارىندا جاڭا بالاباقشا سالۋ تۋرالى شەشىم قابىلدادى. بۇل بالاباقشالارداعى ورىن جەتىسپەۋشىلىگى ماسەلەسىن شەشۋگە, ءار بالاعا ءۇيدىڭ جانىنداعى مەكتەپكە بارۋعا ءارى دوستارىمەن سەرۋەندەۋگە مۇمكىندىك بەرەدى.
ناۋرىزباي اۋدانى تاۋسامالى ىقشاماۋدانىندا №186 مەن №187 جالپى ءبىلىم بەرەتىن مەكتەپتەردىڭ اۋماعىندا ارقايسىسى 120 ورىندى ەكى جاڭا بالاباقشا اشىلدى.
تۇركسىب اۋدانىندا مەملەكەتتىك ءبىلىم بەرۋ بويىنشا 68 بالاعا ارنالعان «ادەل»جەكە مەنشىك بالاباقشاسى اشىلدى.
ء«بىز جەكە مەنشىك بالاباقشادا بالالارعا ءبىلىم مەن تاربيە بەرۋگە مەملەكەتتىك قولداۋ الدىق. قازىر جاڭا وقۋ جىلىنا توپتار جينايمىز. بالالاردى ەكى جاستان باستاپ قابىلدايمىز. بۇل ورىس بالاباقشاسى, بىراق بالالارعا قازاق تىلىمەن اعىلشىن تىلدەرىن دە ۇيرەتەمىز. مەملەكەتتىك باعدارلامالاردان باسقا, ءبىلىم بەرۋ جوبالارى دا بار», دەدى بالاباقشا قۇرىلتايشىسى لاريسا لي.
الماتى قالاسى بوستاندىق اۋدانىندا دا «ALGABAS-3» جەكە مەنشىك بالاباقشاسى ەسىگىن اشتى.
بالاباقشانىڭ جوبالىق قۋاتى 160 بالانى قۇرايدى. سونداي-اق 35 جاڭا جۇمىس ورنى اشىلدى. اتالعان بالاباقشا مەملەكەتتىك تاپسىرىس بويىنشا جۇمىس ىستەۋدى جوسپارلادى.
2021 جىلدىڭ باسىنان بەرى الماتىدا 1,7 مىڭ ورىندى 30-عا جۋىق جەكەمەنشىك ۇيىمدارى اشىلدى. جىل سوڭىنا دەيىن تاعى دا 5 مىڭ ورىندى 35 جەكە بالاباقشا اشۋ جوسپارلانۋدا. مەملەكەتتىك تاپسىرىس 20 441 ورىنعا 397 مەكتەپكە دەيىنگى ۇيىمعا ورنالاستىرىلدى.
