ايماقتار • 06 شىلدە، 2021

الماتىدا استانا كۇنىنە وراي تەررەنكۋر اشىلدى

32 رەت كورسەتىلدى

الماتى تۇرعىندارىنا جايلى بولۋى ءۇشىن جاياۋ جۇرگىنشىلەر جولى قالپىنا كەلتىرىلىپ، 150 اعاش پەن 5 مىڭعا جۋىق بۇتا وتىرعىزىلدى، ناۆيگاتسيا، ورىندىق، سپورت جانە بالالار الاڭى ورناتىلدى، دەپ حابارلايدى Egemen.kz.

2020 جىلى كىشى الماتىنىڭ كەيبىر ۋچاسكەلەرىن قايتا قۇرۋ جۇمىستارى باستالعان ەدى. بارلىق جۇمىستار ۇزىندىعى 8،9 كم ۋچاسكەدە، سۋ بولگىشتەن دوستىق داڭعىلىنا دەيىن، گيدروتەحنيكالىق قۇرىلىستى قوسا العاندا ماقاتاەۆ كوشەسىنە دەيىن جۇرگىزىلدى.

تەررەنكۋردا قولدان جاسالعان كوپىرلەر بولشەكتەلىپ، جاياۋ جۇرگىنشىلەر جولى سالىندى. گابيون قۇرىلىمى جوندەلدى. ولار ارنانىڭ جەكەلەگەن ۋچاسكەلەرىندە سۋدىڭ كەدەرگىسىز ءوتۋىن قامتاماسىز ەتەتىن زاماناۋي ۋچاسكەلەرگە اۋىستىرىلدى.

سونىمەن قاتار جول بويىنا ورىندىقتار، كۇن توسەنىشتەرى مەن گۇلزارلار ورناتىلدى. سونداي-اق ءال-فارابي داڭعىلىنىڭ استىنداعى تۋننەل اباتتاندىرىلىپ، ساتپاەۆ كوشەسىنەن تومەن گيدروتەحنيكالىق قۇرىلىستىڭ جانىنداعى ۋچاسكە قالپىنا كەلتىرىلدى. ال وقۋشىلار سارايى عيماراتىنىڭ ارتىنا باقىلاۋ الاڭى ورناتىلدى. بارلىق ورىندار اعاشتان جاسالىندى.

تەررەنكۋردا 5 مىڭعا جۋىق بۇتا وتىرعىزىلىپ،  جاسىل قور قالپىنا كەلدى. ولار بەتكەيلەردى نىعايتادى ءارى جاعالاۋلاردىڭ قۇلاۋىنا جول بەرمەيدى.

مەدەۋ اۋدانى سامال-1 ىقشاماۋدانىنىڭ تۇرعىنى ۇلجان حاتتانوۆا اتالعان جەردەگى سەرۋەندەۋ ايماعىن اباتتاندىرعانى ءۇشىن قالا اكىمدىگىنە العىسىن ءبىلدىردى.

«ماعان تەررەنكۋر اۋدانى وتە ۇنايدى. ءبىز مۇندا قىزدار، بالالارمەن ءجيى كەلەمىز. جوندەۋ جۇمىستارى ساپالى. بۇل ءبىزدىڭ قالا ءۇشىن ۇلكەن جەتىستىك. بۇل جەردە جازدا دەمالعان جاقسى. وسىنداي دەمالىس ايماعىن جاساعانى ءۇشىن تاعى دا العىسىمدى بىلدىرەمىن»، دەدى ۇ. حاتتانوۆا.

قالا تۇرعىندارىنىڭ ۇسىنىسى بويىنشا اۆتوتۇراقتىڭ ورنىنا سپورت پەن بالالار الاڭى سالىنىپ، سانيتارلىق توراپتار ورناتىلدى.

بارلىق شەشىم جەرگىلىكتى تۇرعىندار مەن قوعام قايراتكەرلەرىمەن تالقىلاندى.

سوڭعى جاڭالىقتار

ۇقساس جاڭالىقتار