تەاتر ديرەكتورىنىڭ ورىنباسارى نۇرگۇل قۇمارقىزىنىڭ ايتۋىنشا, تۇركيانىڭ انتاليا قالاسىندا وتكەن ءحى حالىقارالىق تەاتر فەستيۆالىنە الەمنىڭ ءار ەلىنەن 24 ونەر ۇجىمى قاتىسىپتى. سونىڭ ءبىرى – ماحامبەت اتىنداعى اكادەميالىق قازاق دراما تەاترى. اتىراۋلىق ارتىستەر فەستيۆالگە قازاقتىڭ كورنەكتى جازۋشىسى, دراماتۋرگ راحىمجان وتارباەۆتىڭ «جالعىزدىق» دراماسىن ۇسىندى. رەجيسسەرى – مۇقانعالي تومانوۆ.
بۇل قويىلىمنىڭ باستى كەيىپكەرى – بالا كۇنىندە اناسىن جوعالتقان ەر ادام. ەسەيگەن شاعىندا دا اياۋلى اناسىنىڭ ايالى الاقانىن, اق جاۋلىقتى بەينەسىن ساعىنادى. توقسان مينۋتتىق سپەكتاكلدە بالا جۇرەگىنىڭ تۇكپىرىندە ساقتالعان اناعا دەگەن ساعىنىش پەن اڭساۋدىڭ مۇڭى شەرتىلەدى. وسىنىڭ ءبارى تەاتر ارتىستەرى بەكەت زينۋللين مەن گۇلدەن كوشەرباەۆانىڭ باستى رولدەردى سومداۋداعى شەبەرلىگىنەن بايقالىپ تۇردى.
– حالىقارالىق فەستيۆال اياسىندا ونەر كورسەتكەن تەاترلارعا ارنايى جۇلدەلى ورىندار بەرىلگەن جوق. بىراق دراماتۋرگتەر مەن رەجيسسەرلەر 24 ونەر ۇجىمىنىڭ اراسىنان ءتورت تەاتردىڭ ساحنالىق قويىلىمىن ۇزدىك دەپ تانىدى. بۇلار – انكارادان, انتاليا مەن يسپانيادان قاتىسقان ونەر ۇجىمدارىمەن بىرگە ماحامبەت اتىنداعى اكادەميالىق قازاق دراما تەاترى. ونىڭ ىشىندە ءبىزدىڭ تەاتردىڭ ارتىستەرى ساحنالاعان «جالعىزدىق» قويىلىمى «ەڭ ۇزدىك سپەكتاكل» اتالىمىن يەلەندى, – دەيدى نۇرگۇل قۇمارقىزى.
اتىراۋ وبلىسى
