وبلىستىق جۇقپالى اۋرۋلار اۋرۋحاناسىنىڭ باس دارىگەرى اينا مۇحامبەتوۆانىڭ ايتۋىنشا, ەمدەۋ ورنىندا 120 ناۋقاس قاتەرلى ىندەتكە قارسى ەم قابىلداۋدا. ونىڭ 8-ءى جان ساقتاۋ بولىمىندە جاتىر. ال 120 ناۋقاستىڭ 11-ءى بالا, ونىڭ 5-ءى ءبىر جاسقا تولماعان سابيلەر. وتباسىمەن بىرگە اۋرۋحاناعا جاتقىزىلعان ناۋقاستار دا بار.
«وڭىردە جاقىندا ءۇندىستاندا كوپ كەزدەسىپ جاتقان «دەلتا» شتامى تىركەلدى. بۇل ناۋقاستاردا وكپە اۋرۋلارىنا ءتان ەمەس وزگە دە كلينيكالىق بەلگىلەر بار. جاز ايى بولعان سوڭ, ۋلانۋ, ۇشىنۋ دەرەكتەرىنە نەمقۇرايلى قاراماۋ قاجەت. جەدەل ىشەك اۋرۋى سەكىلدى لوقسۋ, جۇرەك اينۋ, ءىش ءوتۋ, بۋىنداردىڭ اۋرۋى, دەنە قىزۋىنىڭ تۇسپەۋى, سۇيەكتەردىڭ سىرقىراۋى ءتارىزدى كلينيكالىق بەلگىلەر انىقتالسا, جەدەل مەديتسينالىق كومەككە جۇگىنۋ قاجەت. سەبەبى, «دەلتا» شتامم ۆيرۋسىنىڭ جۇعۋ جىلدامدىعى جوعارى. كلينيكالىق بەلگىسى 3-5 كۇندە انىقتالۋدا.
اۋرۋحاناعا تۇسكەن ناۋقاستاردا العاشقى كۇندەرى وكپەسى تازا, قىزۋى, دەمىكپە جوق. دەسە دە 2-3 كۇندە ەنتىگۋ پايدا بولىپ, تىنىس الۋى قيىندايدى. سوندىقتان ولار جەدەل تۇردە جان ساقتاۋ بولىمىنە جاتقىزىلۋدا. ايتا كەتۋ كەرەك, بىلتىرعى جىلى اۋرۋدىڭ جاسى 60-65 جاستان جوعارى بولسا, بيىل ول جاسارىپ كەلەدى. 40-60 جاس اراسىندا, ءتىپتى بالالار دا ۆيرۋس جۇقتىرعان», دەيدى ا. مۇحامبەتوۆا.
ونىڭ ايتۋىنشا, اۋرۋ بەلگىسى ەڭ الدىمەن جۇرەككە اسەر ەتەدى. قانت ديابەتى, قان قىسىمى بار جانداردا وتە اۋىر جاعدايدا وتۋدە.
