قازىر «قىزىل» ايماقتا: نۇر-سۇلتان, الماتى, شىمكەنت قالالارى, اقمولا, اتىراۋ, باتىس قازاقستان, قاراعاندى, ماڭعىستاۋ جانە پاۆلودار وبلىستارى تۇر. «سارى» ايماققا: الماتى, اقتوبە, جامبىل, قوستاناي, قىزىلوردا جانە سولتۇستىك قازاقستان وبلىستارى.
«جاسىل» ايماقتا: تۇركىستان جانە شىعىس قازاقستان وبلىستارى كىردى. ياعني ءبىر كۇننىڭ بىردەن ءۇش ءوڭىر «سارى» ايماققا ەنگەن. ونىڭ ۇستىنە كوروناۆيرۋستى جۇقتىرۋدىڭ تاۋلىكتىك كورسەتكىشى ءبىر اپتا قاتارىنان ءوسىپ كۇنىنە 3 مىڭ ادامنان استى. وتكەن اپتانىڭ اياعىندا دەنساۋلىق ساقتاۋ مينيسترلىگى ەندىگى دەلتا-شتام ەلدىڭ بارىق وڭىرلەرنە تاراپ ۇلگەردى دەگەن بولجام ايتقان بولاتىن.
1 شىلدەدە دەلتا-شتامدى انىقتاۋ ءۇشىن 414 سىنامانىڭ پتر سكرينينگى وتكىزىلىپ, ۆيرۋس مۋتاتسياسىنىڭ بارلىق وبلىستار مەن نۇر-سۇلتان, الماتى, شىمكەنت قالالارىنا جەتكەنى انىقتالعان. مامانداردىڭ بۇل بولجامى تۇپكىلىكتى راستالۋى ءۇشىن ۇلگىلەردىڭ دنق مالىمەتتەرى تولىق گەنومدىق رەتتەلگەننەن كەيىن بەلگىلى بولادى. 2 شىلدە كۇنى قر پرەمەر-ءمينيسترىنىڭ ورىنباسارى ەرالى توعجانوۆتىڭ توراعالىعىمەن قر اۋماعىندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ (ۆاك) وتىرىسى ءوتتى.
ەپيداحۋالدىڭ ۋشىعۋىنا بايلانىستى ۆيتسە-پرەمەر وبلىس اكىمدىكتەرىنە «سارى» ايماقتا ورنالاسقان وڭىرلەردە كۇشەيتىلگەن شەكتەۋ شارالارىن قابىلداۋدى تاپسىردى. جاعدايدى ودان ءارى ۋشىقتىرماۋ ءۇشىن وڭىرلەر كارانتيندىك شەكتەۋلەردى بىرىنەن كەيىن ءبىرى كۇشەيتىپ جاتىر.
مىسالى, اقمولا وبلىسىندا كارانتين 3 شىلدەدەن باستاپ كۇشەيتىلدى. «كوپشىلىك ءىس-شارالار (مەرەكەلىك, كوپشىلىك سپورت, ويىن-ساۋىق مادەني-كوپشىلىك ءىس-شارالاردى, فورۋم, كونفەرەنتسيا جانە ت.ب. وتكىزۋگە), وتباسىلىق ءىس-شارالار (بانكەت, ۇيلەنۋ تويى, مەرەيتوي, مەرەكەلىك كورپوراتيۆ, دۇعا) جانە كوپشىلىك جينالاتىن وزگە دە ءىس-شارالاردى, ونىڭ ىشىندە ۇيدە وتكىزۋگە تىيىم سالىنادى.
ويىن-ساۋىق مەكەمەلەرى (تۇنگى, ويىن كلۋبتار جانە باسقا دا), بۋكمەكەر كەڭسەلەرىنىڭ جانە ەرەسەكتەر مەن بالالارعا ارنالعان وزگە دە ويىن-ساۋىق, كاليان ورىندارىنىڭ (ونىڭ ىشىندە قوعامدىق تاماقتانۋ وبەكتىلەرىندەگى) قىزمەتىنە تىيىم سالىنادى. مەرەكەلىك كورپوراتيۆتەردى ۇيىمداستىرۋ مەن وتكىزۋگە, كورمە وتكىزۋگە, (اشىق اۋادا) مارافون وتكىزۋگە, «Ashyq» جوباسىنا قاتىساتىن بانكەت زالدارىندا 30 ادامنان اسىرماي, اس بەرۋدى قوسپاعاندا, اس بەرۋگە تىيىم سالىنادى», دەلىنگەن ءوڭىردىڭ باس سانيتار دارىگەرىنىڭ قاۋلىسىندا.
ماڭعىستاۋ وبلىسىندا دا 3 ماۋسىمدا كارانتين قاتاڭداتىلدى. مەيرامحانا, ءدامحانالار تاڭەرتەڭگى ساعات 9:00-دەن كەشكى 20:00-گە دەيىن, اسحانا تيپتەس قوعامدىق تاماقتانۋ ورىندارى 24:00-گە دەيىن جۇمىس ىستەيدى.
ساۋنا, سپا-ورتالىقتار مەن باسسەيندەر سەنبى, جەكسەنبى كۇندەرى جۇمىسىن توقتاتتى. ەل استاناسىندا كۇشەيتىلگەن شەكتەۋلەر 1 شىلدەدەن بەرى كۇشىندە. ايدىڭ باسىندا ىركەس-تىركەس كەلگەن مەيرامعا ارنالعان شارالاردىڭ ونلاي فورماتتا ءوتىپ جتاۋى-اق كارانتيندىك شەكتەۋلەردىڭ قانشالىقتى قاتاڭ ەكەنىن كورسەتەدى.
شىمكەنتتە 2 شىلدەدە كۇشىنە ەنگەن قاۋلى تالاپتارى بويىنشا تۇرعىندار مەن قوناقتاعا ادامدار كوپ جينالاتىن تۋعان كۇن, مەرەيتوي, قۇدالىق, توي, بەتاشار جانە باسقا كەز كەلگەن ءىس-شارالاردى وتكىزۋگە تىيىم سالىنعان.
سونداي-اق, 65 جاستان اسقان ادامداردىڭ قالادا ءجۇرۋى شەكتەلىپ, ماسكا رەجيمىن ساقتاۋ مىندەتتەلدى. قۇجات بويىنشا الەۋمەتتىك-ەكونوميكالىق نىسانداردىڭ جۇمىسى ناقتى ولشەمدەر نەگىزىندە رەتتەلۋدە.
