ەلىمىزدىڭ تۇڭعىش پرەزيدەنتى نۇرسۇلتان نازارباەۆ ءوزىنىڭ كوشباسشىلىق قاسيەتى مەن قاي نارسەنى دە ارىدەن ويلايتىن دارالىعىنىڭ ارقاسىندا تاۋەلسىزدىك العان تاعدىرلى ساتتە ماڭىزدى شەشىمدەر قابىلداپ, ماڭىزدى ماقساتتارعا قول جەتكىزۋ مۇمكىن بولدى. ىشكى جانە سىرتقى ساياساتتا تاتۋلىقتى تۋ ەتكەن, ەكونوميكالىق ءوسىمدى قامتاماسىز ەتكەن باستامالارى, ازاماتتىق قوعام ينستيتۋتتارىن دامىتۋ ءۇشىن قولايلى جاعدايدىڭ جاسالۋى, قازاقستاننىڭ بيىك جەتىستىكتەرگە جەتۋىنىڭ كەپىلىنە اينالدى. سونداي يگى ىستەردىڭ بىردەن-ءبىر سيمۆولى – جاس استانامىز نۇر-سۇلتان. ەلىمىزدىڭ باس قالاسى ەلباسىنىڭ شىعارماشىلىق جوسپارلارىنىڭ عانا ەمەس, سونىمەن قاتار حالىقتىڭ مادەني قۇندىلىقتارى مەن تىلەكتەرىنىڭ كورىنىسىنە اينالدى. سوندىقتان دا استانانىڭ تۋعان كۇنى – بارشا قازاقستاندىقتاردى بىرىكتىرەتىن كۇن. مۇندا شەتەلدىك ساياساتكەرلەردىڭ قاتىسۋىمەن الەمدىك دەڭگەيدەگى ءىس-شارالار وتكىزىلىپ, حالىقارالىق ارىپتەستىكتى نىعايتۋ بويىنشا ماڭىزدى ماسەلەلەر تالقىعا سالىنادى. نۇر-سۇلتان – مىڭداعان قازاقستاندىقتاردىڭ جاڭا ۇيىنە اينالدى. ولار بۇل جەردە وزدەرىنىڭ اياۋلى ارماندارى مەن كاسىبي جوسپارلارىن جۇزەگە اسىرۋدا. شاھاردا ەرەكشە عيماراتتار كوپ-اق, ەلدىڭ بىرنەشە ونجىلدىقتار شەڭبەرىندە دامۋىنا مۇمكىندىك سىيلايتىن ءىرى نىساندار دا جۇمىس ىستەپ تۇر. سونداي ۇيىمداردىڭ ءبىرى – نۇرسۇلتان نازارباەۆ قورى. جيىرما جىلعا سوزىلعان ۋاقىت ىشىندە قور جۇزدەگەن جوبانى جۇزەگە اسىردى. وسى جىلدار ىشىندە قور ءوزىنىڭ نەگىزگى ميسسياسىن – جاس قازاقستاندىقتاردىڭ قابىلەتتەرىن قولداۋعا, اشۋعا باعىتتالعان ەلباسى يدەيالارىن ويداعىداي جۇزەگە اسىرىپ كەلەدى.
جاستار الەۋەتىن جۇزەگە اسىرۋ – باستى باسىمدىق
جيىرما جىل ىشىندە قور مىڭداعان جاسقا «ومىرگە جولداما» بەردى, ولاردىڭ دامۋى مەن ىلگەرى باسۋى ءۇشىن كومەكتەستى, تىڭ مۇمكىندىكتەر اشتى. جىل سايىن قازاقستاننىڭ 80-نەن استام ۇزدىك ستۋدەنتى قوردىڭ اتاۋلى ستيپەندياسىنا يە بولادى. 100-دەن استام اقىندار مەن جازۋشىلار جىل سايىن رەسپۋبليكالىق «التىن توبىلعى» ادەبي بايگەسىنە قاتىسىپ, باق سىنايدى. شىعارماشىلىق جوبالاردى قولداۋعا باعىتتالعان گرانتتار كونكۋرسى قانشاما جاس ءۇشىن ارمان, ماقساتتارىن جۇزەگە اسىرۋ جولىنداعى تاماشا مۇمكىندىك ەكەنى بەلگىلى.
جاس IT-مامانداردى قولداۋعا, جاڭا تسيفرلىق سەرۆيستەردى دامىتۋعا باعىتتالعان قور جوبالارى ءوز تيىمدىلىگىن كورسەتىپ ۇلگەردى. Smart Zholy ءوز جوبالارىن حالىقارالىق دەڭگەيدە تانىستىرا السا, Intellection, Webtotem, Nommi ستارتاپتارى ازيانىڭ ۇزدىك 10 جوباسىنىڭ قاتارىنا كىرىپ, ازيانىڭ ايگىلى ۆەنچۋرلىق قورىنان قارجىلىق قولداۋ تاپتى.
قوردىڭ ماڭىزدى جوبالارىنىڭ ءبىرى – الەۋمەتتىك يدەيالار مەن جوبالار جارمەڭكەسى. قازىردە بۇل جوبا ۇكىمەتتىك ەمەس ۇيىمداردىڭ ءوزارا قارقىندى قارىم-قاتىناس قۇرۋىنا ارنالعان اۋقىمدى الاڭعا اينالدى. جارمەڭكە الەۋمەتتىك جوبالاردى ىسكە اسىرۋدىڭ وزىق تاجىريبەلەرىن انىقتاۋعا مۇمكىندىك بەردى, ولاردىڭ كوپشىلىگى بۇگىندە قوعامعا پايداسىن تيگىزۋدە. 2008 جىلدان بەرى جارمەڭكەگە 15 مىڭنان استام ءتۇرلى ۇيىمدار قاتىستى. نۇرسۇلتان نازارباەۆ قورى 300-دەن استام جوباعا گرانت كومەگىن ۇسىندى.
سونىمەن قاتار ونلاين ءبىلىم بەرۋدىڭ وزەكتىلىگىن ەسكەرە وتىرىپ ەلباسى قورى «امان كەلەشەك» باعدارلاماسىنا تۇزەتۋلەر ەنگىزدى. ونىڭ اياسىندا «مەن – جاڭا الەمنىڭ جاسامپازىمىن» اتتى جوبا قولعا الىندى. بۇل – بالالار ءۇيى جانە تۇزەتۋ مەكەمەلەرى مەن مامانداندىرىلعان مەكتەپ-ينتەرناتتاردىڭ تاربيەلەنۋشىلەرىنە ارنالعان ينكليۋزيۆتى ءبىلىم جوباسى. جوبا اياسىندا ونلاين رەجىمدەگى شەبەرلىك سىنىپتارى وتكىزىلەدى. شەبەرلىك سىنىپتارى كەزىندە بالالار شىعارماشىلىق ويلاۋ داعدىسىن مەڭگەرىپ, كەز كەلگەن تاپسىرمانى كرەاتيۆتى تۇرعىدان شەشۋگە ماماندانادى, قوعامداعى مىنەز-ق ۇلىقتىڭ ەتيكالىق نورمالارىن مەڭگەرەدى. مۇنىڭ ءبارى الەۋمەتتەنۋگە كومەكتەسەتىن «يكەمدى داعدىلاردى» دامىتادى.
ەلباسى باستاماسى – كەلەشەككە كوزقاراس
ەلباسىنىڭ تابىستى بولۋعا, باسەكەگە قابىلەتتى بولۋعا ۇندەيتىن مەكتەپ جاسىنداعى بالالارعا ارنالعان جاڭا باستامالارى دا بارشىلىق. ولاردىڭ قاتارىنا ەرەكشە قاجەتتىلىگى بار بالالاردى ساۋىقتىرۋعا باعىتتالعان «قامقورلىق» باستاماسىن ايتا الامىز. بالالاردى بىلىكتى كومەكپەن كەڭىرەك قامتۋدى قامتاماسىز ەتۋ قاجەتتىلىگى – بۇل جوبانىڭ باستى مىندەتى. قازاقستانداعى ساۋىقتىرۋ ورتالىقتارى بالالاردىڭ 25 پايىزىن عانا قامتي الىپ وتىرعانىن ەسكەرەر بولساق, مۇنداي باستامانىڭ قولعا الىنۋى وتە ماڭىزدى ءارى قاجەتتى. جوبانىڭ ناتيجەسىندە مۇگەدەك بالالاردىڭ 40 پايىزى ءتيىستى ساۋىقتىرۋ كومەگىمەن قامتىلادى. قازىرگى كەزدە قور ايماقتاردا 8 «قامقورلىق» ورتالىعىن اشتى. جىل سوڭىنا دەيىن تاعى 10 ورتالىق اشىلادى. ولاردىڭ ارقايسى جىلىنا 600 بالاعا دەيىن قابىلداي الادى.
جوبانىڭ ماڭىزدى بولىگى – ينكليۋزيانى قولداۋ كابينەتتەرىنىڭ اشىلۋى. ونداي كابينەتتەر ءۇي جاعدايىندا وقيتىن بالالاردىڭ مەكتەپكە بارىپ, ءوز قۇربىلارىمەن بىرگە ءبىلىم الۋىنا مۇمكىندىك بەرەدى. ەلباسىنىڭ ەكىنشى باستاماسى – El Úmiti. ونىڭ ماقساتى – جاقىن بولاشاقتا ەل ءومىرىنىڭ ءارتۇرلى سالاسىندا كاسىبي ەليتا قۇرامىنا كىرەتىن تالانتتى جاس قازاقستاندىقتاردى ىزدەپ تابۋ جانە قولداۋ كورسەتۋ. باستاما اياسىندا قور ەل ۇكىمەتىمەن بىرلەسە وتىرىپ بىرنەشە ءبىلىم بەرۋ جوبالارىن جۇزەگە اسىرادى. سونىڭ ءبىرى – Myń bala وليمپياداسى. بۇل ۇلتتىق ماسشتابتاعى بىرەگەي جوبا. وليمپيادا اۋىلدىق جەرلەردە تۇراتىن قابىلەتتى بالالاردى قولداۋعا باعىتتالعان. جوباعا 5 جانە 6 سىنىپ وقۋشىلارى قاتىسا الادى. ەكى جىل ىشىندە وليمپيادا اۋىل مەكتەپتەرىندە وقيتىن 400 مىڭنان استام بالاعا شاراپاتىن تيگىزدى. 2020 جىلدىڭ قورىتىندىسى بويىنشا 1000 جەڭىمپاز انىقتالىپ, ولاردىڭ 300-دەن استامى وقۋلارىن مامانداندىرىلعان مەكتەپتەردە جالعاستىردى. 2000 فيناليست ەلباسى اكادەمياسىنىڭ Birge Oqý ونلاين-مەكتەبىندە ءبىلىم الۋدا.
بيىل وليمپيادا العاش رەت ونلاين-فورماتتا وتكىزىلدى. ناتيجەسىندە, كوزىندە ۇشقىن بار تاعى 1000 اۋىل بالاسى دارىندى بالالارعا ارنالعان جەتەكشى ءبىلىم وردالارىندا وقۋ مۇمكىندىگىنە يە بولدى.
«ەلباسى مەدالى» – El Úmiti باستاماسىنىڭ تاعى ءبىر جوباسى, ول جاستاردىڭ كەشەندى دامۋىنا باعىتتالعان ۇلتتىق دەڭگەيدەگى بىرەگەي باعدارلاما. جاستار وعان قاتىسا وتىرىپ ءوز ۋاقىتىن باسقارۋدى, الدىنا ەلەۋلى ماقسات قويۋدى, سالاماتتى ءومىر سالتىن ۇستانىپ, ءوزىن ۇدايى دامىتىپ وتىرۋدى مەڭگەرىپ شىعادى. 2020 جىلى «ەلباسى مەدالى» باعدارلاماسى 11 مىڭنان استام قاتىسۋشى, 600 تالىمگەر, 17 وڭىرلىك ۇيلەستىرۋشى جانە ساراپشىلاردى قامتىدى. ەلباسى مەدالىن يەلەنگەندەر ءبىلىم گرانتتارىن تاعايىنداۋ كەزىندە زاڭنامادا بەلگىلەنگەن تارتىپپەن باسىمدىققا يە بولادى. جوبا بيىل دا جالعاسادى جانە 11 مىڭ بەلسەندى جاستى قامتيدى.
نۇرسۇلتان نازارباەۆ قورى ءۇشىن ماڭىزدى جۇمىس باعىتى ارقاشان جاھاندىق بەيبىتشىلىك پەن كەلىسىم قۇندىلىقتارىن نىعايتۋ سالاسىنداعى حالىقارالىق ىنتىماقتاستىق بولدى. وسىعان بايلانىستى بۇل قىزمەتتىڭ يدەولوگيالىق باستى باعىتى زاماناۋي جاعدايداعى پلانەتانى دامىتۋ كورىنىسى تۋرالى ەلباسى فيلوسوفياسى بولىپ سانالادى.
قور كوپ جىل بويى شەتەلدىك سەرىكتەستەرمەن ارىپتەستىكتى نىعايتىپ كەلە جاتىر. گەيدار اليەۆ قورىمەن (ازەربايجان), گوي بەيبىتشىلىك قورىمەن (جاپونيا), كونراد ادەناۋەر (گەرمانيا) قورمەن جانە وزگە دە كوپتەگەن قور مەن دوستىق قارىم-قاتىناس قالىپتاستى. حالىقارالىق ساياساتتاعى جاھاندىق قاۋىپسىزدىك, جەرگىلىكتى داعدارىس, ەكونوميكا, جاڭا ماسەلەلەر سياقتى كوكەيكەستى تاقىرىپتاردى تالقىلاۋ بويىنشا بەلگىلى ەكونوميست, ساياساتكەر, ساراپشىلاردىڭ باسىن قوساتىن اۋقىمدى ديالوگ الاڭدارى ۇيىمداستىرىلۋدا. Astana club بەدەلدى حالىقارالىق پىكىرسايىس كلۋبىنىڭ قىزمەتى, كوپتەگەن كونفەرەنتسيانىڭ جۇمىسى وسىعان باعىتتالعان. الەۋمەتتىك ماڭىزى بار جوبالار نۇرسۇلتان نازارباەۆ قورى قىزمەتىنىڭ جان-جاقتىلىعىن, ەلباسى باستامالارىنىڭ كەڭدىگى مەن اۋقىمىن كورسەتەدى.
قور جاستاردىڭ تالانتتى وكىلدەرىن ايگىلەپ قانا قويمايدى, ولاردىڭ الەۋەتىن اشۋعا, قازاقستاننىڭ باسەكەگە قابىلەتتى ازاماتى بولىپ قالىپتاسۋىنا كومەكتەسەدى. نۇر-سۇلتان قالاسىنىڭ تۋعان كۇنى قارساڭىندا ەلوردامىزدىڭ گۇلدەنىپ, وركەندەپ, وسە ءتۇسۋىن تىلەيمىن. ەلىمىزدىڭ باس شاھارى ءار كەز قازاقستاندىقتاردىڭ العا باسۋىنىڭ جانە ەل دامۋىنىڭ باستى ورتالىعىنا اينالا بەرسىن!
قانات جۇماباەۆ,
نۇرسۇلتان نازارباەۆ قورىنىڭ
اتقارۋشى ديرەكتورى
