نۇرسۇلتان نازارباەۆ قورىنىڭ قولداۋىمەن وتكەن ءىس-شاراعا يتاليانىڭ ساياسي, قوعامدىق جانە عىلىمي ورتالارىنىڭ وكىلدەرى قاتىستى. ولاردىڭ اراسىندا دەپۋتاتتار پالاتاسىنىڭ ۆيتسە-پرەزيدەنتى ەتتورە روزاتو, دەپۋتات, «قازاقستان-يتاليا» دوستىق توبىنىڭ پرەزيدەنتى ەدموندو چيريەللي, قازاقستان-يتاليا ساۋدا پالاتاسىنىڭ توراعاسى پاولو گيرەللي, قازاقستاننىڭ سيتسيلياداعى قۇرمەتتى كونسۋلى الەسساندرو اربوريو, Vision & Global Trends جاھاندىق تالداۋ حالىقارالىق ينستيتۋتىنىڭ پرەزيدەنتى تيبەريو گراتسياني جانە باسقالار بولدى.
2017 جىلدىڭ جەلتوقسانىندا جارىق كورگەن «تاۋەلسىزدىك ءداۋىرى» كىتابى تاريحي پۋبليتسيستيكا جانرىندا جازىلعان جانە ول اۆتوردىڭ ەلدىڭ جاڭا تاريحى مەن ونىڭ بولاشاعىنا دەگەن كوزقاراسىن كورسەتەدى. ەلباسىنىڭ ەڭبەگىندە دامۋدىڭ «قازاقستاندىق مودەلىنىڭ» ءمانى, ەۆوليۋتسياسى, نەگىزگى قاعيدالارى, مەحانيزمدەرى مەن قوزعاۋشى كۇشتەرى سيپاتتالعان. سونىڭ ارقاسىندا توتاليتارلىق جۇيەنى ىدىراتىپ, نارىقتىق ەكونوميكانى قۇرۋ مىندەتتەرى ويداعىداي شەشىلگەن بولاتىن.
قازاقستاننىڭ يتالياداعى ەلشىسى ەربولات سەمباەۆ كىتاپتىڭ تۇساۋكەسەر ءراسىمىن اشىپ: «جاس تاۋەلسىز مەملەكەتتىڭ قالىپتاسۋىنداعى ماڭىزدى كەزەڭدەر تۋرالى كىتاپ قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ ارحيۆىندە ساقتالعان جەكە ەستەلىكتەرىنە نەگىزدەلىپ جازىلعان», دەدى. سونداي-اق ەلشى كىتاپتى يتاليان تىلىنە اۋدارۋدىڭ قازاقستان مەن يتاليا اراسىنداعى دوستىق قاتىناستاردى نىعايتۋ ءۇشىن ماڭىزدىلىعىن اتاپ ءوتتى. «بۇگىندە يتاليا قازاقستاننىڭ نەگىزگى ساۋدا سەرىكتەستەرى تىزىمىندە الەم بويىنشا ەكىنشى جانە ەۋروپا وداعى ەلدەرى اراسىندا ءبىرىنشى ورىنعا يە جەتەكشى ينۆەستورلارىنىڭ ءبىرى بولىپ سانالادى», دەدى ە. سەمباەۆ.
تۇساۋكەسەر اياسىندا نۇرسۇلتان نازارباەۆ قورى اتقارۋشى ديرەكتورىنىڭ ورىنباسارى, ەۋروپا كەڭەسى ۆەنەتسيا كوميسسياسىنىڭ قازاقستان رەسپۋبليكاسىنان مۇشەسى يگور روگوۆ بەينەۇندەۋ جاسادى.
ي.روگوۆتىڭ پىكىرىنشە, «قازاقستاندىق تابىستىڭ فورمۋلاسى ەتنوسارالىق بىرلىكتىڭ ۇيلەسىمدى مودەلىنەن, پروگرەسسيۆتى ەكونوميكالىق دامۋدان, سونداي-اق حالىقتىڭ ءال-اۋقاتى مەن ءومىر ءسۇرۋ ساپاسىن ارتتىرۋعا باعىتتالعان ءتيىمدى مەملەكەتتىك ساياساتتىڭ نەگىزدەرىن ۇستانۋدان قۇرالادى».
تيبەريو گراتسياني: «قازاقستان الەمدىك ارەناعا شىقتى. ەۋرازيا كونتينەنتىندەگى ەكى الىپتىڭ ورتاسىندا تۇرعان ول ەندى جاھاندىق ويىنشىعا اينالىپ وتىر. بۇل – قازاقستاننىڭ ورتالىق ازياداعى جاعدايىن ەسكەرە كەلگەندە ايتار ءسوز», دەدى.
ەدموندو چيريەللي ەلباسىنىڭ قازاقستاندى جاڭارتۋداعى, رەسپۋبليكانىڭ باسقا ەلدەرمەن دوستىق قارىم-قاتىناسىن نىعايتۋداعى وراسان ءرولىن اتاپ ءوتتى. «جوعارى مادەنيەتتى, جوعارى ادامي جانە ساياسي كوزقاراستارى بار نۇرسۇلتان نازارباەۆ قازاقستاندى ورتالىق ازياداعى نەگىزگى ايماقتىق ويىنشىعا اينالدىرۋدا باستى تۇلعا بولىپ وتىر. ول قازاقستان رەسپۋبليكاسىن كورەگەندىكپەن باسقارا ءبىلدى جانە ءوز وتانى مەن حالقىنىڭ اماندىعى مەن قاۋىپسىزدىگىن قامتاماسىز ەتە وتىرىپ, الەۋمەتتىك قۇندىلىقتاردى ۇلتتىق قۇندىلىقتارمەن ۇيلەستىرە الدى.
مەن قازاقستاننىڭ دامۋ بارىسىن ءاردايىم قاداعالاپ وتىردىم. سوندىقتان نازارباەۆتىڭ مودەلى مەن ستراتەگيالىق ساياساتى ەل مەن ونىڭ حالقىن ۇلى ەتكەنىن جانە باسقا ەلدەرمەن, اتاپ ايتقاندا, يتاليامەن بەرىك قارىم-قاتىناستى نىعايتۋعا ۇلەس قوسقانىن راستاي الامىن», دەدى ەدموندو چيريەللي.
يتاليا پارلامەنتىنىڭ دەپۋتاتتارى قازاقستان رەسپۋبليكاسى تۇڭعىش پرەزيدەنتىنىڭ يتاليان تىلىنە اۋدارىلعان كىتابى يتاليا قوعامى مەن ازاماتتارى ءۇشىن قازاقستان تاريحىنىڭ جاڭا بەتتەرىن اشاتىنىن, بۇل ءوز كەزەگىندە ەكى حالىقتىڭ جاقىنداسۋىنا وڭ ىقپال ەتەتىنى ءسوزسىز ەكەنىن اتاپ ءوتتى.
تۇساۋكەسەر ءراسىمىنىڭ سوڭىندا «تاۋەلسىزدىك ءداۋىرى» كىتابى الداعى ۋاقىتتا يتالياداعى ورتا ازيا ەلدەرىن زەرتتەيتىن عىلىمي ورتالىقتاردىڭ, جەرگىلىكتى كىتاپحانالار مەن جوعارى وقۋ ورىندارىنىڭ قورىنا بەرىلەتىنى ايتىلدى.
