ونەر • 04 شىلدە، 2021

ورالدا سەيتەك كۇيشى بايقاۋى ءوتتى

163 رەت كورسەتىلدى

ورال قالاسىندا كۇيشى-كومپوزيتور سەيتەك ورازالى ۇلىنىڭ تۋعانىنا 160 جىل تولۋىنا وراي رەسپۋبليكالىق «كۇي قۇدىرەتى» دومبىراشىلار بايقاۋى قورىتىندىلاندى. ەلىمىزدىڭ ءار وڭىرىنەن كەلگەن 17 ونەرپاز ەكى كۇن بويى كۇي قۇدىرەتىن كورسەتىپ، ساحنادا سايىستى، دەپ جازادى Egemen.kz.

شىلدەنىڭ العاشقى جەكسەنبىسى – ۇلتتىق دومبىرا كۇنى اتالىپ، شىن مانىندە حالىقتىق مەرەكەگە اينالدى. تالاي ساڭلاق كۇيشى ومىرگە كەلگەن باتىس قازاقستان وبلىسىندا ۇلتتىق اسپابىمىزدى ۇلىقتاعان ءتۇرلى شارالار وتۋدە. بەلگىلى كۇيشى سەيتەك ورازالى ۇلىنىڭ بيىلعى مەرەيتويى دا ءدال وسى كۇنگە ورايلاستىرىلعان ەكەن.

«بۇل بايقاۋدىڭ ماقساتى – سەيتەك ورازالى ۇلىنىڭ ەسىمىن ۇلىقتاپ، توكپە كۇي مۇرالارىن كەڭىنەن ناسيحاتتاۋ، وسكەلەڭ ۇرپاقتىڭ ورىنداۋشىلىق باعدارلاماسىنا سەيتەكتىڭ كۇيلەرىن ەنگىزۋ، رەسپۋبليكامىزداعى دومبىراشىلاردىڭ كاسىبي دەڭگەيىن شىڭداۋ، ونەر الەمىندە جاس دومبىراشىلاردىڭ ەسىمىن اشۋ» دەيدى بايقاۋدى ۇيىمداستىرۋشى، باتىس قازاقستان وبلىستىق حالىق شىعارماشىلىعى ورتالىعى ديرەكتورى ماۋلەت جۇباتوۆ.

بايقاۋعا نۇر-سۇلتان، الماتى، تالدىقورعان، تاراز، تۇركىستان، قىزىلوردا، اتىراۋ وبلىستارىنان جانە باتىس قازاقستان وبلىسىنىڭ اۋداندارى مەن ورال قالاسىنان 18-45 جاس ارالىعىنداعى 17 كۇيشى قاتىستى.

ونەر بايقاۋىنا رەسپۋبليكاعا تانىمال مادەنيەت قايراتكەرلەرى، كاسىبي كۇيشىلەر قازىلىق ەتتى. قازىلار القاسىنىڭ توراعاسى – قازاقستان رەسپۋبليكاسىنا ەڭبەك سىڭىرگەن مادەنيەت قىزمەتكەرى، «پاراسات» وردەنىنىڭ يەگەرى، عاريفوللا قۇرمانعاليەۆ اتىنداعى وبلىستىق فيلارمونيا ءارتيسى، كۇيشى ەرمەك قازيەۆ بولسا، القا قۇرامىندا قازاقستان رەسپۋبليكاسى مادەنيەت سالاسىنىڭ ۇزدىگى، نۇر-سۇلتان قالاسىنداعى «تاۋەلسىزدىك سارايىنىڭ» ديرەكتورى قۋانىشبەك مۇحانعاليەۆ، قازاقستان رەسپۋبليكاسى مادەنيەت قايراتكەرى، نۇرمۇحان ءجانتورين اتىنداعى اتىراۋ وبلىستىق فيلارمونيا ءارتيسى قۇتتىگەرەي دۇيسەەۆ، قازاقستان رەسپۋبليكاسى مادەنيەت سالاسىنىڭ ۇزدىگى، قۇرمانعازى اتىنداعى ساز كوللەدجىنىڭ ديرەكتورى، كۇيشى نۇرجان سەرتەكوۆ، قازاقستان رەسپۋبليكاسى مادەنيەت سالاسىنىڭ ۇزدىگى، قۇرمانعازى اتىنداعى ورال ساز كوللەدجىنىڭ وقىتۋشىسى، كۇيشى ەربول عۇبايدۋلليندەر بار.

ەكى كۇنگە سوزىلعان بايقاۋ بارىسىندا دومبىراشىلار بايقاۋ شارتىنا ساي ونەر كورسەتتى. باپ پەن باق جارىسقان، شىن مانىندە ونەر وزعان، كۇي ونەرىنىڭ تۋى كوكتە جەلبىرەگەن سايىس بولدى.

«ەلوردا كۇنى قارساڭىندا، ەل تاۋەلسىزدىگىنىڭ 30 جىلدىعىمەن، كۇيشىلىك ءداستۇر مەكتەپتەرى قالىپتاسقان، كۇي اتاسى قۇرمانعازى مەن كۇي اناسى دينا باستاعان ءدۇلدۇل كۇيشىلەر مەكەن ەتكەن بوكەي ورداسىنىڭ 220 جىلدىعىمەن تۇسپا-تۇس كەلگەن بۇگىنگى سەيتەك ورازالى ۇلى بابامىزدىڭ 160 جىلدىعىنا ارنالعان «كۇي قۇدىرەتى» رەسپۋبليكالىق دومبىراشىلار بايقاۋى اقجايىق ءوڭىرىن رۋحاني سەرپىلتتى. جىلدىڭ سوڭىنا دەيىن كۇي مەرەكەسى دينا نۇرپەيىسوۆانىڭ 160 جىلدىق مەرەيتويى اياسىنداعى شارالارمەن جالعاسادى. ەندەشە، ەلىمىزدىڭ ەگەمەن كۇنىندە كوكەيگە قونعان قۋانىش مەرەكەسى — ۇلتتىق دومبىرا كۇنى جاساي بەرسىن!» دەپ قۇتتىقتادى باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ.

سونىمەن، قازىلار القاسى سەيتەك بايقاۋىنىڭ باس جۇلدەسىنە باتىس قازاقستان وبلىسى شىڭعىرلاۋ اۋدانىنان كەلگەن ونەرپاز ازامات قاليەۆتى لايىق دەپ تاپتى. وعان 500 مىڭ تەڭگە بايگە بەرىلدى.

بايقاۋدىڭ ءبىرىنشى ورىن جۇلدەسىن اتىراۋلىق قايرات جۇماعاليەۆ، ەكى ەكىنشى ورىندى – الماتىلىق ايگەرىم نەتاليەۆا مەن تالدىقورعاندىق بوتا دۇنگەنباەۆا يەلەندى.

ءۇش ءۇشىنشى ورىن قىزىلوردا قالاسىنان كەلگەن باۋىرجان سەيدالىگە، ورالدىق الىبەك قۋانىشاليەۆكە، الماتىلىق تەمىرحان بەيبىتكە بۇيىردى.

بايقاۋ جەڭىمپازدارى مەن قاتىسۋشىلارىنا باعالى سىيلىقتار، ماراپاتتار تابىس ەتىلدى.

«بۇگىنگى قاسيەتتى مەرەكە – ۇلتتىق دومبىرا كۇنى قۇتتى بولسىن! بۇل كۇن – ۇلتتىق قۇندىلىقتارىمىزدى ارداقتاپ، تەرەڭ تامىرىمىزعا وي جۇگىرتەتىن شۋاق پەن شاتتىققا بولەنگەن مەرەكە. ويتكەنى قازاق حالقى ءۇشىن دومبىرا – ۇلتتىق اسپاپ قانا ەمەس، قازاقتىڭ جانى مەن قانى، ارى مەن بارى، قاسيەتى مەن كيەسى. دومبىرا – حالىقتىڭ قايعى مەن مۇڭىن، قۋانىش پەن شاتتىعىن جەتكىزگەن سەنىمدى سەرىگى، بابالاردىڭ ءۇنى، ۇلى دالانىڭ سازى! قارا دومبىرانىڭ قوڭىر ءۇنى سانامىزدا ساقتالعان، ۇلتتىق كودىمىزدا تاڭبالانعان. سوندىقتان تاريحىمىزدىڭ اسۋ دا اسۋ كەزەڭىنەن سىر شەرتكەن كۇي-تولعاۋ، سىڭعىرلى سۇلۋ ءان-اۋەن قۇلاعىمىزدان كەتپەسىن، حالقىمىزدىڭ قاسيەتتى ۇلتتىق اسپابى – دومبىرا تورىمىزدەن تۇسپەسىن!» دەپ تاراستى كۇي سايىسىنا قاتىسۋشىلار.

 

باتىس قازاقستان

سوڭعى جاڭالىقتار

نار نارىمبەتوۆ ەدى...

قازاقستان • كەشە

«وميكرون» شتامى وقشاۋلايدى

كوروناۆيرۋس • كەشە

پورترەتتەگى پاراسات

ەلباسى • كەشە

ۇقساس جاڭالىقتار