قازاقستان تاۋەلسىزدىگىنىڭ 30 جىلدىعى قارساڭىندا قازاقستان رەسپۋبليكاسىنىڭ تۇركيا رەسپۋبليكاسىنداعى ەلشىلىگىنىڭ ۇيىمداستىرۋىمەن جۇزەگە اسقان ءىس-شارا 2021 جىلدىڭ 1-3 شىلدە ارالىعىندا انكارانىڭ ەڭ كورىكتى جەرلەرى - تاريحي ەستەرگون قامالى, انكارا قامالى, تۇركىستان عيماراتى, تۇركيا رەسپۋبيليكاسىنىڭ پرەزيدەنت اكىمشىلىگى كىتاپحاناسى جانە تۇرىك تاريحي مۇراجايىندا ءوتتى.
ۇلتتىق دومبىرا كۇنى فەستيۆالىنە قازاق, تۇرىك, تاتار, نوعاي, جاپون حالىقتارىنىڭ وكىلدەرىنەن تۇراتىن 50-دەن استام ونەرپاز 4 اي بويى دايىندالعان قازاقتىڭ كۇيلەرىن ءبىر مەزەتتە ورىنداپ, انكارالىقتاردى عاجاپ كۇيگە بولەدى.
ۇلتتىق دومبىرا كۇنىنە وراي مۇنداي اۋقىمدى شارا شەتەلدە العاش رەت ۇيىمداستىرىلىپ وتىر.
2 شىلدەدە باستالعان ۇلتتىق دومبىرا كۇنى فەستيۆالى تۇركيا رەسپۋبليكاسىنىڭ پرەزيدەنت اكىمشىلىگىنىڭ ۇلتتىق كىتاپحاناسىندا سالتاناتتى كونتسەرتپەن اشىلدى.
تۇركيا پرەزيدەنتتىك اكىمشىلىگى ۇلتتىق كىتاپحاناسىندا وتكەن كونتسەرتكە ەلشى ابزال ساپاربەك ۇلى جانە تۇركيا پرەزيدەنتتىك اكىمشىلىگىنىڭ ۇلتتىق كىتاپحاناسىنىڭ باسشىسى ايحان تۋگلۋ, تۇركياداعى قارعىزستان, البانيا, يران جانە ماجارستان ەلدەرىنىڭ ەلشىلەرى, ديپلوماتتارى, دەپۋتاتتار, تۇرىك ەلىندە ءبىلىم الىپ جاتقان ستۋدەنتتەر مەن باق وكىلدەرى قاتىستى.
كونتسەرتتە دومبىراشىلارمەن قاتار, قازاقستان جانە تۇركيانىڭ ونەر مايتالماندارى, اتاپ وتەر بولساق, قازاقستاننىڭ مادەنيەت قايراتكەرى ەلميرا شەندۋران, قازاقستان جانە موڭعوليانىڭ ەڭبەك سىڭىرگەن ءارتىسى مەرۋەش باشاي, تۇركيادا قازاقتىڭ قاسيەتتى قۇرالىن دارىپتەپ جۇرگەن شامشىگۇل ءجۇسىپوۆا مەن سەدات سولاكوگلۋ, تۇركى دۇنيەسى وركەسترىنىڭ مۋزىكانتى, بەلگىلى كومپوزيتور يرفان گۇردال, مايا يسمايلوۆا سياقتى كورىكتى ونەر يەلەرى دا قازاق حالىق اندەرىن كورەرمەندەرگە پاش ەتتى.
3 شىلدەدە ۇلتتىق دومبىرا كۇنى فەستيۆال شەڭبەرىندە انكارانىڭ ەڭ ۇلكەن «تۇرىك تاريحي مۇراجايىندا» فەستيۆالدىڭ اياقتالۋىنا وراي سالتانناتتى كونتسەرتتىك باعدارلاما ءوتتى.
كونتسەرتتىك باعدارلاماعا ەلشى ابزال ساپاربەك ۇلى, ەتيمەسگۋت اۋدانى اكىمى ەنۆەر ديمەرەل, تاريحي تۇرىك مۇراجايى ديرەكتورى احمەت يىلدىرىم, ەتيمەسگۋت اۋدانى اكىمى ورىنباسارى اللادين سونات, دەپۋتاتتار, مادەني ورتالىق جەتەكشىلەرى مەن زيالى قاۋىم جانە جەرگىلىكتى باق وكىلدەرى قاتىستى.
ەلشى ابزال ساپاربەك ۇلى ءوز سوزىندە «دومبىرا قازاقتىڭ ۇلتتىق اسپابى عانا ەمەس, حالىق مۇراسى. قازاق قاشاندا دومبىرانى قادىر تۇتىپ, تورگە ءىلىپ, باعالاعان. كيەلى اسپاپتىڭ قۇرمەتىنە 2018 جىلى ەلباسىنىڭ جارلىعىمەن ۇلتتىق دومبىرا كۇنى بەكىتىلدى. سوناۋ كونە تاريحتىڭ كۇمبىرىن بۇگىنگى كۇنگە جەتكىزگەن كيەلى دە قاسيەتتى دومبىرامىزدى وركەنيەتتى زامانعا ساي جاڭعىرتا بىلسەك, كەلەشەك جاستارعا ۇلتتىق تاربيە بەرەتىن ونەگە باستاۋى, ءارى رۋحاني قازىناسى بولارى شىندىق», دەپ دومبىرا كۇنىنىڭ ماڭىزدىلىعىنا توقتالدى.
سونداي-اق, ەلشى ابزال ساپاربەك ۇلى وسىنداي اۋقىمدى شارانىڭ شەتەلدە العاش رەت تۇركيادا ءوتىپ جاتقانىن اتاي كەلە, ۇيىمداستىرۋشىلار مەن قولداۋ كورسەتكەن باۋىرلاس تۇرىك حالقىنا العىسىن ءبىلدىردى.
ءوز كەزەگىندە ەلشى ابزال ساپاربەك ۇلى شاراعا كەلگەن بارشا قوناقتاردى «ۇلتتىق دومبىرا» كۇنىمەن قۇتتىقتاپ, ۇلتتىق ونەردى جالعاستىرۋ مەن قاسيەتتى دومبىرانى سەرىك ەتكەن ونەرپازدارعا ىزگى تىلەگىن بىلدىرە كەلە, ولاردى العىس حاتپەن ماراپاتتادى.
