2018 جىلى 13 ماۋسىمدا تۇڭعىش پرەزيدەنت – ەلباسى نۇرسۇلتان نازارباەۆ ۇلتتىق دومبىرا كۇنىن شىلدەنىڭ العاشقى جەكسەنبىسىندە اتاپ ءوتۋ تۋرالى جارلىققا قول قويدى.
دومبىرا - قازاق حالقىنىڭ رۋحاني مۇراسى مەن باي ءداستۇرىنىڭ نىشانى. عاسىرلار بويى ول قۋانىشتا دا, شەرلى كۇندەر مەن جەڭىستى كۇندەردە حالقىمىزدىڭ جانىندا. ۇرپاقتان-ۇرپاققا دومبىرا پەرنەسىنەن كۇمبىرلەگەن كۇي ارقىلى ءبىزدىڭ مادەني قۇندىلىقتارىمىز, سالتىمىز بەن اڭىزدارىمىز كەلىپ جەتكەن.
وسى ءداستۇردىڭ جالعاسى رەتىندە 4 شىلدە (ساعات 11:00-دە) تەلەۆيزيالىق ءتۇسىرىلىم فورماتىندا QAZAQSTAN تەلەارناسىندا «ۇلتتىق دومبىرا» كۇنى اياسىندا «ناعىز قازاق ەمەس, ناعىز قازاق - دومبىرا» كونتسەرتى وتەدى.
كونتسەرتتە قۇرمانعازى اتىنداعى قازاق اكادەميالىق حالىق اسپاپتار وركەسترى, ن. تىلەنديەۆ اتىنداعى «وتىرار سازى» ەتنوفولكلورلىق وركەسترى, تاتتىمبەت اتىنداعى اكادەميالىق فيلارمونياسىنىڭ حالىق اسپاپتارىنان قۇرالعان جيىنتىق وركەستر مەن ەلىمىزدىڭ ءداستۇرلى ونەرپازدارى ساحناعا شىعادى.
ۇلتتىق دومبىرا كۇنىندە رەسپۋبليكامىزدىڭ 17 وڭىرىنەن كەلگەن تاۋەلسىزدىك قۇرداستارىنان قۇرالعان 30 دومبىراشى تاۋەلسىزدىكتىڭ مەرەيلى 30 جىلدىعىنا كۇيدەن شاشۋ شاشادى.
قالا تۇرعىندارى مەن قوناقتارىنا العاشقى رەت دومبىرا كۇنىنە ارنايى سىيلىق رەتىندە ەحرو ورتالىعى الاڭىندا كۇي مەكتەپتەرىنىڭ كورنەكتى تۇلعالارىنىڭ كۇيلەرىن ۇيالى تەلەفونمەن QR-كود ارقىلى جۇكتەپ الىپ تىڭداۋعا بولاتىن اقپاراتتىق ستەندتەر ورناتىلادى.
ەحرو ورتالىعى الاڭىندا اسپان استىنداعى ساحنادا قازاقستاننىڭ ەڭبەك سىڭىرگەن ارتيستەرى سەكەن تۇرىسبەكوۆ, ايگۇل ۇلكەنباەۆا, قازاقستاننىڭ ەڭبەك سىڭىرگەن قايراتكەرلەرى باتىرجان مىقتىباەۆ, نۇركەن ءاشىروۆ سىندى داۋلەسكەر كۇيشىلەرىمىز اتاقتى كۇيشى بابالارىمىز قۇرمانعازى, قازانعاپتان باستاپ قازاقستان كومپوزيتورلارىنىڭ كۇمبىرلەگەن كۇيىنەن شاشۋ شاشىپ, قازاقستاننىڭ ەڭبەك سىڭىرگەن ءارتيسى رامازان ستامعازيەۆ, قازاقستاننىڭ ەڭبەك سىڭىرگەن قايراتكەرلەرى ساۋلە جانپەيىسوۆا, ەلمۇرا جاڭابەرگەن, ارداق بالاجانوۆا, ەرلان رىسقالي سىندى كۇمىس كومەي انشىلەرىمىز اۋەلەتە ءان شىرقايدى. «ناعىز قازاق قازاق ەمەس, ناعىز قازاق دومبىرا» اتتى ءان مەن كۇي توگىلگەن كونتسەرتىمىزدە جاس ورىنداۋشىلار – حالىقارالىق جانە رەسپۋبليكالىق كونكۋرستاردىڭ لاۋرەاتتارى ونەر كورسەتەدى.
سونىمەن قاتار كونتسەرت اياسىندا وڭىرلەردەن كەلگەن تانىمال دومبىرا شەبەرلەرىنە مادەنيەت جانە سپورت مينيسترلىگى اتىنان العىس حات پەن مەرەكەلىك كادەسىي تابىس ەتىلەدى.
