ريمدە وتكەن كەزدەسۋدىڭ 4 مينۋتىندا ەسەپ اشىلىپ ۇلگەردى. راحيم ستەرلينگتەن پاس العان كاپيتان ءحارري كەين گول سوقتى. بۇل ونىڭ وسى ەۋروداعى نەبارى ەكىنشى گولى. وسى گولدان كەيىن ازداپ ابدىراعان ۋكرايندىقتار 10 مينۋتتان باستاپ ەس جيدى. ءتىپتى پيكفورد قاقپاسى ماڭىندا سەنىمدى شابۋىلدار ۇيىمداستىرا باستادى. يارەمچۋك پەن يارمولەنكو باستاعان جىگىتتەر بىرنەشە رەت ايىپ الاڭىنا كىرىپ, اعىلشىن جانكۇيەرلەرىنىڭ زارەسىن ۇشىرۋمەن بولدى. بىراق وتكىر شابۋىلداردىڭ ءبىرى دە ناتيجە بەرگەن جوق.
ەكىنشى تايمدا اعىلشىندار قايتادان قاھارىنا ءمىندى. اۋەلەتە كوتەرىلگەن دوپقا ءبىرىنشى بولىپ جەتكەن ءحارري ماگۋاير ەسەپتى ەسەلەپ كەتتى. ال 50 مينۋتتا كەين دۋبل اۆتورى اتاندى. «ليۆەرپۋل» ليدەرى دجوردان حەندەرسون 63 مينۋتتا ۇلتتىق قۇراما ساپىنداعى العاشقى, بۇل ويىنداعى ءتورتىنشى گولدى سوعىپ, انگلياعا سەنىمدى جەڭىس سىيلادى.
اندرەي شەۆچەنكو كومانداسى مىناداي سەن تۇر, مەن اتايىن انگلياعا ەش امال جاساي العان جوق. كوماندالاردىڭ دەڭگەيى ويىن بويى ايىرىقشالانىپ تۇردى. كوممەنتاتور ايتپاقشى, دونەتسكىلىك «شاحتەر», كيەۆتىك «دينامو» ويىنشىلارى مەن «توتتەنحەم», «مانچەستەر يۋنايتەد», «مانچەستەر سيتي» ويىنشىلارىنىڭ دەڭگەيى البەتتە, جەر مەن كوكتەي بولماق. مۇنى ۋكراينا باس باپكەرى اندرەي شەۆچەنكو ويىنعا دەيىن اق مويىنداپ قويعانداي ەدى.
«قايتكەنمەن دە بۇل ءارتۇرلى دەڭگەي. اعىلشىن فۋتبولشىلارى ۇزدىك چەمپيوناتتاردا وينايدى. ولار ونداعى جۇكتەمەگە ۇيرەنگەن. ءبىزدىڭ فۋتبولشىلار ۋكراينا چەمپيوناتىندا دوپ تەبەدى جانە ەشقانداي ولاردىكىندەي قارقىن جوق.
قالىپقا كەلۋ تۋرالى ايتۋ قيىن. ارينە, ولاردىڭ جاعدايى بىزگە قاراعاندا ءتاۋىر. دەگەنمەن ىنتا, دۇرىس ءتاسىل, مەنتاليتەت جانە ءجۇز پايىز بەرىلىپ ويناۋ بولادى» دەگەن ەدى شەۆا «ۆەليكي فۋتبول» YouTube-كانالىنىڭ ەفيرىندە. باس باپكەردىڭ وسى ءسوزى كەلدى دە قويدى. ءوزى دە كوپتى كورگەن, الەمنىڭ كوزايىم اياقدوپشىسىنا اينالعان شەۆا ءبىلىپ ايتادى, البەتتە. ۋكراينانىڭ وسى كەزەڭگە دەيىن جەتكەنىنىڭ ءوزى عاجايىپ ءھام قۇرمەتتەۋگە تۇرارلىق.
فينال جولداماسى ءۇشىن انگليا دانيامەن وينايدى. ماتچ 7 شىلدە كۇنى لوندوندا وتەدى. كەزدەسۋ نۇر-سۇلتان ۋاقىتىمەن 01:00-دە باستالادى. قوس كوماندا دا توپتىق كەزەڭدە جارىتىپ گول سوقپاعان, ەسەسىنە پلەي-وفف كەزەڭىنەن باستاپ ەرەكشە كۇش العان ۇجىمدار قاتارىنا جاتادى. دانيا توپتىق كەزەڭنىڭ العاشقى ەكى ماتچىندا جەڭىلىپ, الايدا سوعان قاراماستان توپتان شىعىپ قانا قويماي, جارتىلاي فينالعا دا جەتىپ وتىر. ەۋروپا چەمپيوناتى وسىنداي كەرەمەتتەرىمەن باۋرايدى.
جارتىلاي فينالدىڭ كەلەسى جۇبى – يتاليا-يسپانيا. ماتچ 8 شىلدە كۇنى نۇر-سۇلتان ۋاقىتىمەن تۇنگى 01:00-دە باستالادى.
