وسى جىلدىڭ 1 قاڭتارىندا «دالا ءۋالاياتى گازەتىنىڭ» جارىق كورگەنىنە 126 جىل تولدى. بۇل تۋرالى «قازاقستان» تەلەارناسى حابارلادى.
باسىلىم ومبى قالاسىندا 1888 جىلدىڭ 1 قاڭتارىنان 1902 جىلدىڭ 12 ساۋىرىنە دەيىن قازاق, ورىس تىلدەرىندە «اكمولينسكيە وبلاستنىە ۆەدوموستا» گازەتىنە قوسىمشا رەتىندە شىعىپ تۇردى.
گازەتتىڭ قازاقشا نۇسقاسىنا ەشمۇحامەد ابىلايحانوۆ پەن دىنمۇحامەد سۇلتانعازين رەداكتورلىق جاسادى. باستاپقىدا جارتى باسپا تاباق كولەمىندە 4 بەت بولىپ اپتاسىنا ءبىر رەت باسىلعان گازەت, سەگىزىنشى نومىردەن باستاپ 1 باسپا تاباق كولەمىندە 8 بەت بولىپ شىقتى. ونىڭ بەيرەسمي بولىمىندە ىبىراي التىنسارين, شوقان ءۋاليحانوۆ تۋرالى ماتەريالدار باسىلدى. سونداي-اق, اباي, ءماشھۇر ءجۇسىپ كوپەەۆ, شاكارىم قۇدايبەردى ۇلى, ءاليحان بوكەيحانوۆ, بارلىبەك سىرتانوۆ, وتىنشى ءالجانوۆ, سادۋاقاس شورمانوۆ, جاعىپار ايمانوۆ, اسىلقوجا قۇرمانباەۆ, قوراباي جاپانوۆ, مۇحامەدجان سەرالين, جاقىپ اقباەۆ, امىرە ايتباقين جانە تاعى باسقالاردىڭ شىعارمالارى, حاتتارى مەن ماقالالارى جاريالانىپ تۇردى.
باسىلىم ماتەريالدارى تاۋەلسىزدىك جىلدارى بيبليوگراف-عالىم ۇشكىلتاي سۋبحانبەردينانىڭ قۇراستىرۋىمەن 4 كىتاپ بولىپ جارىق كوردى.
باقىتبەك كەنەش ۇلى.
دەرەككوز: «قازاقستان» تەلەارناسى
فوتو: «قازاقستان» تەلەارناسى.
