جامبىل وبلىسى اكىمىنىڭ ءباسپاسوز قىزمەتىنىڭ مالىمەتىنشە, جاڭا قونىس يەلەرىنىڭ قاتارىنا كوپبالالى جانە از قامتىلعان وتباسىلار كىردى.
وتباسىلارعا پاتەر كىلتتەرىن جامبىل وبلىسىنىڭ اكىمى بەردىبەك ساپارباەۆ سالتاناتتى تۇردە تابىس ەتتى.
«حالىقتى تۇرعىن ۇيمەن قامتاماسىز ەتۋ – مەملەكەتتىك ساياساتتىڭ باسىم باعىتتارىنىڭ ءبىرى. تۇرعىن ءۇي الۋ كەزەگىندە 30 مىڭنان استام جامبىلدىقتار تۇر. مەملەكەت باسشىسىنىڭ تاپسىرماسىنا سايكەس ءبىرىنشى كەزەكتە كوپ بالالى جانە از قامتىلعان وتباسىلار, قاجەتتىلىكتەرى شەكتەۋلى ادامدار پاتەر الادى. تۇرعىن ءۇي ماسەلەسىن شەشۋ ءۇشىن ءبىز جەرگىلىكتى كاسىپورىنداردىڭ مۇمكىندىكتەرىن دە پايدالانامىز. سوندىقتان, مۇمكىندىگىنشە كوپ تۇرعىن ءۇي سالۋعا نيەتتىمىز. «اسارلاتىپ ءۇي سالۋ» جوباسى ءوز جەمىسىن بەرۋدە. وتكەن جىلى 99 وتباسى اۋىلداستارى تۇرعىزعان ۇيلەردى سىيعا الدى. بيىل 134 ءۇيدىڭ قۇرىلىسى باستالدى. وڭىردە «باقىتتى وتباسى», «شاڭىراق» باعدارلامالارى ىسكە اسىرىلۋدا», دەدى وبلىس اكىمى.
ءبىرىنشى توپتاعى مۇگەدەك, كوپ بالالى انا ساعاتقۇل كەنجەبەكوۆا بۇل كۇندى 14 جىل كۇتتى.
«بۇگىنگى كۇن ءبىزدىڭ وتباسىمىز ءۇشىن ەڭ ماڭىزدى كۇن بولدى. بالالارعا جاڭا اۋدان وتە ۇنادى. مۇنداي ساتتەردە ءسىز مەملەكەتتىڭ ناقتى قامقورلىعىن سەزىنەمىز», دەدى ساعاتقۇل كەنجەبەكوۆا.
ايتا كەتسەك, جامبىل وبلىسىندا پرەزيدەنت قاسىم-جومارت توقاەۆتىڭ تاپسىرمالارىنا سايكەس ءومىر ساپاسىن ارتتىرۋعا باعىتتالعان باعدارلامالار جۇزەگە اسىرىلۋدا. اعىمداعى جىلى 4482 پاتەرلىك 76 تۇرعىن ءۇيدىڭ قۇرىلىسى جۇرگىزىلۋدە. جىل سوڭىنا دەيىن 2902 پاتەرلىك 50 تۇرعىن ءۇي پايدالانۋعا بەرىلمەك.
