ماسەلەن, وتكەن جىلى 1296 تۇلەك ۇبت-عا تىيىم سالىنعان زاتتاردى الىپ وتۋگە تىرىسسا, بيىل مۇنداي 756 جاعداي تىركەلدى. بۇل وتكەن جىلى ەرەجە بۇزۋعا تىرىسقان قاتىسۋشىلاردى تەستىلەۋگە جىبەرمەۋ تۋرالى نورمانىڭ ەنگىزىلۋى مەن ءاربىر تەستىلەنۋشى ءۇشىن بەينەباقىلاۋ كامەرالارىن ورناتۋمەن بايلانىستى.
«سونىمەن قاتار تەستىلەۋ كەزىندە ەرەجەلەردى بۇزعانى ءۇشىن 1305 ادام اۋديتوريادان شىعارىلىپ, ناتيجەلەرى جويىلدى. سونىمەن بىرگە ءبىز بارلىق بەينەجازباعا تالداۋ جاسايمىز. بۇل ءۇشىن تاعى ەكى اي بار. ەگەر تىيىم سالىنعان زاتتاردى پايدالانۋ فاكتىلەرى انىقتالسا, تالاپكەر ءبىلىم بەرۋ گرانتىنان ايىرىلادى. وتكەن جىلى ءبىز بۇل نورمانى العاش رەت قولدانىپ, 100-دەن استام تۇلەك گرانتتان ايىرىلدى. ۇبت-عا دايىندىق جانە تاپسىرۋ بارىسىندا ءبىز تالاپكەرلەردى بىرنەشە رەت اكادەميالىق ادالدىققا شاقىردىق. بۇل ولارعا بولاشاقتا جاقسى مامان بولۋعا مۇمكىندىك بەرەدى. الەمدىك تاجىريبە كورسەتىپ وتىرعانداي, ەرەجە بۇزۋشىلارعا قاتىستى ودان دا قاتاڭ شارالار قولدانىلادى. ويتكەنى بولاشاقتا مۇنداي ماماندار حالىقتى ەمدەپ, بالالارىمىزعا ءبىلىم بەرەدى», دەپ مالىمدەدى وكق بريفينگىندە قر بعم ۇلتتىق تەستىلەۋ ورتالىعى ديرەكتورىنىڭ م.ا. ناۋجان ديداربەكوۆا.
وتكەن جىلى بەينەجازبالار بويىنشا تالداۋ جۇرگىزىلىپ, 152 تەستىلەنۋشىنىڭ, ونىڭ ىشىندە 100 گرانت يەگەرىنىڭ ناتيجەسى جويىلدى. انىقتالعان بۇزۋشىلىقتار سالدارىنان بۇل ستۋدەنتتەر جوو-دا وقۋ مۇمكىندىگىنەن ايىرىلدى. بيىل ۇبت تاپسىرۋ پۋنكتتەرىندە العاش رەت ءۇش ساتىلى تۇلعانى انىقتاۋ جۇيەسى ەنگىزىلدى. تەست تاپسىرۋشىلار جەكە كۋالىگىن ۇسىنىپ, Face-ID جۇيەسى ارقىلى تەكسەرىلدى. سونداي-اق ءاربىر تەستىلەنۋشىنىڭ الدىندا كامەرا ورناتىلدى. وسى شارالاردىڭ بارلىعى تەستىلەۋدى تاپسىرۋ ءراسىمىنىڭ اشىقتىعىن قامتاماسىز ەتتى.
«تەست تاپسىرۋعا ءوز ورنىنا بوگدە ادامداردى كىرگىزۋگە تىرىسقاندار دا بولدى. ەگەر وتكەن جىلى وسىنداي 7 فاكتى انىقتالسا, بيىل Face-ID جۇيەسى مەن باقىلاۋدى كۇشەيتۋدىڭ ناتيجەسىندە 18 جاعداي انىقتالدى. ماسەلەن, 4 تالاپكەردىڭ ورنىنا تەستىلەۋگە ەلوردالىق ەكى جوعارى وقۋ ورنىنىڭ 4 ستۋدەنتى قاتىسپاق بولعان. بۇل ءۇشىن ءتىپتى جالعان قۇجاتتار جاساتقان. تەستىلەنۋشىلەر مەن تەستىلەۋگە كىرۋگە تالپىنعان بوگدە تۇلعالار بويىنشا بارلىق دەرەك قۇقىق قورعاۋ ورگاندارىنا جىبەرىلدى. ولارعا قاتىستى قىلمىستىق ءىس قوزعالدى», دەدى ناۋجان ديداربەكوۆا.
تەستىلەۋ بارىسىندا كەيبىر تالاپكەرلەردەن جاسىرىن كامەرالار, شاعىن قۇلاققاپتار, سمارتفوندار جانە باسقا دا تىيىم سالىنعان زاتتار تاركىلەندى. ۇبت-2021 قاۋىپسىزدىك شارالارى مەن كارانتين تالاپتارىن ساقتاي وتىرىپ, قالىپتى رەجيمدە ءوتتى. ءبىلىم بەرۋ گرانتتارىن تاعايىنداۋدىڭ سوڭعى ناتيجەلەرى تامىز ايىندا بەلگىلى بولادى.
