قوعام • 03 شىلدە، 2021

Nur Otan ەڭبەك ۆيتسە-ءمينيسترىن پارتيالىق جاۋاپكەرشىلىككە تارتادى

52 رەت كورسەتىلدى

«Nur Otan»-نىڭ پارتيالىق باقىلاۋ كوميتەتىنىڭ كەزەكتى وتىرىسىندا جۇمىسپەن قامتۋدىڭ جالعان فاكتىلەرى، جۇمىسپەن قامتۋ ورتالىقتارىنىڭ ەسەبىندەگى ايلا-شارعىلار، بيۋدجەتتىك نەسيەلەردى ماقساتسىز پايدالانۋ،  «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ مەملەكەتتىك باعدارلاماسىنىڭ ورىندالۋ ماسەلەلەرى تالقىلاندى، دەپ حابارلايدى Egemen.kz. 

كوميتەت مۇشەسى، ءماجىلىس دەپۋتاتى ءاليا ابسەمەتوۆانىڭ ايتۋىنشا، باعدارلامانى جۇزەگە اسىرۋ ءۇشىن سوڭعى 4 جىلدا رەسپۋبليكالىق بيۋدجەتتەن شامامەن 600 ملرد. تەڭگە بولىنگەن. الايدا باعدارلامانىڭ نىسانالى ينديكاتورلارى ءبىر-بىرىنە ۇقساپ قانا قويماي، كوبىنەسە ءبىر-ءبىرىن اينا قاتەسىز قايتالايدى. بۇل، ارينە، قازىنا قارجىسىن بوسقا شاشۋ.

سونىمەن قاتار، كوميتەت مۇشەلەرى ازاماتتاردى جۇمىسقا تەك قاعاز جۇزىندە قابىلداۋ فاكتىلەرىن انىقتادى. 2019 جىلى 118،8 مىڭ ازاماتتىڭ جۇمىسپەن جالعان قامتىلعانى بەلگىلى بولدى. بۇل تۇراقتى جۇمىسقا ورنالاسقانداردىڭ جالپى سانىنىڭ 31%-ىن قۇرايدى.

«ماسەلەن، جۇمىس بەرۋشىلەر ءوز قىزمەتكەرلەرىن جۇمىستان شىعارىپ، ولاردى جۇمىسپەن قامتۋ ورتالىقتارى ارقىلى الەۋمەتتىك جۇمىس ورىندارىنا قايتا جۇمىسقا الادى. ناتيجەسىندە ادامدار بۇرىنعىداي جۇمىسىن ىستەي بەرەدى، بىراق مەملەكەت ولاردىڭ تابىسىنىڭ 35%-ن سۋبسيديالايدى. وسىلايشا، جۇمىس بەرۋشى وزىنەن جاۋاپكەرشىلىك پەن شىعىنداردى الىپ تاستايدى»، دەدى ءاليا ابسەمەتوۆا.

Nur Otan ءباسپاسوز قىزمەتى جاپپاي كاسىپكەرلىكتى دامىتۋدا دا جاعداي ءماز ەمەس ەكەنىن جازادى. پارتيالىق باقىلاۋ كوميتەتىنىڭ اقپاراتى بويىنشا، پروكۋراتۋرا ورگاندارى 1،3 ملرد. تەڭگە نەسيە نەگىزسىز بەرىلگەن 341 فاكتىنى، سومماسى 555،3 ملن. تەڭگەنى قۇرايتىن بيۋدجەتتىك نەسيە ماقساتسىز پايدالانىلعان 180 فاكتىنى انىقتادى.

«كاسىپكەرلەردىڭ باسىم بولىگى بيۋدجەتتىك نەسيە العاننان كەيىن بىردەن ءوز قىزمەتىن توقتاتادى. سونىمەن قاتار، ءتيىستى باقىلاۋدىڭ بولماۋى سالدارىنان ادامدار بيۋدجەتتىك نەسيە ەسەبىنەن باسقا بانكتەردەگى قارىزدارىن جاۋىپ، ءۇي مەن كولىك ساتىپ الادى»، دەيدى ءا.ابسەمەتوۆا.

«ەڭبەك» باعدارلاماسى اياسىنداعى جاستار تاجىريبەسىنىڭ تيىمدىلىگى دە ماردىمسىز. ماماندىق بويىنشا بيۋدجەت ەسەبىنەن وقىتىلعانداردىڭ 25%-ى عانا جۇمىسقا ورنالاسادى.

كوميتەت توراعاسى، ءماجىلىس دەپۋتاتى ارتۋر پلاتونوۆتىڭ ايتۋىنشا، جۇمىسپەن قامتۋ سياقتى ماڭىزدى سالادا جاۋاپسىزدىق پەن بيۋروكراتيزم فاكتىلەرىنىڭ سانىنا جەتە المايسىڭ.

«وسى سالاعا جاۋاپتى ورتالىق جانە جەرگىلىكتى بيلىك ورگاندارىنىڭ لاۋازىمدى تۇلعالارى كوبىنە كورسەتكىشتەردىڭ سوڭىنا ءتۇسىپ، ناقتى احۋالدىڭ وزدەرى ادەمىلەپ «بوياعان» ەسەپتەردەن ايىرماشىلىعى كوپ ەكەنىن بايقامايدى»، دەدى ارتۋر پلاتونوۆ.

ءوز كەزەگىندە ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ سوڭعى 4 جىلدا «ەڭبەك» باعدارلاماسى اياسىندا تۇراقتى جۇمىسقا 1،4 ملن. استام ادام ورنالاستىرىلعانىن، بەيرەسمي جۇمىسپەن قامتىلعاندار سانى 400 مىڭ ادامعا قىسقارعانىن، ال جۇمىسسىزدىق دەڭگەيى 4،9% دەڭگەيىندە ساقتالعانىن حابارلادى. سونداي-اق، مينيستر مەملەكەتتىك باعدارلامانى جەتىلدىرۋ بويىنشا ۆەدومستۆو اتقارىپ جاتقان شارالار تۋرالى ايتىپ بەردى.

«جۇمىسپەن قامتۋدىڭ جالعان فاكتىلەرىمەن كۇرەسۋ ءۇشىن وسى جىلدىڭ مامىر ايىنان باستاپ جۇمىسسىز رەتىندە تىركەلۋ، بيۋدجەتتىك نەسيە الۋعا ءوتىنىم بەرۋ جانە وزگە دە قىزمەتتەر ەلەكتروندىق ەڭبەك بيرجاسى ارقىلى ونلاين فورماتتا كورسەتىلەدى. ال ازاماتتاردىڭ ەڭبەك موبيلدىلىگىنە ىقپال ەتۋ ءۇشىن كوشۋگە بەرىلەتىن سۋبسيديا مولشەرى 35-تەن 70 اەك-كە دەيىن ۇلعايتىلدى»،  دەدى مينيستر.

وتىرىس قورىتىندىسى بويىنشا پارتيالىق باقىلاۋ كوميتەتى ەڭبەك مينيسترلىگى مەن ۇلتتىق ەكونوميكا مينيسترلىگىنىڭ «ەڭبەك» باعدارلاماسىن جۇزەگە اسىرۋ بولىگىندەگى جۇمىسىن قاناعاتتانارلىقسىز دەپ تانۋعا قاۋلى ەتتى. ەڭبەك ۆيتسە-ءمينيسترى ەرجان ءبىرجانوۆتى «ەسكەرتۋ» تۇرىندەگى پارتيالىق جاۋاپكەرشىلىككە، سونداي-اق قاراعاندى جانە تۇركىستان وبلىستارىنداعى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارمالارىنىڭ باسشىلارى اسەم جۇنىسپەكوۆا مەن ءاسيا تەمىرباەۆاعا «ەسكەرتپە» تۇرىندەگى پارتيالىق جازا قولدانۋ ۇسىنىلدى.

بۇدان باسقا، كوميتەت ەڭبەك جانە ۇلتتىق ەكونوميكا مينيسترلىكتەرىنە جۇمىسپەن قامتۋ باعدارلاماسىن باعالاۋ ادىستەمەسىن ازىرلەۋدى جانە بەكىتۋدى، ونى ساراپشىلىق جانە عىلىمي ورتادا تالقىلاۋدى، سونداي-اق، جىل سايىن باعدارلامانى جۇزەگە اسىرۋ ناتيجەلەرىنىڭ اشىق قولجەتىمدى كوزدەردە جاريالانۋىن قامتاماسىز ەتۋدى ۇسىندى.

سوڭعى جاڭالىقتار

وتكەن تاۋلىكتە 8 ادام كۆي جۇقتىردى

كوروناۆيرۋس • بۇگىن، 10:35

ۇقساس جاڭالىقتار