ەندى زەينەتاقى مەن جاردەماقىلاردى, اتاۋلى الەۋمەتتىك كومەكتى رەسىمدەۋ, الەۋمەتتىك قىزمەتتەر پورتالىنىڭ جۇمىسى, ەڭبەك قاتىناستارى جانە حالىقتى جۇمىسپەن قامتۋ ماسەلەلەرى بويىنشا قاجەتتى اقپارات الۋ ءۇشىن ابونەنتتەر 5-قوسىمشا ءنومىرىن باسا وتىرىپ, 1414 بىرىڭعاي بايلانىس ورتالىعىنا جۇگىنە الادى.
«1414 تەحنيكالىق پلاتفورماسىنا كوشۋ «جوعالىپ كەتەتىن» قوڭىراۋلاردىڭ ۇلەسىن ازايتۋعا مۇمكىندىك بەرەدى. سونىمەن قاتار ءبىز بۇرىن 1411 جەلىسىنىڭ جۇمىسىنا كەتكەن شىعىنداردى دا وڭتايلاندىرامىز. قازىر ءبىز كوپ ارنالى جۇيەنى پايدالانىپ وتىرعانىمىزدىڭ ارقاسىندا, تەك اۋديو قوڭىراۋلاردى عانا ەمەس, ماتىندىك حابارلاردى دا قابىلداۋ مۇمكىندىگى ارتتى. قازاقستاندىقتار @kenes1414bot تەلەگرامم بوتىنىڭ «زەينەتاقىمەن قامسىزداندىرۋ» بولىمىندە وپەراتورعا الەۋمەتتىك-ەڭبەك سالاسى ماسەلەلەرى بويىنشا حابارلاما جىبەرىپ, سول جەردەن جاۋاپ الا الادى. ال 1411 ءنومىرى ەندى جۇمىس ىستەمەيدى», دەدى «ازاماتتارعا ارنالعان ۇكىمەت» باسقارما توراعاسىنىڭ ءبىرىنشى ورىنباسارى سۇيەنىش ءابدىلدين.
الەۋمەتتىك-ەڭبەك سالاسى ماسەلەلەرى بويىنشا 1414 بىرىڭعاي بايلانىس ورتالىعىنان دۇيسەنبىدەن جۇماعا دەيىن ساعات 9.00-دەن 18.30-عا دەيىن جانە سەنبى كۇنى ساعات 9.00-دەن 13.00-گە دەيىن كەڭەس الۋعا بولادى. قوڭىراۋ شالۋ تەگىن.
