29 ماۋسىم كۇنى باۋىرلاس رەسپۋبليكانىڭ اسكەري دەلەگاتسياسى قازاقستان رەسپۋبليكاسى ۇلتتىق ۇلانىنىڭ جوعارى قولباسشىلىعىندا بولدى. ولاردىڭ قازاقستان رەسپۋبليكاسى ۇلتتىق ۇلانىنىڭ باسشىلىعىمەن كەزدەسۋى كەزىندە بريفينگ وتكىزىلىپ, وندا ۇلتتىق ۇلاننىڭ باس قولباسشىسى گەنەرال-لەيتەنانت رۋسلان جاقسىلىقوۆ قوناقتارعا قۇرىلىم تۋرالى, اتقارىلعان مىندەتتەرى مەن اسكەردىڭ دامۋ پەرسپەكتيۆالارى جايلى ەگجەي-تەگجەيلى ايتىپ بەردى. سونىمەن قاتار, قوعامدىق قاۋىپسىزدىك پەن قۇقىقتىق ءتارتىپتى قامتاماسىز ەتۋ سالاسىندا بىرلەسكەن جاتتىعۋلار (ترەنينگتەر) وتكىزۋ, قوس تاراپ ۇيىمداستىرعان سپورتتىق جارىستارعا ەكى جاق ۆەدومستۆولارى وكىلدەرىنىڭ قاتىسۋى سياقتى ماسەلەلەر قارالدى.
كەزدەسۋدە دەلەگاتسيا باسشىسى گەنەرال-مايور رۋستام دجۋراەۆ قازاق-وزبەك قاتىناستارى تەرەڭ تاريحي تامىرى مەن ورتاق رۋحاني قۇندىلىقتارى بار ءبىزدىڭ حالىقتارىمىزدىڭ دوستىعى مەن باۋىرلاستىعىنان كۇش الاتىندىعىن اتاپ ءوتتى.
ەلورداداعى ءىس-ساپار بارىسىندا وزبەكستاندىق اسكەريلەر قازاقستان رەسپۋبليكاسى ۇلتتىق ۇلانىنىڭ استانالىق جەدەل بريگاداسىندا بولدى. قوناقتارعا اسكەري قالاشىقتىڭ ينفراقۇرىلىمى, اسكەري تەحنيكاسى مەن قارۋ-جاراق ۇلگىلەرى, سونداي-اق باسقا دا نىساندار كورسەتىلدى.
دەلەگاتسيانىڭ جۇمىس ساپارى وڭتۇستىك استانادا اياقتالدى, وندا وزبەكستاننان كەلگەن اسكەريلەر ىشكى ىستەر مينيتسرلىگى مەن ۇلتتىق ۇلان ارنايى جاساقتارىنىڭ جاۋىنگەرلىك-ادىستەمەلىك دايارلاۋ ورتالىعىنىڭ مۇمكىندىكتەرىمەن تانىستى.
ساپار بارىسىندا قازاقستان رەسپۋبليكاسى ۇلتتىق ۇلانىنىڭ اسكەري ينستيتۋتى مەن وزبەكستان رەسپۋبليكاسى ۇلتتىق ۇلانىنىڭ اسكەري-تەحنيكالىق ينستيتۋتى اراسىندا ىنتىماقتاستىق مەموراندۋمىن جاساۋ ماسەلەسى دە پىسىقتالدى.
