سەسسيا قاتىسۋشىلارىنىڭ ايتۋىنشا, قازىرگى تاڭدا قازاقستان ەلەكتروندى كوممەرتسيانىڭ قارقىندى ءوسىم الدىندا تۇر. 2020 جىلى شوب وكىلدەرىنىڭ كوپشىلىگى العاش رەت ونلاينعا شىقتى. ال تاجىريبەلى ينتەرنەت ساتۋشىلار نارىقتاعى ءوز ورىندارىن كەڭەيتە باستادى. ناتيجەسىندە وتكەن جىلى ونلاين ساۋدا مەن قارجى اينالىمى ايتارلىقتاي ارتتى. PwC Kazakhstan زەرتتەۋىنشە, 2020 جىلدىڭ العاشقى 9 ايىندا قازاقستانداعى كوتەرمە ەلەكتروندى ساۋدا كولەمى الدىڭعى جىلدىڭ سايكەس ۋاقىتىمەن سالىستىرعاندا 93% كوبەيىپ, 198 ملرد تەڭگەدەن 382 ملرد تەڭگەگە جەتكەن. ال ورتاشا تۇبىرتەك 63% ءوسىپ, ترانزاكتسيا كولەمى 18% ۇلعايعان.
سەسسياعا قر ساۋدا جانە ينتەگراتسيا ۆيتسە-مينيستر اسەل جاناسوۆا, PwC ەۋرازيا وڭىرىندەگى كونسۋلتاتسيالىق قىزمەت بويىنشا سەرىكتەسى ناتاليا ليم, Mastercard ورتالىق ازياداعى باس ديرەكتورى رافال ترەپكا, Wildberries حالىقارالىق ىنتىماقتاستىق بويىنشا ديرەكتورى دۋحانين الەكسەي, Lamoda قازاقستان باس ديرەكتورى ءمولدىر رىساليەۆا, Froot.kz باس ديرەكتورى رۋلا رايم جانە Forte Market باس مەنەدجەرى دميتري كوميسسار قاتىستى. ولار ەلەكتروندى كوممەرتسيانى قولداۋ مەن دامىتۋ اياسىنداعى مەملەكەت باسىمدىلىقتارىن تالقىلاپ, ونلاين تولەمدەگى سوڭعى ۇردىستەر تۋرالى ايتىپ, جەرگىلىكتى جانە حالىقارالىق نارىقتاعى ەرەكشەلىكتەر مەن ونداعى كەي قيىندىقتار جانە قازاقستانداعى ەلەكتروندى ساۋدانىڭ بولاشاعى تۋرالى ءوز ويلارىن ورتاعا سالدى.
قر ساۋدا جانە ينتەگراتسيا ۆيتسە-مينيستر اسەل جاناسوۆا Mastercard پەن احقو Fintech Hub بىرلەسە وتىرىپ جاسالعان SmartDuken (شوب-قا ارنالعان ەلەكتروندى ساۋدا مەكتەبى) پلاتفورماسىنىڭ ىسكە قوسىلاتىنىن حابارلادى. SmartDuken – كاسىپكەرلەردىڭ ءوز ىستەرىن كەڭەيتىپ, دامىتۋعا جانە جاڭادان قۇرۋىنا مۇمكىندىك بەرەتىن الاڭ. پلاتفورما شوب-قا تەگىن كومەك بەرەدى. اتاپ ايتقاندا تەگىن ءبىلىم بەرۋ كۋرستارىن, ۆەبينارلاردى قامتيدى جانە سەرىكتەستەردى (IT-قۇرالدار, CRM, تولەم جۇيەلەرى, سايت قۇراستىرۋشىلار مەن وزگەلەر) تەگىن ۇسىنادى. سونىمەن قاتار شاعىن جانە ورتا بيزنەسكە ارنالعان بيزنەس اكسەلەراتوردى قامتيدى. اكسەلەراتور بيزنەستى ونلاينعا شىعارۋعا جانە كەڭەيتۋگە مۇمكىندىك بەرەدى. الاڭنىڭ ماقساتى – بيزنەستى ونلاينعا اۋىستىرۋعا كومەكتەسۋ.
