كيىمنىڭ ديزاينەرى – Salta برەندىمەن تانىمال سالتانات بايمۇحامەدوۆا. قازاقستاندىق اتلەتتەرگە ارنالعان سپورتتىق كيىم ۇلگىسىن يسپاندىق Joma كومپانياسى جاسادى.
وليمپياداعا ارنالعان فورمانى دايىنداۋ كەزىندە كيىم ديزاينى, ماتالار مەن كيىم ەلەمەنتتەرىن سپورتشىلاردىڭ وزدەرى تاڭدادى. وسى جىلدىڭ قاڭتار ايىنان باستاپ ەلىمىزدىڭ جەتەكشى سپورتشىلارى وليمپيادالىق كيىم-كەشەكتەردى تاڭداۋعا ارنالعان تالقىلاۋعا, تانىستىرۋلار مەن كەزدەسۋلەرگە قاتىسقان بولاتىن.
ء«اربىر سپورتشى ءۇشىن وليمپيادا ويىندارى – بۇل سپورتتىق مانساپتاعى ەڭ ماڭىزدى وقيعا, ورىندالعان ارمان, كوپتەگەن جىلدار بويى قاجىرلى جانە ۇزاق جاتتىعۋلاردىڭ ناتيجەسى. توكيوداعى وليمپيادا ويىندارى – سپورتشىلاردىڭ قازىرگى بۋىنى ءۇشىن كوپتەن كۇتكەن وقيعا. توكيوداعى وليمپيادا ويىندارىنا قاتىستى بارلىق ماسەلە وتكەن جىلدان باستاپ بەلگىسىزدىكپەن بىرگە ءجۇردى. وليمپيادانى كەيىنگە قالدىرۋ, لوكداۋندار, جارىستارداعى تاجىريبەنىڭ بولماۋى, بىلىكتىلىك تۋرنيرلەرىن كەيىنگە قالدىرۋ نەمەسە جويۋ. ءبىزدىڭ مىندەتىمىز سپورتشىلارىمىز ءۇشىن بارلىق جاعىنان, سونىڭ ىشىندە وليمپيادالىق كيىم سياقتى ماسەلەلەردە بارىنشا قولايلى جاعداي جاساۋ بولدى. سوندىقتان ۇلتتىق فورمانى تاڭداۋ قۇقىعى قۇرامىنا 35 سپورتشى كىرەتىن كوميسسياعا بەرىلدى», دەلىنگەن قر ۇوك مالىمدەمەسىندە.
«وليمپيادالىق كيىم قانداي بولاتىنىن تاڭداماس بۇرىن, سپورتشىلاردىڭ وزدەرىنەن پىكىر سۇرادىق. ءبىز ماتالاردى تاڭداۋعا قاتىستىق, ەسكيزدەردى تالقىلادىق, ۇسىنىستار جاسادىق. وليمپيادا ويىندارىندا تەك سىرتقى ءتۇرى عانا ەمەس, سونىمەن قاتار كيىمنىڭ تيىمدىلىگى مەن ساپاسى دا وتە ماڭىزدى», دەدى دزيۋدوشى, ريو وليمپياداسىنىڭ جۇلدەگەرى ەلدوس سمەتوۆ.
وليمپياداعا ارنالعان سپورتتىق كيىمگە ۇسىنىلعان ستيل – تالعامپاز كەجۋال سپورت. ديزاينەرلەر كوللەكتسيانىڭ ىڭعايلىلىعىنا, بەرىكتىگىنە, وزەكتىلىگىنە كەپىلدىك بەرە وتىرىپ, ۇسىنىلعان كيىمدەردىڭ كۇتىمى وڭاي ەكەنىن اتاپ ءوتتى.
سپورتشىلار فورمانى وليمپيادا ويىندارىنىڭ اشىلۋ شەرۋى مەن باسقا دا سالتاناتتى ءىس-شارالار كەزىندە كيەدى. سالتاناتتى فورما تۇجىرىمداماسى ءبىزدىڭ زاماناۋي مادەني كودىمىزدى ايقىنداپ كورسەتەدى.
ماتالاردى تاڭداۋ كەزىندە جىلدىڭ وسى ۋاقىتىنداعى جاپونيانىڭ كليماتتىق ەرەكشەلىكتەرى دە ەسكەرۋسىز قالمادى. وليمپيادالىق كيىمدەر اۋانى جاقسى وتكىزەدى, ىلعالدى سىڭىرەدى, تەز كەبەدى جانە اللەرگيا تۋدىرمايدى. سالتاناتتى كيىمنىڭ نەگىزگى تۇستەرى – كوك, كوگىلدىر جانە اق ءتۇستى بولماق.
