وبلىس اكىمدىگىنىڭ قولداۋىمەن قولعا الىنعان ەكسپەديتسيالىق قازبا جۇمىستارىنا وبلىستىق تاريحي-ولكەتانۋ مۋزەيىنىڭ جانە وبلىستىق ءبىلىم باسقارماسى جانىنداعى تۋريزم, ولكەتانۋ جانە ەكولوگيا ورتالىعىنىڭ عىلىمي قىزمەتكەرلەرى, بەلگىلى عالىمدار, زەرەندى, جاقسى جانە اتباسار اۋداندارىنان كەلگەن ستۋدەنتتەر مەن وقۋشىلار قاتىسۋدا.
2021 جىلدىڭ 15 ماۋسىمىندا باستالعان ارحەولوگيالىق قازبا جۇمىستارى تاريح عىلىمدارىنىڭ دوك-
تورى, پروفەسسور ۆيكتور زايبەرتتىڭ جەتەكشىلىگىمەن جۇزەگە اسىرىلۋدا. وسى ولكەدە بوتاي مادەنيەتىنە جاتاتىن ەجەلگى قونىستىڭ بارى سوناۋ 1990 جىلدارى بەلگىلى بولىپتى. 2000 جىلداردىڭ باسىندا قازاقستان مەن اقش-تىڭ عالىمدارى ەكسپەديتسيالىق زەرتتەۋ جۇرگىزگەن. وندا تاريحي ەسكەرتكىشتىڭ ولشەمدەرى بەلگىلەنگەن. قازبا جۇمىستارىنىڭ اۋقىمى 38 شارشى مەتردى قۇرايدى. عالىمداردىڭ العاشقى بولجامىنا قاراعاندا, ەلۋگە جۋىق شۇڭقىرلار كونە زامانداعى تۇرعىن ۇيلەردىڭ ورنى بولۋى مۇمكىن.
– قازۋ بارىسىندا توپىراقتىڭ العاشقى قاباتتارىنان ميكروليتتەر, قىرعىشتار, ءسال تەرەڭىرەك قازا باستاعانىمىزدا, وستەولوگيالىق ماتەريالدار, نەگىزىنەن جىلقى سۇيەكتەرى تابىلدى. سونداي-اق ماتەريالداردىڭ اراسىندا تەرى يلەيتىن قىرعىشتار, قىش ىدىستاردىڭ سىنىقتارى, جەبەلەر مەن نايزالاردىڭ ۇشتارى, تاسبالتالاردىڭ سىنعان بولىكتەرى, قايراقتار كەزدەسۋدە. بۋراباي مەن زەرەندى اۋداندارىندا دا بوتايلىقتاردىڭ قورىمدارى تابىلعانى بەلگىلى, ءبىرجان سال اۋدانىندا دا وسىنداي مادەنيەت انىقتالىپ وتىر, – دەيدى وبلىستىق تاريحي-ولكەتانۋ مۇراجايىنىڭ اعا عىلىمي قىزمەتكەرى, ەكسپەديتسيانىڭ عىلىمي جەتەكشىسى جاسۇلان ۇكەەۆ.
ەجەلگى داۋىردەن سىر شەرتەتىن تاريحي مۇرانى زەرتتەۋگە باعىتتالعان جوباعا وبلىس بيۋدجەتىنەن 4 ميلليون تەڭگە قارجى ءبولىنىپتى. ەكسپەديتسيا 1,5-2 اي ىشىندە اياقتالادى دەپ كوزدەلۋدە. قازبا جۇمىستارى قولعا الىنعالى الاڭنان 50-گە تارتا ارتەفاكتى تابىلعان. ولاردى عىلىمي زەرتتەۋ ءۇشىن الماتى جانە قاراعاندى قالالارىنداعى زەرتحانالارعا جولداماق. ال دنك تالداۋلارىن انىقتاۋ ءۇشىن شۆەتسيانىڭ ۋپپسالا قالاسىنداعى زەرتحانامەن كەلىسىم جاسالعان.
كوكشەتاۋ
