جاعىمسىز حاباردىڭ تاعى ءبىرى شىمكەنتتىكتەردەن جاڭا شتامنىڭ انىقتالعانى بولىپ وتىر. شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان بەيسەنبىنىڭ ساسكەسىندە الەۋمەتتىك جەلىدە جايسىز حاباردى جاريا ەتتى.
«جاڭا شتامنىڭ ءتۇرى جامان, تەز تارايدى, جۇققان ادامنىڭ اۋرۋى تەز اسقىنىپ كەتەدى. اتا-اناڭىز بەن بالالارىڭىزدى ساقتاپ ءجۇرىڭىز. بالالار اراسىنان دا كوپ شىعىپ جاتىر. بۇگىن تۋعانىنا ءبىر اي تولماعان سابيدەن تابىلدى», دەدى الەۋمەتتىك جەلىدەگى جازباسىندا اكىمنىڭ ورىنباسارى.
ال ءتۇس اۋا شىمكەنت قالاسىنىڭ باس مەملەكەتتىك سانيتار دارىگەرى ءابدىماناپ تولەباەۆ مەگاپوليستە ىندەت جۇقتىرعاندار اراسىنان «دەلتا» شتامى انىقتالعانىن مالىمدەدى.
«قازىر تەكسەرۋ جۇرگىزىلۋدە. ءبىز ناۋقاستاردىڭ سىنامالارىن جىبەردىك. دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتىنىڭ ۇلتتىق ساراپتاما ورتالىعىندا زەرتتەۋ جۇمىستارى جۇرگىزىلۋدە. دەگەنمەن «دەلتا» شتامى شىمكەنتكە دە جەتتى دەۋگە نەگىز بار», دەدى ءا.تولەباەۆ.
سونداي-اق ول سوڭعى تاۋلىكتە انىقتالعان 143 ىندەت جۇقتىرعانداردىڭ 14-ءى 14 جاسقا دەيىنگى بالالار ەكەنىن, ولار نەگىزىنەن اتا-انالارىنان جۇقتىرعانىن ناقتىلادى.
«قالادان مپك لابوراتورياسىندا قايتا تەكسەرىلگەن 20 سىنامانىڭ, ياعني ۆيرۋستىڭ مۋتاتسياسىنىڭ ءتۇرىن زەرتتەۋگە ناۋقاستاردان الىنعان 20 ۇلگىنىڭ 7-ۋىنەن «دەلتا» شتامى انىقتالىپ وتىر. شىمكەنت قالاسىندا سوڭعى ەكى اپتا ىشىندە كوروناۆيرۋس اۋرۋشاڭدىعىنىڭ 908 جاعدايى تىركەلدى, ونىڭ ىشىندە سيمپتومدى – 637 (70,2%), سيمپتومسىزى – 271 (29,8%). 18 جاسقا دەيىنگىلەر اراسىندا 148 جاعداي تىركەلگەن. وتكەن جىلدىڭ وسى كەزەڭىمەن سالىستىرعاندا بيىل ەرەسەكتەردىڭ اراسىندا اۋرۋشاڭدىقتىڭ سيمپتومسىز ءتۇرى 3,2 ەسە مەن بالالار اراسىندا 4,4 ەسە جوعارى تىركەلۋدە», دەيدى ءا.تولەباەۆ.
قالانىڭ «قىزىلعا» ءوتۋى جانە جاڭا شتامنىڭ تابىلۋى كوپشىلىككە دە وي سالىپ وتىر. بۇل ورايدا ءبىر تاۋلىك ىشىندە قالادا 7 558 ادام ۆاكتسينا الدى. ونىڭ ىشىندە ءبىرىنشى كومپونەنتپەن 4 304, ەكىنشى كومپونەنتپەن 3 254 ادام ۆاكتسينا سالدىردى. ەگۋ ناۋقانى باستالعالى بارلىعى 263 358 ادام ەكپە سالدىرعان. ونىڭ ىشىندە 159 895 ادام ۆاكتسينانىڭ ەكى كومپونەنتىن الدى. سونداي-اق شىمكەنت قالاسىنىڭ اكىمى مۇرات ايتەنوۆ سالا ماماندارى مەن اۋدان اكىمدەرىنە تۇرعىنداردىڭ ۆاكتسيناعا دەگەن وڭ كوزقاراسىن قالىپتاستىرۋ ءۇشىن ءتۇسىندىرۋ جۇمىستارىن كۇشەيتۋدى مىندەتتەدى.
«ۆاكتسينالاۋعا 753 مەديتسينا قىزمەتكەرى وقىتىلىپ, جۇمىلدىرىلدى. بۇگىندە ۆاكتسينا الاتىن كونتينگەنتتىڭ 47%-ىنا ۆاكتسينا سالىندى. ەكپە ەگۋ قارقىنىن باسەڭدەتپەي, ءتۇسىندىرۋ جۇمىستارىن كۇشەيتۋ كەرەك. سوزىلمالى اۋرۋى بار ازاماتتار مەن مادەنيەت, ءوندىرىس, قىزمەت كورسەتۋ, ءبىلىم جانە ستۋدەنتتەر مەن قۇرىلىسشىلاردى ۆاكتسينالاۋ كەرەك», دەدى قالا اكىمى.
سونداي-اق مۇرات ايتەنوۆ اۋدان اكىمدەرىنە پاندەميا كەزىندە كاسىپكەرلەرگە جۇمىس ىستەۋگە مۇمكىندىك بەرەتىن Ashyq جوباسىنا كوشۋدى ۇيىمداستىرىپ, ەپيدەميالىق جاعدايدىڭ قانشالىقتى كۇردەلى ەكەنىن بىلە تۇرا توي جاسايتىنداردى توقتاتۋ كەرەك ەكەنىن ايتتى.
تويدى مۇلدە توقتاتۋ قيىنداۋ بولىپ تۇرعانى راس. قالا اۋماعىندا سانيتارلىق-ەپيدەميالىق تالاپتاردىڭ ساقتالۋى بويىنشا مونيتورينگ جۇرگىزەتىن 20 موبيلدىك توپ 30 ماۋسىمدا 201 نىسانعا تەكسەرۋ جۇمىستارىن جۇرگىزگەن. ونىڭ ىشىندە 7 نىساندا كارانتين رەجىمىنىڭ تالاپتارى بۇزىلعانى انىقتالىپ, اكىمشىلىك حاتتامالار تولتىرىلدى. ال 27 ماۋسىمدا شىمكەنت قالاسىندا ورنالاسقان «اقباستاۋ» مەيرامحاناسى كارانتيندىك شەكتەۋلەردى بۇزىپ, كەلۋشىلەردى قابىلداپ جاتقانى انىقتالعان. سونداي-اق ءدامحانالاردىڭ بىرىندە 100 ادامعا ارنالعان قىز ۇزاتۋ تويىن وتكىزىپ جاتقانى بەلگىلى بولدى. اتالعان جايت بويىنشا كارانتين تالاپتارىن ساقتاماي, جۇمىسىن جالعاستىرعان ءدامحانا اكىمشىسىنەن تۇسىنىكتەمە الىنعان. ءال-فارابي اۋدانى اكىمى اپپاراتىنىڭ قىزمەتكەرلەرى قالالىق پوليتسيا دەپارتامەنتى ماماندارىمەن بىرگە مەيرامحانالارعا جۇرگىزگەن كەزەكتى رەيد بارىسىندا تۇرعىنداردىڭ اۋدان اۋماعىنا قاراستى «مەرەي», «شىمكەنت-حولل», «تەرىسكەي», «نارلەن» مەيرامحانالارىندا قۇدالىق, بەتاشار, ۇزاتۋ سىندى توي وتكىزىلگەنىن انىقتاپ, ولارعا توسقاۋىل قويدى. دەمالىس كۇندەرى 84 كاسىپكەرلىك نىسانعا رەيد جۇرگىزىلىپ, كارانتين تالاپتارى ساقتالماعان 9-ىنا ايىپپۇل سالىنعان.
شىمكەنت
