ۋرۋگۆاي پرەزيدەنتىنىڭ مۇنىسى نەسى؟
ۋرۋگۆاي پرەزيدەنتى حوسە مۋحيكا ەكونوميكا ءمينيسترىنىڭ قىزمەتىنە كىرىسۋ سالتاناتىنا جالاڭ اياعىنا ساندال كيىپ كەلگەن. ەل باسشىسىنىڭ بۇل ارەكەتى ءبىراز اڭگىمەگە ارقاۋ بولعانعا ۇقسايدى. ويتكەنى, پرەزيدەنتتىڭ ارىپتەستەرى رەسمي شاراعا كوستيۋم كيىپ, گالستۋك تاعىپ, قىسقاسى, شىتتاي كيىنىپ كەلسە كەرەك.
ۋرۋگۆاي پرەزيدەنتىنىڭ مۇنىسى نەسى؟
ۋرۋگۆاي پرەزيدەنتى حوسە مۋحيكا ەكونوميكا ءمينيسترىنىڭ قىزمەتىنە كىرىسۋ سالتاناتىنا جالاڭ اياعىنا ساندال كيىپ كەلگەن. ەل باسشىسىنىڭ بۇل ارەكەتى ءبىراز اڭگىمەگە ارقاۋ بولعانعا ۇقسايدى. ويتكەنى, پرەزيدەنتتىڭ ارىپتەستەرى رەسمي شاراعا كوستيۋم كيىپ, گالستۋك تاعىپ, قىسقاسى, شىتتاي كيىنىپ كەلسە كەرەك.
78 جاستاعى مۋحيكا مىرزانىڭ نەگە بۇلاي ىستەگەنىن ەشكىم بىلمەيدى. سۇراۋعا دا ەشكىمنىڭ باتىلى بارماعانى تاعى انىق. بىراق كەيبىر جۋرناليستەر مۇنى قازىرگى كەزدە ۋرۋگۆايدا جانە كورشى ەلدەردە 40 گرادۋس ىستىق بولىپ تۇرعانىمەن تۇسىندىرۋگە تىرىسىپتى. ال سولتۇستىك ەلدەردە, مينۋس 40 بولماعانىمەن, ايتارلىقتاي اياز, ساندال كيىپ, سەرۋەندەي المايسىڭ.
«سانتا-كلاۋس» زەرگەرلىك دۇكەندى ۇپتەپ كەتتى
سانتا-كلاۋستىڭ كيىمىن كيگەن قارۋلى ەر ادامدار البانيا مەن كوسوۆوداعى زەرگەرلىك بۇيىمدار دۇكەنىن توناپ كەتكەن. العاشقى ۇرلىق 24 جەلتوقساندا البانيانىڭ استاناسى – تيرانا قالاسىندا جاسالسا, ەكىنشىسى 26 جەلتوقسان كۇنى كوسوۆونىڭ پريزرەن ەلدى مەكەنىندە ورىن الىپتى.
العاشقىسىندا ءتورت قارۋلى ەر ادام دۇكەنشىنى قورقىتىپ, قاپشىقتارىن اشەكەيلەرگە تولتىرىپ العان سوڭ تاباندارىن جالتىراتقان. ەكىنشىسىندە وسىنداي قاراقشىلىققا ءۇش قارۋلى ەر ادام بارىپتى. توناۋ كەزىندە ەكى ادام زارداپ شەككەن. ەكى قىلمىس اراسىندا بايلانىس بار-جوعى بەيمالىم. تۋرا وسىنداي وقيعا اقش-تىڭ فلوريدا شتاتىندا دا تىركەلىپتى. سانتا-كلاۋستىڭ كيىمىن كيگەن بىرەۋ بانكتى توناپ كەتكەن.
ءباس تىگىسكەن ايەلدەردىڭ جابايى ارەكەتى
ورال قالاسىنىڭ تۇرعىنى وبلىس ورتالىعىنداعى نەكە سارايىنىڭ الدىنا 1 جەلتوقسان كۇنى وتىرعىزىلعان شىرشانى كەسىپ اكەتكەن. قولداعى بار دەرەكتەرگە قاراعاندا, ەسىمى ايتىلمايتىن 32 جاستاعى ايەل قۇربىسىمەن بىرگە اششى سۋدان ۇرتتاڭقىراپ العان سوڭ, سولاي ىستەيمىن دەپ ءباس تىگىسكەن عوي.
ءباستىڭ ءمانىسى مىنادا ەكەن: شىرشانى كەسىپ, قۇربىسىنىڭ ۇيىنە الىپ كەلۋ. ايتقانى ورىندالعان سوڭ, ءۇي يەسى ايەل شىرشانى ويىنشىقتارمەن بەزەندىرىپ ۇلگەرەدى. ءباستىڭ شارتى, ۇتىلعاننىڭ نەندەي جاۋاپ قايتارعانى بەلگىسىز. بەلگىلىسى – شىرشانىڭ ۇرلانعانىن نەكە سارايى كۇزەتشىسى ءبىلىپ قويىپتى. ءسويتىپ, پوليتسياعا حابارلاعان. ءىز كەسۋشى يت شىرشا تۇرعان ءۇيدى تاپ باسقان. ۇرلىقشى ايەلگە ايىپ سالىنسا, الىپ قويىلعان شىرشانىڭ كەيىن قاي ۇيدەن «پانا» تاپقانى بەيمالىم.
توعىز جاسىندا توپ جارعان
اقش-تىڭ كاليفورنيا شتاتىنىڭ تۋماسى, توعىز جاسار تايلەر ارمسترونگ تاريحتا اكونكاگۋا بيىگىن باعىندىرعان ەڭ بالعىن الپينيست بولىپ وتىر. ول اتالعان شىڭعا اكەسى كەۆينمەن جانە گيمالايلىق جولباسشى لحاۆانگ دحونداپپەن بىرگە شىققان. الپينيستەر اكونكاگۋانىڭ باسىنا 25 جەلتوقسان – كاتوليكتىك روجدەستۆو كۇنى جەتكەن.
اكونكاگۋا – باتىس جارتى شارىنداعى ەڭ بيىك تاۋ. ستاندارتتى ەرەجەگە سايكەس, 14 جاسقا تولماعاندارعا وعان كوتەرىلۋگە بولمايدى. سوندىقتان ارمسترونگكە ارگەنتينا سوتىنان ارنايى وردەر الۋعا تۋرا كەلگەن. ال اكونكاگۋا تاۋىنىڭ ەڭ بيىك شىڭى تەڭىز دەڭگەيىنەن 6962 مەتر جوعارى ءارى سولتۇستىك جانە وڭتۇستىك امەريكانىڭ, سونداي-اق, باتىس جانە وڭتۇستىك جارتى شاردىڭ ەڭ بيىك نۇكتەسى سانالادى.
اقشاقارمەن بىرگە اپاتقا ۇشىرادى
پولشادا ىشىمدىككە تويىپ العان سانتا-كلاۋس پەن ونىڭ اقشاقار رولىندەگى كومەكشىسى ات جەككەن شانامەن كەلە جاتىپ, اپاتقا ۇشىرادى. وقيعا سالدارىنان زارداپ شەككەن دە سول ەكەۋى. كۋاگەرلەردىڭ سوزدەرىنە قاراعاندا, 51 جاستاعى ەر ادام مەن ونىڭ 31 جاستاعى كومەكشىسى وزدەرىن قۇددى ءبىر تۇنگى كلۋبتان شىققان ادامدار سەكىلدى ۇستاعان.
وقيعا ورنىنا پوليتسيا مەن دارىگەرلەر شاقىرىلىپ, سوڭعىلارى سانتا-كلاۋس پەن اقشاقار اۋرۋحاناعا جەتكىزىلگەن. پوليتسياداعىلاردىڭ اتاپ وتۋىنشە, تەحنيكالىق جۇپ اپاتقا كولىك قۇرالىن باسقارىپ كەلە جاتىپ تۇسكەندىكتەن, ولارعا كولىكتى ماس كۇيىندە جۇرگىزدى دەگەن ايىپ تاعىلۋى ابدەن مۇمكىن. ال الگىلەردىڭ ويىنىنا بالالارىن اپارماقشى بولعان اتا-انالار ۇلكەن رەنىش ۇستىندە كورىنەدى.
كولىگىنەن 300 مىڭ دوللار تاپقان تاكسيست
اقش-تىڭ لاس-ۆەگاس قالاسىندا 13 جىل جۇمىس ءوتىلى بار تاكسيست كولىگىنىڭ ارتقى ورىندىعىنان پاكەتكە ورالعان 300 مىڭ دوللار تاۋىپ العان. دجەرالدو گامبوا اقشانى جولاۋشى جولاقىسىن تولەپ جانە شاي ءۇشىن دەپ تاعى 5 دوللار تاستاپ كەتكەننەن كەيىن بايقاپتى.
تاكسيست تە اعىنان جارالعان ادام ەكەن, پوليتسياعا دەرەۋ حابار بەرەدى. بىرنەشە ساعات وتكەندە 300 مىڭ دوللار ورالعان پاكەتتىڭ قوجايىنى دا تابىلادى. سويتسە, جاڭا جىل قارساڭىندا ۆەگاسقا كازينودا ويناۋ ءۇشىن كەلگەن بىرەۋ ەكەن. وسىلايشا, اقشا زاڭدى يەسىنە قايتارىلدى. بىراق ازىرشە ول گامبواعا ەشقانداي سىياقى بەرمەگەنگە ۇقسايدى. ەسەسىنە ادالدىعىن ەسكەرگەن تاكسوپارك باسشىلىعى العىس جاريالاپ, جاڭا جىلدىڭ كەشكى اسىن ءىشۋ ءۇشىن 1 مىڭ دوللاردىڭ ەكى ادامعا ارنالعان سەرتيفيكاتىن تاپسىرىپتى. ارينە, 1 مىڭ دوللار 300 مىڭ ەمەس قوي...
ەرەجە بۇزعاندارعا – لوتەرەيا بيلەتتەرى
اۆستراليانىڭ مەلبۋرن قالاسىندا پوليتسيا جول قوزعالىسى ەرەجەلەرىن بۇزعان جۇرگىزۋشىلەرگە سول ساتىندە وينالاتىن لوتەرەيا بيلەتتەرىن تاراتتى. مۇنداي ادەتتەن تىس اكتسيا كاتوليكتىك روجدەستۆو كۇنىنە وراي وتكىزىلدى. جۇرگىزۋشىلەر بارلىعى بىرنەشە ونداعان بيلەتتەرگە يە بولعان.
قۇقىق قورعاۋ ورگانىنداعىلار اتاپ كورسەتكەنىندەي, لوتەرەيلىك شارا, ءبىرىنشى كەزەكتە, مەرەكە كۇنى جۇرگىزۋشىلەردىڭ كوڭىل كۇيىن كوتەرۋ ءۇشىن ۇيىمداستىرىلىپتى. ماسەلەن, جىلدامدىقتى ارتتىرعانى ءۇشىن توقتاتىلعان جۇرگىزۋشىلەردىڭ كوپشىلىگى پوليتسيا تاراپىنان جازالانۋدىڭ ورنىنا لوتەرەيا بيلەتى ۇسىنىلعان كەزدە نە دەرلەرىن بىلمەي اۋىزدارىنا ءسوز دە تۇسپەگەن. ال بيلەتتەردىڭ ىشىندە ۇتىسقا يە بولعاندارى بار-جوعى تۋرالى ەشتەڭە ايتىلمايدى.
اقپارات اگەنتتىكتەرى ماتەريالدارى نەگىزىندە ازىرلەندى.
