ءىس-شاراعا مادەنيەت جانە سپورت ءمينيسترى اقتوتى رايىمقۇلوۆا, ۆيتسە-مينيستر عابيدوللا ءابدىراحىموۆ, كۇش قۇرىلىمدارى جانە تۋريستىك بيزنەس-قوعامداستىقتىڭ وكىلدەرى قاتىستى. ۆەدوموستۆو باسشىسى ءوزىنىڭ العى سوزىندە تۋريزم سالاسىنىڭ قازىرگى تاڭداعى نەگىزگى مىندەتتەرىنىڭ ءبىرى – تسيفرلاندىرۋ جانە تۋريستەردىڭ كەلۋ پروتسەستەرىن جەڭىلدەتۋگە ارنالعان اقپاراتتىق جۇيەلەردى كەڭىنەن ەنگىزۋ ەكەنىن اتاپ ءوتتى.
ال Kazakh Tourism باسقارما توراعاسى ەرجان ەركىنباەۆ شەتەلدىك تۋريستەردى تارتۋ ماسەلەلەرىندە ولاردىڭ سانىن عانا ەمەس, اتاپ ايتقاندا, تۋريستەر ءبىزدىڭ ەلدە قانشا كۇن توقتايتىنىن, قانداي ورىندارعا ءجيى باراتىنىن, قانداي قىزمەتتەردى پايدالاناتىنىن ءبىلۋ ماڭىزدى ەكەنىن ايتتى.
«شەتەلدىك تۋريستەردىڭ قازاقستاندا بولعان كۇندەر سانىن ەسەپتەۋ ءۇشىن قوناقۇيدە تۇرعانى تۋرالى مالىمەتتەردى الۋ قاجەت. ءبىز ءاربىر قوناقۇي ءوز قوناقتارىنىڭ ەسەبىن جۇرگىزەتىنىن جانە ولاردا وسىنداي مالىمەتتەردىڭ بار ەكەنىن بىلەمىز. مىندەت – وسى دەرەكتەردى بىرىڭعاي تالداۋ جۇيەسىنە جيناقتاۋ», دەدى ەرجان ەركىنباەۆ.
جوبا دايىنداۋشىلاردىڭ حابارلاۋىنشا, eQonaq جۇيەسى قازاقستاننىڭ تۋريستىك سالاسىن دامىتۋدىڭ 2019-2025 جىلدارعا ارنالعان مەملەكەتتىك باعدارلاماسىنىڭ جۇيەلى ءىس-شاراسى جانە باستاپقىدا تۋريستىك اعىن ستاتيستيكاسىن رەتتەۋدى كوزدەگەن بولاتىن.
سونداي-اق وتكەن جىلدىڭ قاڭتارىندا پرەزيدەنت قاسىم-جومارت توقاەۆ شەتەلدىك تۋريستەردى مىندەتتى تىركەۋدەن باس تارتۋ كەرەكتىگىن مالىمدەگەن ەدى. ەندى بۇل فۋنكتسيا ورنالاستىرۋ ورىندارىنا بەكىتىلگەن. ال كوشى-قون قىزمەتتەرىنە اقپارات بەرۋدىڭ ودان ارعى پروتسەستەرىن وڭايلاتۋ ءۇشىن eQonaq جۇيەسى وسى مىندەتتەرگە ساي ينتەگراتسيالانعان.
ەQonaq جۇيەسىن تاجىريبە جۇزىندە پايدالانۋدى Kazakh Tourism ۇلتتىق كومپانياسى 2020 جىلدىڭ IV توقسانىندا جۇزەگە اسىرعان. قازىرگى ۋاقىتتا جۇيە نۇر-سۇلتان جانە الماتى قالالارىندا, سونداي-اق اقمولا جانە سولتۇستىك قازاقستان وبلىستارىنداعى 383 ورنالاستىرۋ ورنىندا (قوناقۇيلەر, حوستەلدەر, دەمالىس ۇيلەرى جانە ت.ب.) 21985 ءتۋريستى تىركەپ, ەنگىزگەن.
سونىمەن قاتار جۇيەنى دايىنداۋشىلار Ashyq جۇيەسىمەن ينتەگراتسيالاۋدى جوسپارلاپ وتىر.
«وزدەرىڭىز بىلەتىندەي, Ashyq جۇيەسىنىڭ ارقاسىندا ادامدار كينوتەاترلارعا, ءدامحانالار مەن مەيرامحانالارعا قايتا كىرگىزە باستادى. ول ءۇشىن تەك جسن-ءىڭىزدى ەنگىزىپ, QR كودتى سكانەرلەۋ قاجەت. الايدا شەتەلدىكتەر جسن-ءسىز قازاقستاندىق جۇيەنى پايدالانا المايدى, جۇيەدە شەتەلدىكتەر تۋرالى دەرەكتەر جوق. بۇل دەرەكتەردى ءبىز eQonaq جۇيەسى ارقىلى الا الامىز. بۇل تۋريستەرگە ەل ىشىندە قاۋىپ-قاتەرسىز جۇرۋگە مۇمكىندىك بەرەدى, سونىمەن قاتار ءبىز ءۇشىن تۋريستەر توقتاعان جەرلەرگە عانا ەمەس, سونىمەن بىرگە ولار ورنالاسقان جەرلەرگە دە قوسىمشا مالىمەتتەر قوسادى. بۇل تۋريزم سالاسىنداعى ينفراقۇرىلىمدى جوسپارلاۋ كەزىندە دە كومەكتەسەدى, ويتكەنى ءبىز تۋريستەر لەگىن كورەمىز», دەپ مالىمدەدى ەرجان ەركىنباەۆ.
وسى جىلدىڭ ماۋسىم ايىندا الاكول, بالقاش, اتىراۋ جانە اقتاۋ قوناقۇيلەرىنە eQonaq جۇيەسى كەزەڭ-كەزەڭىمەن ەنگىزىلدى. جىل سوڭىنا دەيىن ەلىمىزدىڭ باسقا دا تۋريستىك ايماقتارىن قامتۋ جانە eQonaq جۇيەسى بار قوناقۇيلەر سانىن 600-گە دەيىن جەتكىزۋ جوسپارلانىپ وتىر.
