قىلقالام شەبەرلەرى قارا ءۇزدى

ەكى ايعا سوزىلعان دوداعا 101 سۋرەتشىنىڭ 300-دەن استام كارتيناسى كەلىپ ءتۇستى. سولاردىڭ ىشىندە 8 سۋرەتشى ۇزدىكتەر قاتارىنان تابىلدى. ولار: ارشىن قابىلبەك («شاحتەر»)، ومىرزاق رىستان («ۇرپاق قورعانى»)، تولقىن تا­بىسبەك («كوسەم»)، داۋرەنبەك بەكنازار («كوكەيكەستى»)، را­حات سا­پارالينوۆا («تاس تىنىسى»)، امانات نازارقۇل (« ۇلى دالا كارديوگرامماسى»)، سەرىك­جان ىس­قاقبەك («قوياندى جارمەڭ­كەسى»)، قۇمار ومارحان («اقسەلەۋ سەي­دىمبەك»).
ايتا كەتەيىك، جەڭىمپازداردىڭ 8 سۋرەتى بويىنشا بايقاۋدىڭ ءىى كەزەڭى جالعاسادى. ەندى اقىندار جەڭىمپاز اتانعان سۋرەتشىلەر سالعان ۇزدىك 8 سۋرەتتىڭ بىرەۋىن تاڭ­داپ، سول سۋرەت تۋرالى ءبىر پوە­زيا­لىق شىعارماسىن (ولەڭىن) جولداۋ ارقىلى قاتىسا الادى. بايقاۋدىڭ اقىندارعا ارنالعان 2-كەزەڭى 26 ماۋسىم مەن 26 شىلدە ارالىعىندا وتەدى.
جەڭىمپاز اقىن مەن سۋرەتشى شىعارمالارىنان ارنايى ءۇش تىلدە (قازاق، ورىس جانە اعىل­شىن) البوم دايىندالادى. البوم ساپالى، ءتۇرلى-ءتۇستى سۋرەت­تەر­مەن بەزەندىرىلىپ، ارنايى تۇ­سىرىلگەن بەينەروليكتەرگە سىل­تەمە بەرىلگەن QR-كودتارمەن جارىق كورەدى.
نەگىزگى شارت بويىنشا پوە­زيا مەن سۋرەتتە ۇندەسكەن دۋەت-ۇمىت­كەرلەر «تاۋەلسىزدىك: ءسوز بەن سۋرەت» قورىتىندى مادەني كە­­شىنە شاقىرتىلادى.