قازاقستان • 29 ماۋسىم، 2021

ءۇش جىلدا ءۇش ەسە وسەدى

83 رەت كورسەتىلدى

الداعى ءۇش جىلدا قازاقستانداعى ەلەكتروندى ساۋدانىڭ كولەمى ءۇش ەسە وسپەك. ەلىمىزدەگى ەڭ ءىرى ءىت-حولدينگ – ChocoFamily كومپانياسىنىڭ باسشىسى راميل مۋحورياپوۆ وسىنداي بولجام جاساپ وتىر.

ونىڭ پىكىرىنشە، قازىرگى ۋا­قىتتا بىزدەگى e-commerce نا­رىعى 2-3 ملرد دوللاردى قۇ­راپ وتىر. 2024 جىلعا قاراي كور­­سەت­كىش 8،5 ملرد دوللارعا جەت­پەك. ايتۋىنشا، رەسەيمەن سالىس­تىرعاندا قازاقستاننىڭ ەلەكتروندى ساۋداعا قادام باسۋى الدەقايدا قارقىندى. بۇگىندە بولشەك ساۋ­دا اينالىمىنىڭ 8 پايىزىن ينتەرنەت-بيزنەس يەلەنىپ وتىر. قىتايدا بۇل كورسەتكىش شامامەن 44 پايىزدى قۇرايدى ەكەن. ر.مۋحورياپوۆتىڭ بولجامىنشا، بەس-التى جىلدا اتالعان دەڭگەيدى دە باعىندىرۋعا بولادى.

ساۋدا جانە ينتەگراتسيا مي­نيسترلىگىنىڭ مالىمەتىنشە، 2019 جىلمەن سالىستىرعاندا بىلتىر ەلەكتروندى ساۋدا اينالىمى 2،5 ەسە ۇلعايىپ، 1،1 ترلن تەڭگەنى قۇراعان. ەلەكتروندى ساۋداداعى ساتىپ الۋشىلاردىڭ سانى 20 پايىزعا نەمەسە 3،8 ملن ادامعا دەيىن وسكەن. بۇگىندە نارىقتا 650 ينتەرنەت-دۇكەن جۇمىس ىستەيدى. ۇلتتىق بانكتىڭ دەرەگىنشە، قولما-قول اقشاسىز جاسالعان ترانزاكتسيالار 2،4 ەسە ارتقان. ياعني 35،3 ترلن تەڭگەگە 2،9 ملرد وپەراتسيا جاسالعان. بولشەك ساۋدانىڭ جال­پى كولەمىندەگى ەلەكتروندى ساۋدانىڭ ۇلەسى 2020 جىلعى 9،7 پايىزدان 2025 جىلى 15 پايىزعا دەيىن وسەدى دەپ كۇتىلۋدە.

سونداي-اق قازاقستان بوند قويمالارىن قۇرۋدى جوسپارلاپ وتىر. الەم ەلدەرىندەگى تاۋار اينالىمىنىڭ ورتاشا ەسەپ­پەن 10-30 پايىزى بوند-قوي­مالارىنا تيەسىلى. وسىنىڭ ەسە­بىنەن قازاقستاندا قويما ين­فرا­قۇرىلىمى ءتيىمدى ىسكە قو­سى­لادى دەپ كۇتىلۋدە. بۇل رەتتە قويمالاردا تاپسىرىستاردى وڭدەۋ ءۇشىن قوسىمشا جۇمىس ورىن­دارى قۇرىلادى جانە كە­دەندىك باجداردان تۇسەتىن بيۋد­جەت­تىك تۇسىمدەر ۇلعايتىلادى. سو­نىمەن قاتار قازاقستان اۋماعى ارقىلى ەۋروپاعا ينتەرنەت-سالەمدەمەلەردى قايتا باعىتتاۋ مۇمكىندىگى بار. وسىنىڭ ەسەبىنەن قازاقستاندىق لوگيستيكالىق كومپانيالار 2025 جىلعا قاراي 132 ملرد تەڭگەدەن 1،27 ترلن تەڭگەگە دەيىن تابىس تابادى دەگەن بولجام بار.

ساۋدا جانە ينتەگراتسيا مي­نيس­ترلىگىنىڭ اقپاراتىنشا، ساۋدا سالاسىندا تۇتىنۋشىلارمەن جۇمىس ىستەۋگە ارنالعان تسيفر­لاندىرۋدىڭ بىرنەشە باعىتى بار. ولار ساۋدا ماركاسىنا دەگەن قىزىعۋشىلىقتان ساتىپ ال­عانعا دەيىنگى بارلىق كەزەڭدى قام­تيدى. سول سەكىلدى لوگيستيكا­دا وندىرۋشىدەن تۇتىنۋشىعا دەيىنگى كەزەڭدى قامتيتىن باعىتتار قاراس­­­­­­­تىرىلعان.

«ەلەكتروندى ساۋدانى دامىتۋ ونىڭ بارلىق قاتىسۋ­شى­لارىنا قولايلى ەكوجۇيە قۇرۋ، سونداي-اق شاعىن جانە ورتا بيز­نەستىڭ وتاندىق جانە حا­لىق­­ارالىق ەلەكتروندى ساۋدا الاڭ­دارىمەن ارىپتەستىككە تارتىلۋىن قامتاماسىز ەتۋ ەسەبىنەن جۇر­گىزىلەتىن بولادى»، دەپ حابارلادى ساۋدا جانە ينتەگراتسيا مينيسترلىگى.

جالپى «ساۋدا سالاسىن دامىتۋ تۇجىرىمداماسىنا» سايكەس، تاۋارلار مەن كورسەتىلەتىن قىز­مەتتەردىڭ شيكىزاتتىق ەمەس ەكس­پورتىنىڭ كولەمىن 2025 جىلى 41 ملرد دوللارعا دەيىن ۇلعايتۋ جوس­پارلانۋدا. ال ەڭبەك ونىمدىلىگى 2019 جىلمەن سالىستىرعاندا 11،8 پايىزعا وسەدى دەپ كۇتىلۋدە. نە­گىزگى كاپيتالعا ينۆەستيتسيالار 40 پايىزعا ۇلعايىپ، «كولەڭكەلى» ەكونوميكانىڭ ۇلەسى 5 پايىزعا دەيىن تومەندەيدى دەگەن بولجام بار. بيرجالىق ساۋدا جالپى ساۋ­دا كو­لەمىنىڭ 14 پايىزىنا دەيىن وسپەك.

ەلەكتروندى ساۋدانى دامىتۋ ەكى باعىتتا جۇرگىزىلەتىن بولادى. ءبىرىنشى باعىت – وتاندىق تاۋار وندىرۋشىلەردى ىشكى نارىقتا ىلگەرىلەتۋ قۇرالى رەتىندە ەلەكتروندى ساۋدانى دامىتۋدى ىنتالاندىرۋ. ەكىنشى باعىت – تاۋار­لار مەن قىزمەتتەردى وتاندىق ون­دىرۋشىلەردىڭ ەكسپورتقا شىعۋ قۇرالى رەتىندە ەلەكتروندىق ساۋدانى دامىتۋ.

ر.مۋحورياپوۆتىڭ ايتۋىنشا، بىزدەگى ەلەكتروندى ساۋدانىڭ دۇرىس باعىتتا ەكەنىن تاكسيدى ونلاين شاقىرۋ قىزمەتىنىڭ قانات جايعانىنان-اق اڭعارۋعا بولادى.

– قازىر بۇل نارىقتاعى باعا جوعارى. سەبەبى تۇسىنىكتى. نارىقتا مونوپوليالىق سيپات باسىم. الاي­دا جاڭا ويىنشىلاردىڭ كە­لۋىمەن قىزمەت قۇنى 15-20 پا­يىزعا دەيىن ارزاندايدى. مەنىڭ­شە، سول كەزدە عانا تاكسي قىزمەتىنىڭ ناقتى باعاسى بايقالماق، – دەيدى راميل مۋحورياپوۆ.

ءار قيىندىقتىڭ ارتىندا تىڭ مۇمكىندىك جاتادى دەگەن ءتامسىل بار. پاندەميا كەزىندە وسىعان انىق كوزىمىز جەتتى. ويت­كەنى سارساڭعا سالعان ىندەت قازاق­ستاننىڭ ەلەكتروندى ساۋداداعى مۇمكىندىگىنىڭ جوعارى ەكەنىن كور­سەتىپ بەردى. بۇعان دەيىن كەۋ­دەسىن كوتەرە الماي، جەر باۋىرلاپ كەلە جاتقان ەلەكتروندى ساۋدا COVID-19 پاندەميا­سى كەزىندە ەرەكشە قارقىن الدى. ماسەلەن، 2018-2019 جىلدارى e-commerce-نىڭ جالپى ساۋ­داداعى ۇلەسى تيىسىنشە 2،9 جانە 3،8 پا­­يىزدى قۇراسا، 2020 جىلى كور­سەتكىش ءۇش ەسە ءوسىپ، 9،7 پايىزعا جەت­تى. الەۋ­مەتتىك قاشىقتىقتى ساق­تاۋ، كارانتين، باسقا دا شەكتەۋ شارالارى ساۋدا سالاسىن تۇبەگەيلى وزگەرتتى.

قازاقستانداعى ەلەكتروندى ساۋ­دا ىشكى جانە سىرتقى ساۋدانىڭ، قولما-قول اقشاسىز تولەمدەردىڭ دامۋى مەن كولەمىنىڭ ۇلعايۋىنا، بيزنەستەگى «كولەڭكەلى» اينالىمدى بارىنشا ازايتۋعا ىقپال ەتەدى. بيىل دا ءوسۋ ءۇردىسى بايقالادى. 2021 جىلدىڭ قاڭتار-اقپانىندا قولما-قول اقشاسىز تولەمدەر كولەمى وتكەن جىلدىڭ ۇقساس كەزەڭىمەن سالىستىرعاندا 2 ەسە ۇلعايىپ، 7،8 ترلن تەڭگەنى قۇرادى. بۇل رەتتە ينتەرنەت جانە ۇيالى تەلەفون ارقىلى جۇرگىزىلگەن ونلاين-تولەمدەردىڭ ۇلەسى جالپى كولەمنىڭ 82 پايىزىنا تەڭ. حالىقارالىق تولەم جۇيەلەرى بولىنىسىندە بارلىق قولما-قول اقشاسىز ترانزاكتسيالاردىڭ 99،1 پايىزى MasterCard Worldwide جانە VISA International-عا تيەسىلى.

سوڭعى جاڭالىقتار

شابىت شاقىراتىن شاھار

ەلوردا • بۇگىن، 08:23

اقجايناق استانا

ەلوردا • بۇگىن، 08:22

وزىق ءوندىرىس ورنىندا بولدى

ايماقتار • بۇگىن، 08:20

باعدارىڭ قالاي، باس قالا؟

ەلوردا • بۇگىن، 08:17

ديماش پەن دجەكسون

ونەر • بۇگىن، 08:10

ۇتقانىمىز شامالى بولىپ تۇر

قوعام • بۇگىن، 08:05

ەگىزدەر فەستيۆالى

قوعام • بۇگىن، 08:00

ۇقساس جاڭالىقتار