بىرسىدىرعى ءوتىپ جاتقان ماتچتىڭ اجارىن العاش بولىپ يسپانيا قاقپاشىسى ۋناي سيمون كىرگىزدى. الاڭ ورتاسىنان قورعاۋشى پەدريدىڭ بەرگەن ەكپىندى پاسىن دۇرىس كۇتىپ الا الماعان سيمون حورۆاتيا قۇراماسىنىڭ العا شىعۋىنا جاعداي جاساپ بەردى. ارتىنشا ۋەفا بۇل گولدى پەدريدىڭ ەنشىسىنە جازدى. قالاي بولعاندا دا بۇل – اۆتوگول. ءارى بيىلعى چەمپيوناتتا تىركەلىپ وتىرعان توعىزىنشى اۆتوگول. بۇل تۇرعىدان بيىلعى دوپ دوداسى رەكورد جاساپ وتىر. سەبەبى, وسىعان دەيىن بۇكىل ەۋرو دوداسىنىڭ بارلىعى قوسىلىپ 9 اۆتوگولدى ارەڭ تىركەگەن ەدى.
وسىدان سوڭ حورۆاتتار بەلسەنە قيمىلداپ, ەسەپ باسىمدىلىعىن ارتتىرا تۇسۋگە تىرىسقان. الايدا يسپاندار باياۋ, بىراق ۇزدىكسىز جىلدامدىقپەن ويىن تىزگىنىن قولعا الا باستادى جانە ول ناتيجەسىز دە بولعان جوق. ويىننىڭ 38 مينۋتىندا پابلو سارابيا گول سوعىپ, ەسەپتى تەڭەستىردى. ۇزىلىسكە قۇرامالار وسىنداي تەڭ جاعدايدا اتتاندى.
ەكىنشى تايمدا يسپانيا قۇراماسى وزگەردى. توپتىق كەزەڭىندەگى سۇرەڭسىز قۇراما كەيپىنەن ارىلىپ, بەلسەندىرەك قيمىلداۋعا كوشتى. 57 مينۋتتا سەسار اسپيليكۋەتا تۋرنيردەگى العاشقى گولىن سوعىپ, كومانداسىن العا شىعاردى. «چەلسي»قورعاۋشىسىنىڭ جولىن جاس شابۋىلشى فەرران توررەس ءساتتى جالعاستىرا ءبىلدى. توررەس 76 مينۋتتا حورۆاتيا قاقپاسىنان ساڭىلاۋ تاۋىپ, ماتچ ءنۇكتەسىن قويعانداي بولعان. دەگەنمەن زلاتكو داليچ كومانداسىنىڭ سوڭىنا دەيىن ۇرىس سالاتىنى ەجەلدەن بەلگىلى. كوماندا سول مىنەزىنە باستى. سيمون قاقپاسى ماڭىنداعى قاربالاس ساتىندە ميسلاۆ ورشيچ كاپيتان مودريچتەن كەلگەن پاستى تەۋىپ ۇلگەردى. سيمون دوپتى قاقپا ىشىنەن قايتاردى. ءسويتىپ, ەسەپ ايىرماسى قىسقاردى. بۇل ءبىز كورەتىن سپەكتاكلدىڭ سوڭى ەمەس ەكەن. قوسىمشا قوسىلعان مينۋت تۇگەسىلەر تۇستا سول قاپتالدان اۋەلەتە اسىرعان ءورشيچتىڭ پاسىنا ءبىرىنشى جەتكەن ماريو پاشاليچ ەسەپتى تەڭەستىرىپ كەتتى. ءسويتىپ, قوس كوماندا ايقاستى وۆەرتايمدا جالعاستىردى.
100 مينۋتتا الۆارو موراتا گول سوقتى. ىزىنشە ميكەل ويارسابال ەسەپتى 5:3-كە جەتكىزدى. ءارى قاراي حورۆاتيا قۇراماسى ەش شارا ىستەي العان جوق. يسپانيا شيرەك فينالعا ۇلكەن قيىندىقپەن جولداما الدى.
