كوميتەت باسشىسىنىڭ ايتۋىنشا, بالىق ءوسىرۋ كولەمىن ۇلعايتۋ بالىق وسىرۋگە جارامدى سۋ ايدىندارىن پايدالانۋ, سونداي-اق جاڭا ينۆەستيتسيالىق-يندۋستريالىق بالىق ءوسىرۋ جوبالارىن ىسكە اسىرۋ جانە جۇمىس ىستەپ تۇرعان شارۋاشىلىقتاردى جوبالىق قۋاتىنا دەيىن جەتكىزۋ ەسەبىنەن جوسپارلانىپ وتىر. 2030 جىلعا دەيىن 1 283 جاڭا بالىق ءوسىرۋ شارۋاشىلىعى قۇرىلىپ, جۇمىس ىستەپ تۇرعان 288 شارۋاشىلىقتىڭ ءوسىرۋ كولەمى ارتپاق. جوبالار ءار ءوڭىردىڭ ەرەكشەلىكتەرىنە قاراي بولىنگەن جانە جەرگىلىكتى اتقارۋشى ورگاندار بەكىتكەن بالىق شارۋاشىلىعىن دامىتۋدىڭ وڭىرلىك باعدارلامالارىندا كورسەتىلگەن. قويىلعان ماقساتتارعا قول جەتكىزۋ ءۇشىن 10 جىل ىشىندە 340 ملرد تەڭگە جەكە ينۆەستيتسيالار تارتۋ جانە مەملەكەتتىك بيۋدجەتتەن شامامەن 200 ملرد تەڭگە ءبولۋ كوزدەلىپ وتىر.
«2021 جىلى جۇمىس ىستەپ تۇرعان بالىق ءوسىرۋ شارۋاشىلىقتارى ەسەبىنەن 12,8 مىڭ توننا بالىق ءوسىرۋ كۇتىلۋدە. جىل باسىنان بەرى شامامەن 7,6 مىڭ توننا تاۋارلى بالىق ءوسىرىلدى. بالىق شارۋاشىلىعىن (اكۆاوسىرۋ) دامىتۋ ءۇشىن جاعداي جاساۋ ماقساتىندا جۇمىستاردى سەگىز باعىت اياسىندا جۇرگىزبەكپىز. العاشقىسى – بالىق شارۋاشىلىعى سۋ ايدىندارىن تاۋارلىق بالىق شارۋاشىلىعىن جۇرگىزۋ ءۇشىن كاسىپشىلىك سۋ ايدىندارىنان اۋىستىرۋ قاعيدالارى بەكىتىلدى. ەكىنشىسى – زاڭنامالىق دەڭگەيدە پايدالانۋشىنىڭ تور شارۋاشىلىعىن جۇرگىزۋ ءۇشىن كاسىپشىلىك بالىق شارۋاشىلىعى ۋچاسكەسىن پايدالانۋ قۇقىعى كوزدەلگەن. ۇشىنشىدەن, شارۋاشىلىقتى جۇرگىزۋگە ارنالعان ۇلگى شارت بەكىتىلدى, ونىڭ ناقتى مەرزىمى 49 جىل بولىپ بەلگىلەندى. بۇرىن كەلىسىمشارت جاساسۋ مەرزىمى 5 جىلدان 49 جىلعا دەيىن بولاتىن. ءتورتىنشى جانە بەسىنشى نۇسقا بويىنشا بالىق وسىرۋشىلەرگە قويىلاتىن ارتىق تالاپتار مەن بالىق ءوسىرۋ شارۋاشىلىقتارىن سۋ قورعاۋ بەلدەۋىنە ورنالاستىرۋ بويىنشا شەكتەۋلەر الىنىپ تاستالدى», دەدى ن.ءجۇنىسوۆ.
سونىمەن قاتار بالىق ءوسىرۋ توعاندارى مەن باسسەيندەرىن سالۋ كەزىندە جوبالىق-سمەتالىق قۇجاتتامانى ازىرلەۋ جانە مەملەكەتتىك ساراپتامانىڭ قورىتىندىسىن الۋ جونىندەگى تالاپتاردىڭ دا كۇشى جويىلعان. ال بيزنەس بۇدان بىلاي اۋىل شارۋاشىلىعى ماقساتىنداعى جەرلەردە بالىق ءوسىرۋ شارۋاشىلىقتارىن سالۋ كەزىندەگى شىعىنداردى وتەۋدەن بوساتىلادى. سەگىزىنشى نۇسقا نەگىزىندە مەملەكەتتىك قولداۋدىڭ قولدانىستاعى شارالارى كەڭەيتىلگەن. بۇلار – بالىق ءوسىرۋ-بيولوگيالىق نەگىزدەمەلەر; بالىق ءوسىرۋ ماتەريالىن ساتىپ الۋ; دارىلىك پرەپاراتتار; باعالى بالىق تۇرلەرىنىڭ جوندەۋ-انالىق تابىندارىن ساتىپ الۋعا جانە كۇتىپ-ۇستاۋعا جۇمسالاتىن شىعىندار قۇنىن 50 پايىزعا دەيىن سۋبسيديالاۋ.
سپيكەر, سونداي-اق كوميتەت قازاقستاندا بالىق شارۋاشىلىعىن جۇرگىزۋ ءۇشىن بارىنشا قولايلى جاعدايلاردى پىسىقتاپ جاتقانىن اتاپ ءوتتى, سوندىقتان ول بالىق شارۋاشىلىعى سۋبەكتىلەرىن, ينۆەستورلاردى جانە نيەت بىلدىرگەن بارلىق بيزنەسمەندى بالىق وسىرۋمەن اينالىسۋعا شاقىردى.
ول قازىرگى كەزدە باعدارلامانى ىسكە اسىرۋ جونىندەگى جۇمىستارمەن قاتار بالىق رەسۋرستارىنىڭ تابيعي پوپۋلياتسياسىن ساقتاۋ جانە ۇلعايتۋ بويىنشا شارالار قابىلدانىپ جاتقانىن, اتاپ ايتقاندا, براكونەرلىكپەن كۇرەس, بالىق اۋلاۋدى رەتتەۋ جانە بالىق رەسۋرستارىن جاساندى تۇردە مولايتۋ جۇزەگە اسىرىلىپ جاتقانىن اتاپ ءوتتى. ماسەلەن, 2021 جىلدىڭ باسىنان باستاپ مەملەكەتتىك ينسپەكتورلار 1 800-گە جۋىق اكىمشىلىك قۇقىق بۇزۋشىلىقتى انىقتاپ, 23,2 ملن تەڭگە ايىپپۇل سالعان. ونىڭ 15,4 ملن تەڭگەسى ءوندىرىلىپ الىنعان. سونىمەن بىرگە ناريمان ءجۇنىسوۆ كوميتەت وتكىزەتىن «بەكىرە», «ۋىلدىرىق شاشۋ», «تازا سۋ ايدىندارى» تابيعاتتى قورعاۋ اكتسياسىنىڭ قورىتىندىلارى تۋرالى دا حابارلادى.
جالپى, ەلىمىزدىڭ بالىق شارۋاشىلىعىنىڭ قورى وتە اۋقىمدى. سالانىڭ عالىمدارى مەن ساراپشىلارىنىڭ باعالاۋى بويىنشا بالىق شارۋاشىلىعىنىڭ الەۋەتى جىلىنا 600 مىڭ توننا تاۋارلىق بالىققا باعالانادى. مەملەكەت باسشىسى ق.توقاەۆتىڭ 2020 جىلعى 1 قىركۇيەكتەگى «جاڭا جاعدايداعى قازاقستان: ءىس-قيمىل كەزەڭى» اتتى قازاقستان حالقىنا جولداۋىندا ەلىمىزدىڭ بالىق سالاسىن دامىتۋعا ەرەكشە نازار اۋدارۋ قاجەتتىگى اتاپ ءوتىلدى. وسىعان بايلانىستى ۇكىمەتتىڭ 2020 جىلعى 31 جەلتوقسانداعى №955 قاۋلىسىمەن قر ەگترم بالىق شارۋاشىلىعى كوميتەتى قۇرىلىپ, جۇمىس ىستەي باستادى.
