ليتسەنزيا بەرۋ ءۇشىن كومپانيالاردىڭ اكتسيونەرلەرى مەن مەنەدجمەنتىنە, ونىڭ ىشىندە جەتكىلىكتى بىلىكتىلىگىنىڭ بولۋىنا جانە سوتتىلىعىنىڭ بولماۋىنا قاتاڭ تالاپتار قويىلماق. قارجى نارىعىن رەتتەۋ جانە دامىتۋ اگەنتتىگىنىڭ حابارلاۋىنشا, قازىرگى كەزدە 3 659 ميكرونەسيە ۇيىمى: 1 761 لومبارد, 1 222 نەسيە سەرىكتەستىگى, 676 ميكروقارجى ۇيىمى, ونىڭ ىشىندە 7 ونلاين-كرەديتتەۋ كومپانياسى تاراتىلعالى جاتىر.
«ميكروكرەديتتەۋدىڭ شەكتەن تىس ءوسۋىن شەكتەۋ جانە قارىز الۋشىلاردىڭ قۇقىقتارىن قورعاۋ ماقساتىندا سىياقى مولشەرلەمەسىنىڭ شەكتى مولشەرلەمەلەرى جانە بورىش جۇكتەمەسىنىڭ كوەففيتسيەنتى ەنگىزىلدى, ميكروقارجى ۇيىمدارى كاپيتالىنىڭ ەڭ تومەن مولشەرى بويىنشا پرۋدەنتسيالىق ستاندارتتار كوتەرىلدى. جۇمىس ىستەپ تۇرعان سۋبەكتىلەر ءۇشىن كاپيتالداردىڭ ەڭ تومەن ماندەرىن 2023 جىلعا دەيىن كەزەڭ-كەزەڭىمەن ميكروقارجى ۇيىمى ءۇشىن 30 ملن تەڭگەدەن 100 ملن تەڭگەگە دەيىن, نەسيە سەرىكتەستىكتەرى ءۇشىن 10 ملن تەڭگەدەن 50 ملن تەڭگەگە دەيىن, لومباردتار ءۇشىن 10 ملن تەڭگەدەن 70 ملن تەڭگەگە دەيىن كوتەرۋ كوزدەلەدى. بۇل رەتتە جاڭادان قۇرىلاتىن ۇيىمدار جارعىلىق جانە مەنشىكتى كاپيتالدى كوتەرىلگەن ەڭ تومەن ماندەر دەڭگەيىندە قالىپتاستىرۋعا ءتيىس» دەلىنگەن اگەنتتىك حابارلاماسىندا.
كاسىپكەرلەرگە ميكرونەسيە بەرۋدى ارتتىرۋ ءۇشىن شالعاي اۋدانداردا «باستاۋ بيزنەس» جوباسىنىڭ تۇلەكتەرىن نەسيەلەۋ بەلسەندى جۇرگىزىلمەك. ول ءۇشىن «اتامەكەن» ۇلتتىق كاسىپكەرلەر پالاتاسىنىڭ باس بولۋىمەن 15 جاڭا ميكروقارجى ۇيىمى قۇرىلعان.
سونداي-اق ميكروقارجى نارىعى سۋبەكتىلەرىنىڭ ايقىندىلىعى مەن ءتارتىبىن ارتتىرۋ, ميكروقارجى ۇيىمدارى ءۇشىن تالاپتاردى قاتاڭداتۋ جانە قوسىمشا شەكتەۋلەر ەنگىزۋ ءۇشىن 2021 جىلعى مامىردا بانكتىك, ميكروقارجىلىق جانە كوللەكتورلىق قىزمەتتى رەتتەۋ تۋرالى زاڭ كۇشىنە ەنگەنى بەلگىلى. زاڭ اياسىندا مەرزىمى وتكەن بەرەشەك ماسەلەسى قاراستىرىلىپ, پروبلەمالىق بەرەشەكتى رەتتەۋدىڭ بارلىق پروتسەسى ەكى ەسە – 180 كۇننەن 90 كۇنگە دەيىن قىسقارادى. سونىمەن قاتار زاڭدا جارنامانى تاراتۋ جانە ورنالاستىرۋ كەزىندە ميكروقارجى ۇيىمىنىڭ جىلدىق ءتيىمدى سىياقى مولشەرلەمەسىن (جتسم) كورسەتۋى دە مىندەتتەلگەن. بۇل تۇتىنۋشىلارعا باستاپقى كەزەڭدە العان قارىزداردى ەسكەرە وتىرىپ, ءوز مۇمكىندىكتەرىن وبەكتيۆتى باعالاۋعا جانە بولاشاقتا قارىزداردى وتەۋ كەزىندە قيىندىقتاردى بولدىرماۋعا مۇمكىندىك بەرەدى. سونىمەن قاتار ميكروكرەديت بەرۋ شارتىنىڭ مازمۇنىنا, رەسىمدەلۋىنە جانە مىندەتتى شارتتارىنا قويىلاتىن تالاپتار بەلگىلەنگەن.
«ميكروكرەديتتەردى قاشىقتان بەرۋ فورماتىن تاراتۋ جاعدايىندا ينتەرنەت-الاياقتىق فاكتىلەرى بايقالدى. جالعان كرەديتتەر الۋ ءۇشىن ازاماتتاردىڭ جەكە دەرەكتەرىن زاڭسىز الۋمەن بايلانىستى قارجىلىق الاياقتىققا قارسى ءىس-قيمىل ءۇشىن اگەنتتىك كليەنتتەردى يدەنتيفيكاتتاۋ تالاپتارىن كۇشەيتتى. ول ءۇشىن بيىل 30 ساۋىردە اگەنتتىك ەلەكتروندى تاسىلمەن ميكروكرەديتتەر بەرۋ كەزىندە كليەنتتەردى يدەنتيفيكاتتاۋدىڭ بارلىق ميكروقارجى ۇيىمدارى ءۇشىن مىندەتتى جاڭا ءتارتىبىن قابىلدادى. جاڭا تالاپتارعا سايكەس ەندى كليەنتتى سايكەستەندىرۋ ءۇشىن ءۇش ءتاسىلدىڭ ءبىرىن پايدالانۋ كوزدەلگەن: ۇلتتىق كۋالاندىرۋشى ورتالىق ۇسىنعان ەلەكتروندى تسيفرلىق قولتاڭبا, ۇلتتىق بانكتىڭ بەاو سداو قىزمەتتەرىن پايدالانۋ ارقىلى بيومەتريالىق يدەنتيفيكاتتاۋ نەمەسە ەكى فاكتورلى بىردەيلەندىرۋ. كليەنتكە يدەنتيفيكاتتاۋ جۇرگىزبەي ميكروكرەديتتەر بەرۋگە تىيىم سالىنادى» دەلىنگەن حابارلامادا.
الداعى ۋاقىتتا الاياقتاردىڭ جالعان نەسيە راسىمدەپ جىبەرۋىنىڭ الدىن الۋ ماقساتىندا اگەنتتىك قۇقىق قورعاۋ ورگاندارىمەن بىرلەسە ارەكەت ەتۋگە مۇددەلى بولىپ وتىر.
