ەكى جۇزدەن اسا جاس تۇلەكتىڭ سالتاناتتى شەرۋى ورتالىق الاڭعا كەلىپ توقتاعان سوڭ ءراسىم دە باستالدى. ايتپاقشى, بۇگىنگى شارانى رەسپۋبليكا جۇرتشىلىعى ونلاين رەجيمدە تاماشالادى. سونداي-اق ومىرگە جولداما الۋعا دايىن لەيتەنانتتار وزدەرىنىڭ ارۋلارىمەن بىرگە ورتاعا شىعىپ, دوڭگەلەنە بيلەپ, ءبىلىم ورداسىنىڭ ماقتانىشتارى – قويان-قولتىق جەكپە-جەگىنىڭ شەبەرلەرى ونەر كورسەتتى.
ءراسىمنىڭ نەگىزگى ءبولىمىن اشقان ۇقك توراعاسىنىڭ ورىنباسارى – شەكارا قىزمەتىنىڭ ديرەكتورى گەنەرال-لەيتەنانت د.ءدىلمانوۆ جاس لەيتەنانتتاردى الدا كۇتىپ تۇرعان شەكارانىڭ ءومىرى اۋىردىڭ استى, جەڭىلدىڭ ۇستىمەن ءجۇرۋدى تالاپ ەتەتىنىن, بۇل ءۇشىن تاباندىلىق پەن شىدامدىلىق, وتانىمىزعا دەگەن شەكسىز سۇيىسپەنشىلىك جانە پاتريوتتىق رۋح قاجەت ەكەنىن ايتتى.
بيىل شەكاراشىلاردىڭ وقۋ ورداسىن 200-دەن اسا لەيتەنانت ءبىتىرىپ وتىر. ولاردىڭ ىشىنەن 20 شاقتى تۇلەك اكادەميانى قىزىل ديپلومعا اياقتادى. سونداي-اق جاس وفيتسەرلەردىڭ ىشىنەن سپورتتا جوعارى ناتيجە كورسەتكەنى ءۇشىن «سپورت شەبەرلىگىنە ۇمىتكەر» اتاعىنا, ءتۇرلى رازريادتارعا قول جەتكىزگەن 23 سپورتشى شىقتى.
وسىدان كەيىن اكادەميانىڭ جاۋىنگەرلىك تۋىمەن قوشتاسۋ ءۇشىن مىنبەردىڭ الدىنا لەيتەنانت تەمىرلان بايگەلدى شاقىرىلدى. ءسويتىپ, لەيتەنانتتار ءۇشىن جان تەبىرەنتەرلىك ءسات تە تۋدى. تىلسىم تىنىشتىق ورنادى. جاۋىنگەرلىك تۋدى ءسۇيۋشىنىڭ ءاربىر قيمىلىن سوعىلعان باراباننىڭ «بۇيرىعى» ارقىلى بىردەي ءارى مۇلتىكسىز قايتالاعان لەيتەنانتتار باستارىنداعى جاسىل كۇنقاعارلارىن قولدارىنا الىپ, وزدەرىنە ءتورت جىل بويى ءبىلىم بەرىپ, شەكاراشىلىق شەبەرلىكتەرىن شىڭداپ شىعارعان اكادەميانىڭ الدىندا سوڭعى مارتە تىزە بۇكتى.
ايتا كەتەيىك, ۇقك شەكارا اكادەمياسى بيىل ءوزىنىڭ 90 جىلدىق مەرەيتويىن اتاپ وتپەك. عاسىرعا جۋىق ۋاقىتتىڭ ىشىندە وسى جوعارى وقۋ ورنىنىڭ 300-دەن استام تۇلەگى گەنەرال دەگەن جوعارى اسكەري شەنگە يە بولدى. وتان قورعاۋ جولىنداعى جانقيارلىق ەرلىگى مەن قايسارلىعى ءۇشىن 40-تان استام شەكاراشى وفيتسەر كەڭەستەر وداعىنىڭ باتىرى اتاندى.
تامارا داۋلەتباەۆا.
ۇقك شەكارا قىزمەتىنىڭ زاپاستاعى پودپولكوۆنيگى
