ەنەرگەتيكا ۆيتسە-ءمينيسترى اسەت ماعاۋوۆتىڭ ايتۋىنشا, قازاقستاندا بەنزين مەن ديزەلدىڭ قورى جەتكىلىكتى.
– اتىراۋ مۇناي وڭدەۋ زاۋىتى جۇمىسىنداعى ەلەكتر ەنەرگياسىنا قاتىستى پروبلەمالاردى ەسكەرە وتىرىپ, مۇناي ونىمدەرىنىڭ قالدىقتارىن جيناقتاۋ جونىندە شەشىم قابىلداندى. سونداي-اق جىل باسىنان باستاپ بەنزين, ديزەل وتىنى سەكىلدى مۇناي ونىمدەرىن شەتەلگە ەكسپورتتاۋدى توقتاتتىق. بۇدان بولەك, سۇيىق وتىندى اۆتوكولىكپەن اكەتۋگە تىيىم سالۋ تۋرالى بۇيرىق شىعارىلدى. جىل سوڭىنا دەيىن كوپ كولەمدەگى مۇناي ونىمدەرىن ەكسپورتتاۋدى كۇتىپ وتىرعان جوقپىز. جيناقتالعان قور بەنزين ەكسپورتىن 2021 جىلدىڭ قازانىنان ەرتە باستاۋعا مۇمكىندىك بەرەدى, – دەدى ءا.ماعاۋوۆ ورتالىق كوممۋنيكاتسيالار قىزمەتىندە وتكەن بريفينگتە.
مۇناي ونىمدەرىنىڭ قورىن جيناقتاۋ ءۇشىن شىمكەنت مۇناي وڭدەۋ زاۋىتىن جوندەۋدى 2021 جىلدىڭ ناۋرىز ايىنىڭ سوڭىنان مامىردىڭ باسىنا اۋىستىردى. جوندەۋ جۇمىستارى باستالار الدىندا قاجەتتى كولەم جينالىپ, ىسكە قوسىلعاننان كەيىن مۇناي وڭدەۋ زاۋىتى تاۋلىگىنە 6,5 مىڭ توننا بەنزين مەن 6 مىڭ توننا ديزەل وتىنىن شىعارا باستادى. ءا.ماعاۋوۆتىڭ پىكىرىنشە, بۇل كولەم وڭتۇستىك ءوڭىردىڭ قاجەتتىلىگىن وتەۋگە جەتىپ تۇر. دەرەكتەرگە سۇيەنسەك, وڭتۇستىك وبلىستاردا شامامەن 5,3 مىڭ توننا بەنزين مەن 5,6 مىڭ توننا ديزەل وتىنى تۇتىنىلادى.
دەسە دە, شىمكەنت مۇناي وڭدەۋ زاۋىتىنان ءونىمدى جونەلتۋ بويىنشا بەلگىلى ءبىر دەڭگەيدە لوگيستيكالىق قيىندىقتار تۋىنداعان. سونىڭ سالدارىنان تاۋلىگىنە ءتيىستى كولەمنىڭ جارتىسى عانا تيەلگەن.
– قازىرگى ۋاقىتتا ماسەلە رەتتەلۋدە. مينيسترلىك جاقىن كۇندەرى تەمىر جول ارقىلى 4,3 مىڭ توننا بەنزين مەن 4,2 مىڭ توننا ديزەل وتىنىن جونەلتۋدى جوسپارلاپ وتىر. شىمكەنت مۇناي بازاسى ارقىلى 1 200 توننا بەنزين مەن ديزەل وتىنى قۇبىر جەلىسى كولىگىمەن تيەلەتىن بولادى. الداعى بىرنەشە كۇندە شىمكەنت پەن تۇركىستانعا قاتىستى جاعداي تۇراقتالادى. ودان كەيىن الماتى مەن قىزىلوردا وبلىستارىنداعى جاعداي رەتتەلەدى, – دەدى ءا.ماعاۋوۆ.
ەنەرگەتيكا مينيسترلىگىنىڭ مالىمەتىنە سۇيەنسەك, 2021 جىلعى 5 ايدىڭ قورىتىندىسى بويىنشا ەلىمىزدەگى مۇناي وڭدەۋ كولەمى 6,7 ملن توننانى قۇرادى. ونىڭ ىشىندە پاۆلودار مۇناي-حيميا زاۋىتى 2 ملن 389,9 مىڭ توننا, «پەتروقازاقستان ويل پروداكتس» 1 ملن 863,4 مىڭ توننا, اتىراۋ مۇناي وڭدەۋ زاۋىتى 2 ملن 119,7 مىڭ توننا, «CASPI BITUM» 343,3 مىڭ توننا, «كوندەنسات» كومپانيالار توبى 27,4 مىڭ توننا ءونىم وڭدەگەن.
بەس ايدىڭ قورىتىندىسى بويىنشا 1 ملن 852,7 مىڭ توننا بەنزين, 1 ملن 878,8 مىڭ توننا ديزەل وتىنى, 204,9 مىڭ توننا اۆياوتىن جانە 1 ملن 061,3 مىڭ توننا مازۋت وندىرىلگەن.
