23 ماۋسىمدا قارا تەڭىزبەن ودەسسادان باتۋميگە باعىت العان HMS Defender ەسمينەتسى ترانسشەكارالىق سۋلار ۇستىنەن ءجۇزىپ وتكەن. رەسەي فەدەراتسياسىنىڭ شەكارا اسكەرى كەمەگە حابار بەرىلىپ, ودان كەيىن ەسكەرتۋ رەتىندە وق اتقان.
10 مينۋتتان كەيىن سۋ-24م جويعىش ۇشاعى كەمە باعىتى بويىنشا اۋە بومبالارىن تاستاعان. قارا تەڭىز فلوتىنداعىلار وق اتىلعانىن راستادى.
رەسەي تاراپى وقيعانىڭ بەينەجازباسىن جاريالادى. وندا رەسەيلىك شەكاراشىنىڭ اعىلشىن تىلىندە: «بريتانيالىق ەسمينەتس, رەسەي فەدەراتسياسىنىڭ شەكاراسىنا كىرمەڭىز, باعىتتى وزگەرتىڭىز. مەن وق اتامىن», دەگەنى ەستىلەدى.
الايدا بريتانيا تاراپى وقيعانى جوققا شىعاردى. بريتانيا قورعانىس مينيسترلىگى رەسەي فەدەراتسياسى اۋماعىنا قاراي ەشقانداي كەمە بارماعانىن, رەسەيدىڭ سول سەبەپتەن وق اتۋى مۇمكىن ەمەستىگىن العا تارتتى. ۇكىمەت باسشىسى بوريس دجونسون رەسەيلىك شەكاراشىلار ايتىپ وتىرعان ەسمينەتستىڭ قىرىم جەرىندە جۇرگەنىن ايتتى.
ۇلىبريتانيانىڭ رەسەيدەگى قورعانىس ماسەلەلەرى بويىنشا اتتاشەسى رەسەي قورعانىس مينيسترلىگىنىڭ حالىقارالىق اسكەري سەرىكتەستىك باسقارماسىنا شاقىرىلدى. مينيسترلىك وكىلى ديپلوماتقا رەسەي پوزيتسياسى ءتۇسىندىرىلىپ, 23 ماۋسىمدا ورىن العان زاڭ بۇزۋ جايى ەسكەرتىلگەنىن حابارلادى.
