قازىر بۇكىل الەمدە, بارلىق سالادا باسەكە ءجۇرىپ جاتىر. عارىشقا ۇشۋ عانا ەمەس, ونى يگەرۋ جولدارى, ەكونوميكانى جاساندى ينتەللەكت كومەگىمەن دامىتۋ اشىق ءارى كەڭىنەن تالقىلانىپ كەلەدى. ايتسە دە, ادام ساناسىنىڭ وزگەرۋى كوكەيكەستى ءارى باسىمدىق بەرەتىن ماسەلە بولىپ قالا بەرمەك. سوندىقتان عىلىمنىڭ سوڭعى جەتىستىكتەرى, ءبىلىمنىڭ وزىق تۇرلەرى, جاڭعىرۋ مۇراتىنا ساي ماماندىقتار مەن كاسىپتەر جاڭا كوزقاراس قالىپتاستىرۋعا, وي-ءورىستى كەڭەيتۋگە, ادام ءومىرىنىڭ ساپاسىن ارتتىرۋعا باعىتتالعان.
سونىڭ ىشىندە زاماناۋي جۋرناليستيكا يندۋسترياسى ونىمدەرى ۇلكەن ماڭىزعا يە بولىپ وتىر. ءتىپتى «مەديابيزنەس», «مەديارەسۋرس», ء«باسپاسوز حولدينگى», «مەديا ورتالىق», «كونتەنت» سياقتى الەمدىك ۇعىمدار بىزگە ەتەنە جاقىن بولىپ كەتتى. ونىڭ ۇستىنە, بۇگىندە باسەكەنى بەلسەندىرەتىن وتاندىق, دۇنيەجۇزىلىك اقپاراتتىق كەڭىستىك بار. باق-تىڭ بارىمىزگە ۇيرەنشىكتى ۇلگىلەرىمەن قاتار ءتۇرلى اقپارات اگەنتتىكتەرى, ارنالارى, عالامدىق ينتەرنەت جەلىلەرى ناسيحاتپەن, ساياسي ۇگىتپەن, اعارتۋشىلىق قىزمەتپەن شەكتەلمەيدى, ودان دا اۋقىمدى ماقساتتى – ادامزاتتىق, ۇلتتىق, قوعامدىق سانانى وزگەرتۋگە اتسالىسىپ, الەۋمەتپەن شۇعىل بايلانىس ورناتۋدى كوزدەيدى. كوبىنەسە, قالىڭ بۇقارانىڭ الەۋمەتتىك جاعىنان قورعالۋىن العا تارتىپ, قالقان بولۋعا تىرىسادى. سونىسىمەن قوعامعا پايدالى قىزمەتى ەرەكشەلەنە تۇسەدى.
مۇنداي مىندەتتى ورىنداۋدىڭ ءتۇرلى پارمەندى تاسىلدەرى بار. دامىعان ەلدەر ولاردى بىلدىرتپەي الاتىن كۇشكە («مياگكيە سيلى») جاتقىزادى. ولاردى قولدانۋدا ايانىپ قالمايدى, قىرۋار قارجى جۇمسايدى. سايىپ كەلگەندە, بۇل – گەوساياسي جاعدايعا ىقپال ەتۋ دەگەن ءسوز.
بىزدىڭشە, ەلدىڭ تۇراقتى دامۋىن سيپاتتايتىن ودان دا ماڭىزدى ءبىر ماسەلە بار. ول – قوعامداعى ۇلتتىق سالت-ءداستۇر مەن ادامگەرشىلىك قاعيدالارىن, ار-وجدان قۇندىلىقتارىن ساقتاپ قالۋ بولسا كەرەك. ونىڭ ءتيىمدى تەتىكتەرىن ىسكە قوسۋدا باق سالاسى ۇلكەن ءرول اتقاراتىنى اقيقات. مۇنسىز ءسوز بوستاندىعىن ەلەستەتۋ دە قيىن. جۋرناليستىك ەتيكاعا جۇگىنبەۋشىلىك, جاۋاپسىزدىق, جەلىلەردە جالعان اقپاراتتىڭ تارالۋىنا جول بەرۋ اتالعان سالانىڭ دامۋىنا, باسەكەگە قابىلەتىنىڭ ارتۋىنا كەدەرگى جاسايتىنىن ەستەن شىعارماعان ءجون.
جالپى, مەديانارىق ناعىز كاسىبي ماماندارعا سۇرانىستان قالىپتاسادى. ولاردىڭ كاسىبي شەبەرلىگىن, شىعارماشىلىق الەۋەتىن تولىق پايدالانۋعا جول اشادى. سوندا ءاربىر ءجۋرناليستىڭ ەڭبەگى بۇگىنگىدەن الدەقايدا ءادىل, لايىقتى باعالانىپ, باق-تىڭ ساپاسى جاڭا دەڭگەيگە كوتەرىلمەك.
شىنى كەرەك, نارىقتىق قاتىناستاردى باتىل ەنگىزۋگە قۇرىلتايشىلار دا, مەنشىك يەلەرى دە, كاسىبي قىزمەتكەرلەر دە مۇددەلى بولۋعا ءتيىس. سوندا عانا بۇل سالانىڭ باعى جانادى. ال ۋاقىت تالابىنا ساي وزگەرگەن باق-تى قالىڭ وقىرمان مەن كورەرمەننىڭ وزدەرى-اق تەز تاۋىپ الادى.
دارحان مىڭباي,
2012-2013 جىلدارداعى مادەنيەت جانە اقپارات ءمينيسترى, پارلامەنت ءماجىلىسىنىڭ دەپۋتاتى, Nur Otan پارتياسى فراكتسياسىنىڭ مۇشەسى
