– مەن بەس جىلعا جۋىق ماسكەۋدە جۇمىس ىستەپ, 2013 جىلى قازاقستاندا ورتالىق ازياداعى ەڭ ءىرى تەاترلاردىڭ ءبىرى اشىلادى دەگەندى ەستىپ, باعىمدى سىناۋعا وسىندا كەلدىم. ءتۇرلى ەلدىڭ ارتىستەرى قاتىسقان قاتاڭ كونكۋرستان ءوتىپ, «استانا وپەرا» ترۋپپاسىنا قابىلداندىم» دەي كەلىپ, جاپونياعا ورالۋ تۋرالى ويىن دا ايتىپ ءوتتى.
− بالەت ءارتىسىنىڭ ساحناداعى عۇمىرى قىسقا, مەنىڭ جاسىم قازىر 36-دا, كاسىبي مانسابىمدى اياقتاۋ ءساتى كەلدى. سوندىقتان توكيوعا, ساعىندىرعان وتباسىما ورالامىن دەپ شەشتىم. ەندى قىزمەتتىك سالامدى اۋىستىرۋدى جوسپارلاپ وتىرمىن, الايدا بالەت ونەرى ماڭگى مەنىمەن بىرگە قالادى, ونىمەن ءوزىم ءۇشىن عانا اينالىسامىن. «استانا وپەرادا» جۇرگەندە ساحنادا جەكە پارتيالاردى, «تورتتىكتەردى», «ەكىلىكتەردى» جاسادىم, تەاتردىڭ رەپەرتۋارىنداعى تۇگەل دەرلىك قويىلىمداردا بيلەدىم. «شوپەنيانا» رومانتيكالىق بالەتىندەگى پرەليۋد ايرىقشا ەسىمدە قالدى, ول − وتە كۇردەلى ءنومىر. سونداي-اق «جيزەل», «دون كيحوت» بالەتتەرىندە وينادىم. وسىنداي مۇمكىندىك سىيلاعان بالەت ترۋپپاسىنىڭ كوركەمدىك جەتەكشىسى, رەسەيدىڭ حالىق ءارتىسى التىناي اسىلمۇراتوۆاعا العىسىم شەكسىز. ول كىسىنىڭ قولداۋىن ۇنەمى سەزىندىم, − دەيدى ول.
سونىمەن قاتار ماريكو كيتامۋرا قازاقستاندا بولعان جىلدارى, ۇلتتىق ءداستۇرلى تاعامداردى ۇناتىپ قالعاندىعىن سونىڭ ىشىندە وتە ءدامدى پىسكەن ەت پەن قازىنى جاقسى كورەتىندىگىن ايتادى.
«نۇر-سۇلتان قالاسىندا ءبىراز ۋاقىت تۇرعاندىقتان با, ەلوردانىڭ ەشكىمگە ۇقسامايتىن اسەم كەلبەتى مەنى ۇنەمى ءسۇيسىندىردى. دەمالىس كۇندەرى دوستارىمىزبەن ساياباقتاردا ءجيى قىدىردىق, مۇندا ءبارى دە جانعا جايلى, جاقسى ويلاستىرىلعان. ءبىر جاعىنان, قازاقتىڭ بولمىسىنا ءسىڭىسىپ كەتكەندىكتەن بە, وسىنداي مەيىرىمدى ەلمەن قوشتاسۋ كوڭىلىمدى مۇڭايتادى.
تەاتر اشىلعان كۇننەن باستاپ, اۋقىمدى ءىس تىندىردى. وسىندا ەسىمدەرى الەمگە تانىمال قويۋشى حورەوگرافتارمەن جۇمىس ىستەدىم.
باسقا ترۋپپالاردا مەن دايىن رەپەرتۋاردى بيلەسەم, ال مۇندا بالەت ونەرىنىڭ قىر-سىرىنا تەرەڭ بويلاۋعا مۇمكىندىك بولدى. شىن مانىندە, «استانا وپەرا» تەاترى − قازاق مادەنيەتىنىڭ بەتكە ۇستارىنا اينالدى, سوعان ۇلەسىمدى قوسقانىما ءوزىمدى باقىتتى سەزىنەمىن. الداعى تاڭدا تەاترعا كورەرمەن رەتىندە ورالۋ جوسپارىمدا بار, ال ەگەر ترۋپپا گاسترولدىك ساپارمەن جاپونياعا كەلسە مىندەتتى تۇردە سىيلىقتارىممەن بارامىن» دەيدى بالەرينا.
سونداي-اق «استانا وپەرا» تەاترىنىڭ باسشىلىعى مەن بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆا بالەت ءارتىسى ماريكو كيتامۋراعا ساحنادا سومداعان تاماشا بەينەلەرى ءۇشىن شىعارماشىلىق تابىس تىلەپ, العىسىن ءبىلدىردى.
