وزبەكستان رەسپۋبليكاسى ولي ءماجليسى زاڭ شىعارۋ پالاتاسى سەناتى كەڭەسىنىڭ, سونداي-اق وزبەكستان رەسپۋبليكاسى مينيسترلەر كابينەتىنىڭ «نۇرلى جول» گازەتى رەداكتسياسىندا وزبەكستان جۋرناليستەرى شىعارماشىلىق وداعىنىڭ توراعاسى وليمجون ۋساروۆ, توراعا ورىنباسارى حولمۋرود ساليموۆ, جەتەكشى مامان لاريسا سۋرەنەۆنا جانە اقپارات قىزمەتى مامانى يسلوم اسيلبەكوۆتەردىڭ قاتىسۋىمەن دوڭگەلەك ۇستەل ۇيىمداستىرىلدى.
شارا بارىسىندا وزبەكستان جۋرناليستەرى شىعارماشىلىق وداعى «نۇرلى جول» جانە «وۆوزي توجيك» گازەتتەرىنىڭ رەداكتسياسىنا زاماناۋي كومپيۋتەر سىيلادى.
وليمجون ۋساروۆ «نۇرلى جول» گازەتى ۇجىمىنىڭ وزبەكستانداعى ساياسي-ەكونوميكالىق, الەۋمەتتىك سالالارداعى جەتىستىكتەردى جۇرتشىلىققا كەڭىنەن جەتكىزۋدە, اقپارات سالاسىن دامىتۋدا قىزمەتى جوعارى ەكەنىن ايتىپ, وزبەكستان جۋرناليستەر شىعارماشىلىق وداعىنا مۇشەلىككە قابىلداۋدى ەڭ العاش وسى ەكى رەداكتسيادان باستاعانىن حابارلادى.
دوڭگەلەك ۇستەلدە و.ۋساروۆ كۋالىكتىڭ جاڭا ۇلگىسى بەكىتىلگەنىن, وعان توسبەلگىسى رامىزدىك ماعىناعا يە ەكەنىن تىلگە تيەك ەتىپ, «نۇرلى جول» گازەتىنىڭ باس رەداكتورى عۇلامزاكىر يۋسۋپوۆقا جانە گازەتتىڭ ءتىلشىسى جاننات مولداشەۆاعا كۋالىك پەن توسبەلگىنى سالتاناتتى تۇردە تاپسىرىپ, ولاردى شىعارماشىلىق وداعىنا مۇشە بولۋىمەن قۇتتىقتادى.
شارا باراسىندا كوپۇلتتى مەملەكەتتە ءباسپاسوز جانە ءسوز ەركىندىگىن قامتاماسىز ەتۋ بارىسىنداعى رەفورمالاردىڭ, بۇقارالىق اقپارات قۇرالدارىن جان-جاقتى قولداۋ, ءتۇرلى ۇلت پەن ۇلىس وكىلدەرى اراسىندا ءوزارا دوستىق قاتىناستارىن ودان ءارى كۇشەيتۋ بويىنشا جۇمىستاردىڭ دايەكتى جالعاسىپ كەلە جاتقانى ايتىلدى.
– وزبەكستانداعى ساياسي ۇدەرىستەر مەن جاڭارۋلاردى تۇراقتى جاريالاپ, وزبەك-قازاق حالىقتارى اراسىنداعى تۋىستىق بايلانىستاردىڭ بەرىك بولۋىنا ۇلەس قوسىپ كەلە جاتقان «نۇرلى جول» گازەتىنىڭ ەلىمىزدەگى بۇقارالىق اقپارات قۇرالدارى اراسىندا الاتىن ورنى ەرەكشە. وزبەكستان جۋرناليستەرى شىعارماشىلىق وداعى مەن قازاقستان جۋرناليستەر وداعى اراسىندا ىنتىماقتاستىق مەموراندۋمى جاسالعان. قۇداي قالاسا, ءبىز ۇدەرىستى ودان ءارى جانداندىرا تۇسەمىز. الداعى ۋاقىتتا ەلىمىزدە وتكىزىلەتىن «ولتين قالام» سىندى ءتۇرلى بايقاۋلارعا, سونىمەن قاتار حالىقارالىق دەڭگەيدە وتكىزىلەتىن بايقاۋلارعا دا ۇجىمداعى ۇزدىك جۋرناليستەردىڭ قاتىسۋىنا قولداۋ بىلدىرەمىز, – دەدى وزبەكستان جۋرناليستەرى شىعارماشىلىق وداعىنىڭ توراعاسى وليمجون ۋساروۆ.
«نۇرلى جول» گازەتى قىزمەتكەرلەرىنىڭ اقپارات سالاسىنداعى ەڭبەگى ەسكەرىلىپ, مەملەكەت تاراپىنان ماراپاتقا يە بولىپ كەلەدى. گازەتتىڭ باس رەداكتورى ع.يۋسۋپوۆ «مەحنات شۋحراتي» وردەنىمەن ماراپاتتالسا, تاجىريبەلى جۋرناليست قاتيرا نۇرباەۆا «وزبەكستانعا ەڭبەك سىڭىرگەن مادەنيەت قىزمەتكەرى» اتاعىنا يە بولدى. سونداي-اق رايحان باباتاەۆا, جۇماگۇل الىمبەكوۆا, ءازيزا ايقوجاەۆا مەن جاننات مولداشەۆالار «شۋحرات» مەدالىمەن ماراپاتتالعان. ەلىمىزدە جۋرناليستەر اراسىندا وتكىزىلەتىن «جىلدىڭ ەڭ ۇزدىك ءجۋرناليسى» بايقاۋىندا ءازيزا ايقوجاەۆا, جاننات مولداشەۆا, گۇلجامال بايتورەەۆا, ارۋحان اقپانبەتوۆالار سىيلىققا يە بولدى. «جىلدىڭ ەڭ ۇزدىك ءجۋرناليسى» بايقاۋىنىڭ جۇلدەگەرى رۇستەم تولەنوۆ «ەڭ ۇلى, ەڭ عازيز» بايقاۋىندا ءىى ورىن يەگەرى اتانعان. ايگۇل تەشەباەۆا ابايدىڭ 175 جىلدىعىنا وراي قازاقستان رەسپۋبليكاسىنىڭ «اباي» مەدالىمەن ماراپاتتالدى.
ارۋحان اقپانبەتوۆا,
«نۇرلى جول» گازەتىنىڭ ءتىلشىسى
