« ۇلى دالا تاڭى» تاريحي ءفيلمى قاسىم حاننىڭ ءومىرى, حاندىق بيلىگى مەن قازاق حاندىعىنىڭ گۇلدەنىپ, نىعايۋى جولىنداعى كۇرەسى تۋرالى باياندايدى. كينوتۋىندىنى قر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى ءتۇسىرىپ جاتىر.
ءمينيستردىڭ جۇمىس ساپارىنا بۇقارالىق اقپارات قۇرالدارى وكىلدەرى دە قوسىلىپ, تاريحي ءفيلمىنىڭ ءتۇسىرۋ بارىسىنا ورتاقتاستى.
ءتۇسىرىلىم الاڭىندا جۋرناليستەر شىعارماشىلىق توپتىڭ كۇردەلى ساحنالاردىڭ ءبىرى – ۇلىتاۋداعى شايقاستىڭ ءتۇسىرىلىمىن تاماشالاپ, ۇزىلىستە رەجيسسەر اقان ساتاەۆپەن جانە باستى رولدەگى اكتەر بەرىك ايتجانوۆپەن سۇحباتتاستى.
– تۇسىرىلىمدەر ويداعىداي ءجۇرىپ جاتىر, جۇمىستىڭ جارتىسى اياقتالدى. بۇگىن ءتۇسىرىلىمنىڭ 41-ءشى كۇنى, ءبىز شەشۋشى ءارى قيىن ساحنالاردىڭ ءبىرىن تۇسىرەمىز. تۇسىرىلىمگە 300-گە جۋىق ادام قاتىسادى – 56 كاسكادەر, 200-دەن استام شاباندوز بار. ءتۇسىرۋ جۇمىستارى جوسپار بويىنشا جالعاسىپ جاتىر, – دەدى اقان ساتاەۆ.
سونداي-اق, رەجيسسەر شىلدە ايىنىڭ باسىندا الماتى وبلىسى كەگەن اۋىلىنىڭ ماڭىندا قاسىم حان اۋىلىنىڭ كوشىن تۇسىرەتىنىن, ال كەيىن ءتۇسىرۋ جۇمىستارى ىلە وزەنىنىڭ بويىندا وسى فيلمگە بەيىمدەلگەن «تۇركىستان» دەكوراتسياسىندا جالعاساتىنىن حابارلادى.
ەستەرىڭىزگە سالا كەتەيىك, « ۇلى دالا تاڭى» ءفيلمىنىڭ ءتۇسىرىلىمى بيىل اقپان ايىنىڭ سوڭىندا الماتى وبلىسى كوكتال كەنتىنىڭ ماڭىندا باستالدى. جوبانىڭ باس پروديۋسەرى – ءاليا نازارباەۆا, ستسەناري اۆتورلارى – بەكبولات شەكەروۆ پەن اقان ساتاەۆ, قويۋشى سۋرەتشى – قۋات تلەۋباەۆ; قويۋشى وپەراتورى – حاسان قىدىراليەۆ, گريم بويىنشا سۋرەتشىلەر – ليديا وردىنسكايا, بوتاگوز ابدىباەۆا, كوستيۋم بويىنشا سۋرەتشى – دينا بۋكسيكوۆا.
تاريحي جوبانىڭ عىلىمي كەڭەسشىلىگىنە تاريحشى, تاريح عىلىمىنىڭ دوكتورى, پروفەسسور بەرەكەت كارىباەۆ, فيلوسوفيا جانە ساۋلەت ونەرى دوكتورى الماس ورداباەۆ, سۋرەتشى-كەسكىندەمەشى, تاريح عىلىمدارىنىڭ كانديداتى, ەتنوگراف-قارۋ جاساۋشى قاليوللا احمەتجان تارتىلعان.
فيلمدەگى باستى رولدەردى بەرىك ايتجانوۆ (ەرەسەك قاسىم حان), دانيار ورازاەۆ (جاس قاسىم حان), ايدوس ابدىقادىروۆ (جاس بۇرىندىق حان), ەرىك جولجاقسىنوۆ (ەرەسەك بۇرىندىق حان), نۇرلان ءالىمجانوۆ (مۇحاممەد شايباني), التىناي نوگەربەك (جاس جاحان بەگىم), شامشاگۇل مەڭدياروۆا (قارت جاحان بەگىم), تۇڭعىشباي جامانقۇلوۆ (ەرەسەك ءالي راشيد), قۋانىش قۇدايبەرگەن (جاس ءالي راشيد) سىندى اكتەرلار سومداپ جاتىر.
