كەزدەسۋ م.ح.دۋلاتي اتىنداعى تاراز وڭىرلىك ۋنيۆەرسيتەتى باس عيماراتىنىڭ ءماجىلىس زالىندا ءوتتى.
باسقوسۋدى اشقان وبلىس اكىمى جىل سايىن وبلىستا جاڭا مەكتەپتەر سالىنىپ, توزىعى جەتكەندەرى كۇردەلى جوندەۋدەن ءوتىپ جاتقاندىعىن اتاپ ءوتتى. جاڭا وقۋ جىلىنىڭ ءداستۇرلى فورماتتا باستالۋ مۇمكىندىگىن ەسكەرە وتىرىپ, پرەزيدەنت تاپسىرماسىنا سايكەس مەكتەپتەردىڭ بالالاردى قابىلداۋعا دايىندىعى پىسىقتالۋدا.
«مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس ءبىلىم سالاسىندا قولعا الىنعان رەفورمالار ءوز جالعاسىن تاباتىن بولادى. بۇل باعىتتا جامبىل وبلىسىندا دا اۋقىمدى جۇمىستار جۇرگىزىلۋدە. PISA (ماتەماتيكالىق ساۋاتتىلىق دەڭگەيىن باعالاۋ), TIMSS (ماتەماتيكالىق جانە جاراتىلىستانۋ عىلىمدارىنىڭ ساپاسىن زەرتتەۋ) حالىقارالىق زەرتتەۋلەرىنىڭ تالداۋى وبلىستىڭ جوعارى كورسەتكىشتەرگە قول جەتكىزگەنىن كورسەتىپ وتىر», دەدى اسحات ايماعامبەتوۆ.
ول ءوز سوزىندە ءبىلىم بەرۋ ۇيىمدارىنداعى بالالاردىڭ قاۋىپسىزدىگىن قامتاماسىز ەتۋ ماسەلەلەرىنە نازار اۋدارتتى.
«وبلىستىڭ بارلىق مەكتەپتەرىندە باقىلاۋ كامەرالارى ورناتىلىپ, جىلى سانيتارلىق توراپتارمەن قامتىلعان. مەكتەپتەر كەزەڭ-كەزەڭىمەن اۆاريالىق دابىل تۇيمەلەرىمەن, تۋرنيكەتتەرمەن جابدىقتالادى, كامەرالار وبلىستىق پوليتسيا دەپارتامەنتىنىڭ جەدەل باسقارۋ ورتالىعىمەن ينتەگراتسيالاناتىن بولادى. ءار بالانىڭ دەرەكتەرى ەنگىزىلگەن الەۋمەتتىك كارتالار اشىلۋدا», دەدى وبلىس اكىمى.
اسحات ايماعامبەتوۆ مينيسترلىك جۇزەگە اسىرعان بىرنەشە جوبالارمەن تانىستىرىپ, مۇعالىمدەر مەن مەكتەپ ديرەكتورلارىن ىرىكتەۋدىڭ جاڭا ەرەجەلەرى قابىلداناتىندىعىن جەتكىزدى.
مينيستر مەكتەپ ديرەكتورلارىنان ءبىلىم بەرۋ مەكەمەلەرىندەگى بيۋروكراتيانى جويۋدى تالاپ ەتتى. مينيسترلىكپەن ءبىلىم بەرۋ ۇيىمدارىنىڭ پەداگوگتارىنىڭ جۇرگىزۋى مىندەتتى قۇجاتتاردىڭ ناقتى تىزبەسىن بەكىتىپتى.
«بۇيرىققا سايكەس كۇن سايىن تەك ەكى قۇجات تولتىرىلۋى ءتيىس. سول ەكى قۇجات بويىنشا جۇمىس ىستەۋ ماڭىزدى جانە مۇعالىمدەردىڭ جۇمىسىن قولدان قيىنداتپاۋ كەرەك. ولاردىڭ باستى مىندەتى – ساباق وتكىزىپ, بالالارعا ءبىلىم بەرۋمەن اينالىسۋ. مۇعالىمدەردى ساباقتان تىس جۇمىستارعا تارتپاڭىزدار», دەدى ول.
ءوز سوزىندە بەردىبەك ساپارباەۆ تا مەكتەپ ديرەكتورلارىنا تاربيە ۇدەرىسىنە ەرەكشە نازار اۋدارۋ قاجەتتىگىن اتاپ ءوتتى.
