پرەزيدەنت • 25 ماۋسىم، 2021

پرەزيدەنتتىڭ باق سالاسىنداعى سىيلىقتارى مەن گرانتتارى تابىستالدى

218 رەت كورسەتىلدى

قازاقستان رەسپۋبليكاسى پرەزيدەنتىنىڭ بۇقارالىق اقپارات قۇرالدارى سالاسىنداعى سىيلىقتارى مەن گرانتتارى تابىستالدى، دەپ حابارلايدى  Egemen.kz اقورداعا سىلتەمە جاساپ.

«قازمەديا ورتالىعىندا» قازاقستان رەسپۋبليكاسى پرەزيدەنتىنىڭ بۇقارالىق اقپارات قۇرالدارى سالاسىنداعى سىيلىقتارى مەن گرانتتارىن تابىستاۋ ءراسىمى ءوتتى.

سالتاناتتى ءىس-شارا بارىسىندا پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ مەملەكەت باسشىسى قاسىم-جومارت توقاەۆتىڭ باق قىزمەتكەرلەرىنىڭ كاسىبي مەرەكەسىنە ارنالعان قۇتتىقتاۋىن وقىدى.

– سىزدەر قاشاندا ۇلت مۇددەسىن بارىنەن بيىك قويىپ، ەل قامى ءۇشىن قالام تارتىپ جۇرسىزدەر. مەملەكەتشىلدىك قۇندىلىقتى دارىپتەپ، جاسامپازدىق پەن جاقسىلىقتىڭ جارشىسى بولىپ كەلەسىزدەر.اقپارات سالاسىن دامىتۋعا مەملەكەت تاراپىنان قاشاندا ەرەكشە كوڭىل بولىنەدى. ءوز كاسىبىنىڭ مايتالمانى بولعان قارىمدى جۋرناليستەرگە قولداۋ كورسەتىلەدى. باق سالاسىنداعى ءداستۇرلى پرەزيدەنت سىيلىعى – سونىڭ ءبىر كورىنىسى. ونىڭ يەگەرى اتانعان ازاماتتاردىڭ ەسىمى قازاق جۋرناليستيكاسىنىڭ جىلناماسىنا جازىلاتىنى ءسوزسىز. جىل سايىن ەڭ تاڭداۋلى جۋرناليستەرگە بەرىلەتىن ماراپات وسىمەن جيىرما بەسىنشى رەت تابىستالىپ وتىر. بۇل سىيلىققا قاستەرلى تاۋەلسىزدىگىمىزدىڭ 30 جىلدىعى قارساڭىندا يە بولۋدىڭ دا سيمۆولدىق ءمانى بار، – دەلىنگەن پرەزيدەنتتىڭ قۇتتىقتاۋىندا.

سودان كەيىن داۋرەن اباەۆ پرەزيدەنت سىيلىعى مەن گرانتىنىڭ يەگەرلەرىن، العىسىن العان شىعارماشىلىق ۇجىمداردى قۇتتىقتادى.

مەملەكەت باسشىسىنىڭ وكىمىمەن قازاقستان رەسپۋبليكاسى پرەزيدەنتىنىڭ سىيلىعى ««حابار 24» تەلەارناسىنىڭ جاڭالىقتار ءبولىمىنىڭ جۇرگىزۋشىسى زاحارچۋك ۆەرا نيكولاەۆناعا، «Qmonitor.kz» جەلىلىك باسىلىمىنىڭ شولۋشىسى يساباەۆا ساۋلە بوريسقىزىنا، «قازاق» جانە «شالقار» راديولارىنىڭ الماتى ستۋدياسىنىڭ جەتەكشىسى قۇتپانباەۆ باقىت جاعىپار ۇلىنا، «قازاقستان تەمىر جولى» ۇلتتىق كومپانياسى» اكتسيونەرلىك قوعامىنىڭ باق-پەن جۇمىس دەپارتامەنتىنىڭ باس مەنەدجەرى ويشىباەۆا جاننات باقتىعۇلقىزىنا بەرىلدى.

پرەزيدەنت گرانتتارىن «AIQYN» رەسپۋبليكالىق قوعامدىق-ساياسي گازەتىنىڭ باس رەداكتورى بايعاراەۆ نۇرمۇحامەد يسمان ۇلى، «كتك» تەلەارناسىنىڭ اقپاراتتىق باعدارلامالار ديرەكتسياسى ورتالىق رەداكتسياسىنىڭ رەداكتورى نۇراقىن دياس ەرمەك ۇلى، «QAZAQSTAN» ۇلتتىق تەلەارناسى «اشىق الاڭ» قوعامدىق-ساياسي توك-شوۋىنىڭ جۇرگىزۋشىسى تولىقباەۆ ماقسات مالىك ۇلى، «مۇنارا» گازەتىنىڭ باس رەداكتورى حاسانوۆ سەرىكبول تىلەپبەرگەن ۇلى يەلەندى.

قازاقستان رەسپۋبليكاسى پرەزيدەنتىنىڭ العىسى «اقيقات» ۇلتتىق قوعامدىق-ساياسي جۋرنالىنىڭ، «ۆەچەرني الماتى» گازەتىنىڭ، «قازاق راديولارى» جاۋاپكەرشىلىگى شەكتەۋلى سەرىكتەستىگىنىڭ، «سارىارقا» تەلەارناسىنىڭ شىعارماشىلىق ۇجىمدارىنا تابىستالدى.

مەملەكەت باسشىسىنىڭ العىس حاتتارى ەلىمىزدىڭ بارلىق وڭىرىنە جىبەرىلدى. اتالعان ماراپاتتار ءار ايماقتان ۇزدىك دەپ تانىلعان جۋرناليستەرگە سالتاناتتى تۇردە تابىس ەتىلەدى.

سوڭعى جاڭالىقتار

كاسپي جاعالاۋىندا قوقىس كوپ

ەكولوگيا • بۇگىن، 20:47

قازان-نۇر-سۇلتان اۋە رەيسى اشىلادى

قازاقستان • بۇگىن، 18:45

COVID-19: وڭىرلەردەگى جاعداي كۇردەلى

كوروناۆيرۋس • بۇگىن، 18:03

نۇر-سۇلتاندا قانداي ۆاكتسينالار بار؟

كوروناۆيرۋس • بۇگىن، 17:19

الماتىدا قويما ورتەنىپ جاتىر

ايماقتار • بۇگىن، 10:30

ۇقساس جاڭالىقتار