بيىل ەلىمىز ۇلى وتان سوعىسىنداعى جەڭىستىڭ 65 جىلدىعىن اتاپ وتكەلى وتىر.
وتان ءۇشىن قان-قاساپ مايداندا وت كەشكەن اتالارىمىز بەن اكەلەرىمىزدىڭ, اجەلەرىمىز بەن انالارىمىزدىڭ جانقيارلىق ەرلىكتەرى مەن تىلدا ەڭبەك ەتكەندەردىڭ قاجىر-قايراتى ۇرپاقتان-ۇرپاققا جەتەتىن وشپەس ۇلگى, ولمەس ونەگە. وسى كۇندەرى ەلىمىزدە قوعامدىق-الەۋمەتتىك, مادەني شارالار وتكىزىلىپ, ەرلىككە تاعزىم ەتىلۋدە. اقتوبە مەملەكەتتىك پەداگوگيكالىق ينستيتۋتىندا ۇيىمداستىرىلعان “ ۇلى وتان سوعىسى: زەرتتەۋ ءادىسناماسى مەن وقىتۋ تاجىريبەسىنىڭ وزەكتى ماسەلەلەرى” اتتى حالىقارالىق عىلىمي-تاجىريبەلىك كونفەرەنتسيا جاس ۇرپاقتىڭ جادىندا سوعىستىڭ قانشالىقتى قاسىرەت اكەلگەنىن جاڭعىرتۋ, وعان تاريحي باعا بەرۋ جانە جان-جاقتى تەرەڭ زەرتتەلۋىن ناقتىلاي تۇسۋدەگى ايشىقتى شارا بولدى.وعان ەلىمىزدىڭ تاريحشى عالىمدارىمەن بىرگە رەسەيدەن, وزبەكستاننان دا قوناقتار كەلدى. اقتوبە مەملەكەتتىك پەداگوگيكالىق ينستيتۋتىنىڭ رەكتورى, ەكونوميكا عىلىمدارىنىڭ دوكتورى, پروفەسسور عالىمجان نۇرىشەۆ ۋاقىت وتكەن سايىن ۇلى وتان سوعىسىنىڭ قاسىرەتتى جىلدارى تاريح ساحناسىندا ايشىقتالا تۇسەتىنىنە توقتالدى. سۇراپىل سوعىسقا دۇنيە ءجۇزىنىڭ 60 مەملەكەتى قاتىسقانىنان حاباردار ەتتى. مايدانعا اتتانعان 122 423 اقتوبەلىكتىڭ 36 700-ءى عانا تۋعان جەرگە ورالعان. 35 اقتوبەلىك كەڭەس وداعىنىڭ باتىرى اتانسا, 9-ى “داڭق” وردەنىنىڭ تولىق يەگەرى بولعان. پلەنارلىق ماجىلىستە فيلوسوفيا عىلىمدارىنىڭ دوكتورى, پروفەسسور التاي تايجانوۆ “تۇتاستىق پەن ۇلتتىق نامىس – جەڭىستىڭ كەپىلى”, م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ پروفەسسورى ز.بوچارەۆا “ەكىنشى دۇنيەجۇزىلىك سوعىستاعى رەسەي ەميگراتسياسى”, اقتوبە مەملەكەتتىك پەداگوگيكالىق ينستيتۋتىنىڭ پروفەسسورى, تاريح عىلىمدارىنىڭ دوكتورى نۇرتازا ابدوللاەۆ “ ۇلى وتان سوعىسى جىلدارىنداعى كسرو-نىڭ ۇلتتىق ساياساتىنىڭ تاريحناماسى” دەگەن تاقىرىپتاردا تارتىمدى بايانداما جاسادى. كونفەرەنتسيادا بۇدان باسقا دا بايانداماشىلار شىعىپ سويلەپ, ۇلى وتان سوعىسىنىڭ كوپ سالالى تاريحى تۋرالى اڭگىمەلەدى. عىلىمي-تاجىريبەلىك كونفەرەنتسياعا قاتىسۋشىلار سودان كەيىن سەكتسيالىق ماجىلىستە ۇلى وتان سوعىسى تاريحىنىڭ زەرتتەلۋى جايىندا ءوزارا پىكىر الىسىپ, تولعاقتى ويلارىن ورتاعا سالدى. ساتىبالدى ءساۋىرباي, اقتوبە وبلىسى.
